1 Reyes 1
1
Tapi copirno mashotaton parisitërinsoꞌ
1Tapi copirno mashotërin. Napohuachina tëꞌnarin niꞌton, noyá aꞌmotopi. Inapotopirinahuë tërantaꞌ, co nanitërinhuëꞌ huënocatacasoꞌ. 2Napoaton aꞌnara catahuacaso marëꞌ huaꞌan acorinsoari itapon: “Aꞌnara nanon nocomatënquën nëhuëtiinquënso marëꞌ yonítiinënso yaꞌhuërin. Naporahuaton cahuainquënso marëꞌ quëmarë chachin huëꞌëin,” itërin.
3Napotohuachina aꞌnara nanon noyápiroyanchin nininsoꞌ yaꞌipi Israiro noꞌpaquë yonípi. Yonipachinara, Sonin ninano itopiquë aꞌnara quënanpi. Inasoꞌ sanapi, Apisaca itopi. Ina quënanatona Copirnoquë quëpapi. 4Ina sanapisoꞌ noyápiroyanchin. Inari copirno aꞌpaiaton nocomarárin. Inaso napoaponahuëꞌ, co onporonta copirnori tëcarichininhuëꞌ.
Atoniasë, copirno yayaꞌconinsoꞌ
5Naporo tahuëriꞌsa copirno huiꞌnin Atoniasë itopisosoꞌ, paꞌpin yayaꞌhuërëtaton: “Ca copirno nisarahuë,” tënin. (Inasoꞌ, Aquita itopisoꞌ huaꞌhuin.) Ina pochin yonquiaton naꞌamiachin ahuëtacaiso toronanoꞌsa paꞌanin. Cahuarioquë paꞌpisopita sontaroꞌsanta yaꞌhuëtërin. Aꞌpairápaiso marëntaꞌ, aꞌnatërápo shonca sontaroꞌsa ina marëꞌ acorin. 6Inaso huaꞌhuatapon quëran huarëꞌ co paꞌpini pënëninhuëꞌ niꞌton, co noyahuëꞌ cancantërin. Maꞌsona tëranta nisahuachina, co onporo tëranta paꞌpini: “Maꞌmarëta ina pochin nisaran,” co itërinhuëꞌ. Apësaronco piquëran inasoꞌ huaꞌhuatërin. Naporahuaton inantaꞌ, noyapin noyapin niꞌtërin. 7Aꞌna tahuëri inasoꞌ, Coapo itapon: “Catahuaco cantaꞌ, copirno yaꞌcoin,” itërin. Itohuachina: “Noyapaꞌ, catahuainquën nipachin,” itërin inarintaꞌ. Apiataro corto huaꞌanta ina chachin natanpachina, inarinta aꞌpanirin. 8Satoco corto huaꞌaniso napoaponahuëꞌ, co ina catahuarinhuëꞌ. Coiata huiꞌnin Pinaia itopisoꞌ, Natan pënëntonaꞌpi, inapitarinta co ina catahuapihuëꞌ. Tapi amiconën Simii itopisontaꞌ, co Atoniasë catahuarinhuëꞌ. Copirno aꞌpaipisopita sontaroꞌsantaꞌ, co ina catahuapihuëꞌ.
9Aꞌna tahuëri Atoniasësoꞌ, Soiriti natëtë pirayan pita ninin. (Inaso natëtëꞌ, Noquiri itopiquë huinan yaꞌhuërinso yaꞌcari yaꞌhuërin.) Ina pitaquë capacaiso marëꞌ ohuicaroꞌsaꞌ, tororoꞌsaꞌ, toroaꞌhuaroꞌsa amoshin nipisopita, inapita atëpatërin. Inapoaton yaꞌipi pochin iinpita përarin. Yaꞌipi Cota huënton sacatoroꞌsa copirno marëꞌ sacatopisontaꞌ, përarin. Coshatasoi shaꞌhuirin: “Yaꞌipi israiroꞌsa copirnonën ca yaꞌcoanahuë,” itërin. 10Napoaponahuëꞌ, Natan pënëntonaꞌpiso co përarinhuëꞌ. Paꞌpin aꞌpaipisopita sontaroꞌsaꞌ, Pinaia, iyaꞌhuain Saromon, inapitanta co përarinhuëꞌ.
