1 Corintios 15
15
Quisocristo nanpiantarinsoꞌ
1Yosë nanamën iyaroꞌsaꞌ, nani aꞌchintëranquëmaꞌ. “Noꞌtëquën nontërincoi,” taꞌtomaꞌ natëramaꞌ. Natëtomaꞌ, imamiataramaꞌ. Ina nanan chachin shaꞌhuitaantaranquëmaꞌ yonquicamaso marëꞌ. 2Ina natëmiatohuatamaꞌ, Yosë nichaꞌësarinquëmaꞌ. Aꞌnaquënso nipirinhuëꞌ: “Imarahuë,” taponaraihuëꞌ, topinan quëran napopi. Co cancanëna quëran natëpihuëꞌ. Inapitasoꞌ co nichaꞌësarinhuëꞌ.
3Yaꞌnan aꞌchintaponquëmaꞌ, Yosë anitotërincoso chachin shaꞌhuitëranquëmaꞌ: “Oshanënpoaꞌ inquitinpoaso marëꞌ Quisocristo chiminin,” itëranquëmaꞌ. Iráca Yosë quiricanën quëran ninorinso chachin chiminin. 4“Chiminpachina, paꞌpitopi huachi. Paꞌpitopirinahuëꞌ, cara tahuëri quëran nanpiantarin,” itëranquëmaꞌ. Quiricanënquë ninorinso chachin nanpiantarin: 5Nanpiantarahuaton, Pitro yaꞌnotërin. Caꞌtanoꞌsanënpitantaꞌ yaꞌnotërin. 6Ina quëran naꞌa imapisopita niyontonasoiꞌ, yaꞌnotaantarin. Aꞌnatërápo pasa naꞌcon niꞌpi. Ipora huantaꞌ nanpirapi. Caraíchin nani chiminpi. 7Santiacontaꞌ yaꞌnotërin. Naporahuaton, yaꞌipi aꞌchinacaso marëꞌ acorinsopita yaꞌnotaantarin. Ina quëran inápaquë panantarin.
8Piquëran huarëꞌ cantaꞌ niꞌnahuë. Anaꞌhuaya pochin nipirahuëꞌ, inápa quëran yaꞌnotimarinco. Naporo huarëꞌ imarahuë. 9Imapisopita aparisitërahuë niꞌton, co acoincosoꞌ yaꞌhuërinhuëꞌ, topirahuëꞌ. Paꞌpi co noyahuëꞌ cancantopirahuëꞌ, anoyacancantatonco, acorinco paato aꞌchinaꞌhuaso marëꞌ. 10Inaora nohuanton, Yosë catahuarinco. Co catahuarincohuëꞌ naporini, co mantaꞌ nanichitohuëꞌ. Catahuahuachincora, paꞌnahuë nanamën aꞌchinapo. Co topinan quëran catahuarincohuëꞌ. Casoꞌ naꞌcon naꞌcon Yosë marëꞌ sacatërahuë. Co carisoꞌ piyapiꞌsaꞌ anoyacancantërahuëꞌ. Yosë achinicancaninco aꞌchinaꞌhuaso marëꞌ. Ina catahuarinco niꞌton, aꞌchinpatëra naꞌa piyapiꞌsaꞌ imasapi. 11Yosë nanamën aꞌchintëranquëmaꞌ. Quisocristo caꞌtanoꞌsanënpitantaꞌ aꞌchinpi. Ina nanansáchin aꞌchintërainquëmaꞌ, natëramaꞌ.
Quisocristo imarëhuasopita nanpiantacasoꞌ yaꞌhuërinsoꞌ
12“Quisocristo nanpiantarin huachi,” itërainquëmaꞌ niꞌton, ¿onpoatomataꞌ aꞌnaquëmasoꞌ co noꞌtëquën yonquiramahuëꞌ? “Co Yosë ananpitaantarinpoahuëꞌ,” toconamaꞌ. 13Co nanpiantacasoꞌ yaꞌhuërinhuëꞌ naporini, co Quisocristo tërantaꞌ nanpiantaitonhuëꞌ. 14Co nanpiantarinhuëꞌ naporini, topinan quëran aꞌchinchitënquëmahuëꞌ. Canpitantaꞌ topinan quëran natëitomahuëꞌ. 15Co nanpiantarinhuëꞌ naporini, nani nonpinchitënquëmahuëꞌ. Nipirinhuëꞌ, co iyaroꞌsaꞌ nonpin nanan aꞌchintërainquëmahuëꞌ. “Yosëri chachin ananpitaantarin,” itohuatëinquëmara, noꞌtëquën nontërainquëmaꞌ. 16Co ananpitaantainpoasoꞌ yaꞌhuërinhuëꞌ naporini, co Quisocristo tërantaꞌ nanpiantaitonhuëꞌ. 17Co nanpiantarinhuëꞌ naporini, topinan quëran imaitërihuahuëꞌ, co oshanënpoaꞌ inquichitonpoahuëꞌ. 18Co nanpiantarinhuë naporini, aꞌnaquën imapisopita nani chiminpi niꞌton, parisitopiquë paꞌitonahuëꞌ. 19Isoroꞌpa marëáchin Quisocristo imarëhuaꞌ naporini, paꞌpi nosorochitërihuahuëꞌ.
