1 Reyes 19

Oripi motopiꞌpaꞌ Iniasë taꞌarinsoꞌ

1Acaposo yaꞌhuërinꞌpaꞌ canconahuaton, yaꞌipi Iniasë naporinso Quisapira shaꞌhuitërin. Paaro marëꞌ pënëntopisopitanta atëpatërinsoꞌ, shaꞌhuitërin. 2Ina natanahuaton Quisapirasoꞌ, Iniasë shaꞌhuitacaso marëꞌ aꞌnara comision aꞌparin: “Naporin Quisapira: ‘Quëmasoꞌ Paaro marëꞌ pënëntonaꞌpiroꞌsa acorahuësoꞌ, atëpatëran. Napoaton carionta atëpataꞌhuanquënso yaꞌhuërin. Tashiraya ipora pochin atëpatëransopita pochin nitaranquën. Coꞌsoꞌ inapotohuatënquënhuëꞌ, mamanshiroꞌsa chiníquën anaꞌinchinaco,’ tënin,” itërin.

3Ina natanaton, Iniasëso paꞌyanin: “Coꞌsoꞌ taꞌahuatohuëꞌ, tëpaponaco,” taꞌton Piirsipa ninanoquë piyapinënë chachin taꞌarin. Inaso ninanoꞌ, Cota huënton noꞌpanën paꞌmarinꞌpaꞌ yaꞌhuërin. Inaquë canconahuaton, piyapinën patërin. 4Ina quëran inasoꞌ, inotëro parti paaton, aꞌna tahuëriraꞌ iratërin. Napoin quëran nitama nara tashinantërinquë huënsëconin. Inaquë co napion cancantárin. Yachiminaton: “¡Co huachi Sinioro ahuantërahuëꞌ! ¡Cantaꞌ, shimashonëhuëpita pochachin naponahuë niꞌton, acopitochanco!” itërin. 5Napotahuaton ina narasoquë quëhuënin. Quëhuënin quëran huëꞌërin.

Napoaponahuëꞌ, Sinioro anquëninëni pichianahuaton ochinanin. Capayatohuachina itapon: “Huënsërahuaton coshatëquëꞌ,” itërin. 6Huënsërahuaton yonisarin. Niꞌpirinhuëꞌ, motoantërinso pirayan pan pënayaquë anpipisoꞌ, quënanin. Iꞌshanta yonshaquë ina pirayan huënsëarin. Ina quëran huanirahuaton coshatërin, oꞌorin, naporin. Nani coshatohuachina quëhuëantaton huëꞌantarin. 7Napoaponahuëꞌ, Sinioro anquëninëni pichiantarahuaton ochinaantarin. Capayatohuachina itapon: “Huënsëantarahuaton coshataantaquëꞌ. Áquë iratamaso yaꞌhuëtërinquën. Coꞌsoꞌ noya coshatohuatanhuëꞌ, co chinoranquë cancontaranhuëꞌ,” itërin. 8Napotohuachina, caantarin, oꞌoantarin, naporin. Inaporahuaton, catapini shonca tahuëri tashirë chachin iratërin. Paꞌsápaton Oripi motopiꞌpaꞌ huarëꞌ canconin. Ina motopisoꞌ, Sinioro motopinën itopi antaꞌ.

9Cancontarahuaton, motopi naninquë huëꞌëcaso marëꞌ yaꞌconin. Yaꞌconpirinhuëꞌ, Siniorori itapon: “¿Maꞌta isëquë nisaran Iniasë?” itërin. 10“Quëmaso Sinioro Yosënquën, yaꞌipi nanitaparan. Napoaton paꞌpi aꞌpitëranquën. Israiroꞌsarëꞌquën anoyatëranso aꞌpopi. Artaronënpitantaꞌ, ohuatopi. Quëma marëꞌ pënëntopisopitantaꞌ, sahuëniquë tëpapi. Casáchin nipirinhuëꞌ, tëpainacoso marëꞌ yonisarinaco,” itërin Iniasëri.