11Natanso naporapiso nicaton, Saromon aꞌshin nontapon paꞌnin:
—Atoniasë pita nisarin. Inaquë yaꞌipi përarinsopita natantonënquë naporin: “Israiroꞌsa copirnonën ca yaꞌcoanahuë,” tënin. Copirnosoꞌ, co manta nitotopirinhuëꞌ napoarin. 12Napoaton apira carinquën shaꞌhuichinquën maꞌsona noya nicamasoꞌ. Inapohuatan co tëpaponënhuëꞌ. Saromonta co tëpaponahuëꞌ. 13Paaton copirno nontoonquëꞌ: “Quëmasoꞌ sinioro copirno chiníquën nanantëran. Nani iráca shaꞌhuitëranco: ‘Yoscoarëꞌ huiꞌnahuë Saromon itërahuësoꞌ yaꞌhuërëtaponco,’ itëranco. Napoaponahuëꞌ, nani Atoniasë yaꞌconaton huaꞌanëntacaso caniaritarin huachi,” itëquëꞌ. 14Napotasën chachin canta yaꞌconato, ina chachin shaꞌhuitarahuë, itërin.
15Napotohuachina Pitisapisoꞌ paꞌsahuaton, patoananënquë copirno niꞌconin. Inasoꞌ noyá mashoya niꞌton, Apisacari aꞌpairárin niꞌconin. 16Naporoꞌ isonin quëran noꞌpaquë huarëꞌ monshorahuaton, copirno mosharin. Inapoasoꞌ copirnori itapon:
—¿Maꞌta nohuantëran? itërin.
17—Quëmasoꞌ sinioro copirno chiníquën nanantëran. Nani iráca shaꞌhuitëranco: “Yoscoarëꞌ huaꞌhuan Saromon itërësoꞌ yaꞌhuërëtaponco,” itëranco. 18Napoaponahuëꞌ, nani Atoniasë yaꞌconaton huaꞌanëntacaso caniaritarin huachi. Naporinso quëmaso sinioro copirno, co nitochátëraranhuëꞌ. 19Tororoꞌsaꞌ, toroaꞌhuaroꞌsa inapita atëpatërin. Naꞌa ohuicaroꞌsanta atëpatahuaton, pita nisarin. Huiꞌnanpita yaꞌipiya pochin përarin. Apiataro, Coapo, inapitanta përarin. Saromoánchin co përarinhuëꞌ. 20Inaso napopirinhuëꞌ, yaꞌipiyacoi ninárainquën insosona quëma yaꞌhuërënamën copirno acocasoꞌ. 21Coꞌsoꞌ ina pochin Saromon acoyátërasënquënhuëꞌ, maꞌsha onpohuatan, Atoniasë quiyasoꞌ tëpaponcoi.
22-23Nontaso chachin Natan pënëntonaꞌpintaꞌ, copirno pëiquë canquirin. Canquirinso aꞌnari shaꞌhuitohuachina: “Yaꞌcointaꞌin,” tënin. Copirno notënanquë nipachina, inaso noya nicaton isonin. Isonin quëran noꞌpaquë huarëꞌ monshomarin. Naporoꞌ Pitisapisoꞌ pipirin. 24Natani copirno itapon:
—¿Quëma chachin sinioro copirno camaitëran niꞌton, Atoniasë quëma yaꞌhuërënamën huaꞌanëntarin huachi? 25Ipora tahuëri chachin inaso pita nicaton, naꞌa ohuicaroꞌsaꞌ, tororoꞌsaꞌ, toroaꞌhuaroꞌsaꞌ, inapita atëpatërin. Inaporahuaton yaꞌipiya pochin huiꞌnanpita përarin. Sontaro capitanoꞌsanta përasahuaton, Apiataro corto huaꞌaonta përarin. Inaquë capatonaꞌ, oꞌotonaꞌ, chiníquën noncaroapi: “¡Atoniasë copirno, huaꞌqui tahuëri huaꞌanënchinpoaꞌ!” tosapi. 26Napoaponahuëꞌ, co caso shaꞌhuitërincohuëꞌ. Satoco corto huaꞌan, Pinaia, inapitanta co shaꞌhuitërinhuëꞌ. Co Saromon tëranta shaꞌhuitërinhuëꞌ. 27Insosona quëma yaꞌhuërënamën huaꞌanëntacaso co shaꞌhuitaponcorahuëꞌ acoran niꞌton, ¿ina pochin nisamarai ti? itërin.
Saromon copirno yaꞌconacasoꞌ, Tapi camaitërinsoꞌ
28Natani napotërinsoꞌ natanahuaton, Tapisoꞌ, Pitisapi apërátaantarin. Huëꞌsahuaton inasoꞌ, copirno notënanquë huanirin. 29-30Naporoꞌ copirnori itapon:
—Siniorosoꞌ, nisha nisha maꞌsha onporahuësopita quëran nichaꞌërinco. Ina niꞌsárinco niꞌton, Yosë chinotërëhuaso yonquiato iráca Yoscoarëꞌ itëranquën. Napo nontëranquënso chachin, ipora tahuëri nisarahuë. Huaꞌhuan copirno yaꞌconaton, huaꞌanëntërahuëso shiranëhuëquë huënsapon huachi, itërin. 31Napotohuachina Pitisapisoꞌ, copirno noya nicaton isonin. Isonin quëran noꞌpaquë huarëꞌ monshomarin. Napotahuaton chiníquën nonin:
—¡Nanpimiataton sinioro copirno huaꞌanëntocoi! itërin.
32-33Ina quëran Tapisoꞌ piyapinënpita camairin Satoco corto huaꞌan përacaisoꞌ. Pinaia, Natan pënëntonaꞌpi, inapitanta amatërin. Huëꞌpachinara itapon:
—Catahuainacoso marëꞌ huaꞌanoꞌsa acorahuëso quëparahuatomaꞌ, huiꞌnahuë Saromon itërahuëso moranëhuëquë aꞌmitocoꞌ. Inapotahuatomaꞌ, Quiyon huinanquë quëpacoꞌ. 34Inaquë Satoco, Natan, inapitari tomaquë opomototahuatonaꞌ, israiroꞌsa copirnonën nicacasoꞌ marëꞌ acoꞌinaꞌ. Nani acohuachinaꞌ, naní quëran chiníquën noinaꞌ: “¡Saromon copirno huaꞌqui tahuëri nanpiton, huaꞌanënchinpoaꞌ!” chinaꞌ. 35Ina quëran caꞌtanatomaꞌ, huaꞌanëntërahuësoꞌ shiranëhuëquë ahuënsëicoꞌ. Nani ina huayonahuë ca yaꞌhuërënamëhuë yaꞌipi israiroꞌsa huaꞌanëntacaso marëꞌ, itërin.
36Naporoꞌ Pinaiari copirno itapon:
—¡Noyapaꞌ! Camaitëranso chachin mini nisarai. Ipora camaitëransoꞌ, Yosë nohuantërinso chachin niin. 37Naporahuaton quëma catahuarinquënso pochachin Saromonta Siniorori catahuain. Ina nohuanton quëma huaꞌanëntëran quëran noya noya inaso huaꞌanënchin, itërin.
38Ina quëran inapitasoꞌ, quiritoroꞌsaꞌ, piritoroꞌsaꞌ, inapitarë chachin Quiyon huinanquë paꞌpi. Copirno moranënquë Saronon aꞌmitëahuatona paꞌpi. 39Coꞌhuara inaquë paꞌshátëraponaraihuëꞌ, Satoco corto huaꞌansoꞌ, Yosë caposonën yaꞌhuërinquë paꞌnin. Ina quëran pomonquë Yosë marëꞌ toma tapapiso masahuaton paꞌnin. Canconpachina, inaquë Saromon opomototahuaton copirno nicacaso marëꞌ acorin. Ina piquëran aꞌnari carniro pomon pihuirin. Naporoꞌ yaꞌipi caꞌtanpisopitari chiníquën nonatonaꞌ: “¡Saromon copirno huaꞌqui tahuëri nanpiton, huaꞌanënchinpoaꞌ!” topi. 40Naporahuatona Quirosarinquë imaquipi. Capa cancantatona pirinanoꞌsa pihuiriapi. Inapoapona pochin chiníquën noncaropi niꞌton, noꞌpaꞌ nacontochináchin niriapi.