11Naporoꞌ Siniorori itapon: “Aipiran pipirahuaton huaniquëꞌ. Inaëchin naꞌhuëarahuë niꞌton, inaquë huaniquëꞌ,” itërin. Napotohuachina, inaso pipirin. Naporoꞌ Siniorosoꞌ naꞌhuëarin. Naporo chachin paꞌpi chiníquën ihuan paaton motopiroꞌsa paꞌton paꞌtontërin. Natëtëroꞌsanta opoa opoatërin. Sinioroso napoaponahuëꞌ, co ihuanquë yaꞌhuërinhuëꞌ. Ihuan naꞌhuëso chachin, ocohua yaꞌhuërëꞌ paantarin. Sinioroso napoaponahuëꞌ, co ocohuaquë tëranta yaꞌhuërinhuëꞌ. 12Ocoanta copitaꞌso chachin, pën yaꞌhuërëꞌ paantarin. Sinioroso napoaponahuëꞌ, co inaquë tëranta yaꞌhuërinhuëꞌ. Naporoꞌ Iniasësoꞌ, yaꞌcoontarin. Pën naꞌhuërin piquëran, yashin yashin natanchináchin, sanóshin huinpiso irinin. 13Ina natanaton, aipi aꞌmorinso quëran nipaꞌcopirayatërin. Inaporahuaton pipiintarin. Naporoꞌ Siniorori nontaton itapon: “¿Maꞌta isëquë nisaran Iniasë?” itërin. 14Napotohuachina: “Quëmasoꞌ Sinioro Yosënquën, yaꞌipi nanitaparan. Napoaton paꞌpi aꞌpitëranquën. Israiroꞌsarëꞌquën anoyatëranso aꞌpopi. Artaronënpitantaꞌ, ohuatopi. Quëma marëꞌ pënëntopisopitantaꞌ, sahuëniquë tëpapi. Casáchin quëparitopirahuë, tëpainacoso marëꞌ yonisarinaco,” itërin.

15Naporoꞌ Siniorori itapon: “Yaꞌhuëranquë paantarahuaton Tamasco ninanoquë huarëꞌ paquëꞌ. Inaso ninanoꞌ, inotëro intonquë yaꞌhuërin. Inaquë aꞌnara quëmapi Asairo itopisoꞌ, Siria copirno nicacaso marëꞌ acoonquëꞌ. 16Yaꞌhuërëꞌ israiroꞌsa copirnonën nicacaso marëntaꞌ, Nimisi shiin Quio itopisoꞌ, acoquëꞌ. Quëma yaꞌhuërënamën pënëntonaꞌpi nicacaso marëntaꞌ, Sahuati huiꞌnin Irisio itopisoꞌ, acoquëꞌ. Inasoꞌ, Apiri-miora ninanoaꞌhuaquë yaꞌhuërin. 17-18Inapotohuatan, insosona Asairo quëran chaꞌëpachin, Quiori tëpapon. Quio quëran chaꞌëpachin, Irisiori tëpapon. Ina nipirinhuëꞌ, ca nohuanton canchisë huaranca israiroꞌsa imamiatarinaco. Inapitaso mamanshi Paaro itopisoꞌ, co moshapihuëꞌ,” itërin.

Pënëntacaso marëꞌ Irisio acorinsoꞌ

19Siniorori napotohuachina, Iniasëso yaꞌhuërinquë paantarin. Apiri-miora yaꞌcari nipachina, Irisio sacatarin quënanconin. Shonca aꞌna quëmapiꞌsanta quëchitapi. Inapitasoꞌ cato cato tororoꞌsaquë noꞌpaꞌ ohuërërantapi. Piquëran nininso Irisiori quëpararin. Iniasëri paaparahuaton, aipi aꞌmorinsoquë imopitërin. Inapotahuaton huëshiarin. 20Naporo chachin Irisiosoꞌ, tororoꞌsa aꞌporin. Ina quëran taꞌarahuaton icantoonin:

—Imasaranquën mini sinioro. Napoaponahuëꞌ, quëtoco paato, tata, mama, inapita nonta nontaꞌi, itërin.

—Noya paquëꞌ. Ama napoaponahuëꞌ, napotëranquënsoꞌ naniantëquësohuëꞌ, itërin Iniasëri.

21Napotohuachina, paꞌsahuaton cato chachin toro asacatërinsoꞌ, tëpaconin. Ina anpicaso marëntaꞌ, nararoꞌsa oyoninsoꞌ manin. Inaquë nosha anpihuachina, caꞌpi. Nani caꞌpachinara, paꞌpin, aꞌshin, inapita, nontërin. Inapotahuaton, Iniasë imarin. Imaton, ina marëꞌ sacatërin.

Currently Selected:

1 Reyes 19: cbt

Highlight

Copy

Compare