41Atoniasësoꞌ, yaꞌipi përarinsopitarë chachin pëꞌinipi. Naporoꞌ aꞌnapita israiroꞌsa noncaropisoꞌ natanpi. Coaponta carniro pomon pihuipisoꞌ natanahuaton tapon:
—Ninanoquë chiníquën noncarorapi. ¿Maꞌta ipora onpocai? tënin. 42Napoaso chachin Apiataro corto huaꞌan huiꞌnin Conatan itopisosoꞌ canquirin. Canquihuachina Atoniasëri itapon:
—Huëquëꞌ. Quëmasoꞌ chiníquën nanantëran. Noya nanan ipora quëshiarancoi, itërin.
43—Coꞌchi paya. Copirnonënpoa yaꞌhuërëtacaso marëꞌ nani Saromon acorin. 44-45Satoco, Natan, Pinaia, inapita copirnori camairin: “Quiritoroꞌsaꞌ, piritoroꞌsaꞌ, inapitarëꞌquëma chachin Saromon caꞌtanatomaꞌ, yaꞌhuërënamëhuë ina acocoꞌ. Ina marëꞌ moranëhuëquë aꞌmitëcoꞌ. Naporahuaton Satoco corto huaꞌan, Natan pënëntonaꞌpi, inapitari copirno nicacaso marëꞌ Quiyonquë acoꞌinaꞌ,” tënin. Ina pochin nicatonaꞌ, capa cancantërëꞌnachin huënantarapi. Inahua mini noncarorapiso natanama nisapasoꞌ. 46-48Inapoaton Saromon, huaꞌanëntacaso shiranënquë huënsërin. Catahuacaso marëꞌ copirno Tapiri acorinsopitanta paaparahuatonaꞌ: “Ma noya copirnonëhuëi nicacaso marëꞌ yaꞌconan. Yosë chachin catahuainquën tata quëran panca pancana huaꞌanëntamasoꞌ,” itopi. Copirno Tapi chachionta pëꞌsaranënquë mónsho tahuaton, iso pochin Yosë chinotërin: “Ma noyanquëncha quëmasoꞌ Sinioro ninan paya. Quëmaso Yosënquën, israiroꞌsacoi chinotërainquën. Quëma nohuanton aꞌnara huiꞌnahuë camaitacaso marëꞌ yaꞌconin niꞌnahuë,” tënin, itërin Conatani.
49Ina natanahuatonaꞌ, Atoniasëri përarinsopitasoꞌ, paꞌyanpi. Napoatona aꞌnaroáchin yanquëpi. 50Atoniasënta Saromon tëꞌhuataton, Yosë caposonën yaꞌhuërinso nëꞌmëtë pëiquë chaꞌëcaso marëꞌ paꞌnin. Inaquë paꞌsahuaton artaro pomonënpitaquë matonin#1.50 Artaroquë oshanënpo marëꞌ maꞌsha ahuiquitohuatëra: Yosë oshanënpo inquitërinpoꞌ. Ina pochachin aꞌna piyapi artaro pomonënpitaquë matohuachina, tëhuërinsopitari co naꞌintarinhuëꞌ..
51Naporinso nicaton, aꞌnari Saromon shaꞌhuitapon paꞌnin:
—Sinioro copirno. Atoniasë tëꞌhuatërinquën. Napoaton artaro pomonënpitaquë matërin. Nanan aꞌpatatënquën naporin: “Ama ipora tëpaꞌincoso marëhuëꞌ, ‘Yoscoarëꞌ,’ taꞌton shaꞌhuichinco,” tënin, itërin. 52Napotohuachina Saromoni itapon:
—Noya nipachinsoꞌ, co manta onpotarahuëꞌ. Napoaponahuëꞌ, co noyahuëꞌ nininsoꞌ nitotohuato, chiminapon, tënin. 53Napotahuaton caraya huaꞌanoꞌsa artaro quëran chiꞌhuincacaiso marëꞌ camairin.
Ina quëran Atoniasësoꞌ, copirno pëinënquë paꞌnin. Inaquë nipachina, copirno Saromon notënanquë mónsho tahuaton mosharin. “Natëaranquën,” taꞌton naporin. Ina quëran copirnori yaꞌhuërinquë pacacaso camairin.
Currently Selected:
1 Reyes 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