20Nipirinhuëꞌ, Quisocristo tëhuënchachin nani nanpiantarin. Yaꞌnan cayarinsoꞌ sënarëso pochin inaꞌton nanpiantaton, nanpimiatarin. Ina quëran canpoantaꞌ chiminarihuarahuëꞌ, nanpiantarihuaꞌ. 21Atanꞌton co Yosë natëtonhuëꞌ, chiminin niꞌton, canpoantaꞌ chiminëhuaꞌ. Inapochachin Quisocristosoꞌ chiminaponahuëꞌ, nanpiantarin niꞌton, canpoantaꞌ nanpiantarihuaꞌ. 22Atan pochin cancantatëhuaꞌ, yaꞌipinpoaꞌ chiminëhuaꞌ. Napoaponahuëꞌ, Quisocristo imapatëhuaꞌ, yaꞌipinpoaꞌ ananpitaantarinpoaꞌ. 23Co napopináchin nanpiantarihuahuëꞌ. Quisocristoꞌton nanpiantarin. Aꞌna tahuëri oꞌmantahuachin, imarëhuasopitantaꞌ ananpitaantarinpoaꞌ. 24Ina quëran yaꞌipiya naniarin. Iporasoꞌ nisha nisha huaꞌanoꞌsaꞌ, copirnoroꞌsaꞌ, inapita chiníquën nanantatonaꞌ, camairinënpoaꞌ. Sopairoꞌsantaꞌ yacamairinënpoaꞌ. Quisocristo oꞌmantahuachin, yaꞌipiya minsëarin. Nani minsëhuachin, Tata Yosëíchin yaꞌipiya huaꞌanëntarinpoaꞌ. 25Ina nohuanton, Quisocristo chiníquën nanantarin. Yaꞌipi huaꞌanëntarin. Aꞌna tahuëri yaꞌipi inimicoroꞌsaꞌ minsëarin. 26Ina quëran huachi chimiriontaꞌ ayatarin. Ananpitaantahuachinpoaꞌ, chimirin minsëarin huachi. Co huachi chiminacasoꞌ yaꞌhuaponhuëꞌ. 27“Yosë nohuanton, yaꞌipiya minsëarin huachi,” tënin Yosë quiricanënquë. Napoaton Quisocristo yaꞌipiya huaꞌanëntarin. Tata Yosëíchin co huaꞌanëntarinhuëꞌ. Inari Quisocristo chiníquën nanan quëtërin. 28Ina nohuanton, Quisocristo yaꞌipiya minsëarin. Nani minsëhuachina, inantaꞌ Yosë huiꞌnin niꞌton, paꞌpin natëmiatarin. Naporo quëran huarëꞌ Yosëáchin yaꞌipiya huaꞌanëntomiatarin.
29¿Onpoatomataꞌ ipora huantaꞌ aꞌnaquëmaꞌ co natëyátëraramahuëꞌ? “Co Yosë ananpitaantarinpoahuëꞌ,” toconamaꞌ. Co noꞌtëquën yonquiramahuëꞌ. Aꞌnaquën chiminpisopita yonquiatonaꞌ, inapita yaꞌhuërënamën aporihuanpi. Co nanpiantacasoꞌ yaꞌhuërinhuëꞌ naporini, ¿maꞌmarëtaꞌ inapitantaꞌ napoꞌitonahuëꞌ? 30¿Maꞌmarëtaꞌ quiyantaꞌ parisitaporaihuëꞌ, aꞌchinárai? Nani tahuëri yaahuërinacoi. Co nanpiantahuatëhuahuëꞌ, topinan quëran parisitërai. 31Aꞌnaquën yatëparinaco. Nani tahuëri “Chiminapo nimara,” tënahuë. Tëhuënchachin noꞌtëquën nontëranquëmaꞌ. Quisocristo catahuarinco niꞌton, aꞌchintohuatënquëmara, noya imaramaꞌ. Ina marëꞌ nóya cancantërahuë. 32Ipisoquë aꞌchinahuëso marëꞌ chiníquën noꞌhuirinaco. Niꞌni pochin cancantatonaꞌ, yatëparinaco. Ahuantaporahuëꞌ, ¿maꞌtaꞌ ina marëꞌ canarahuë? Isoroꞌpaquëráchin yaꞌhuërëhuaꞌ naporini, co mantaꞌ canaitërihuahuëꞌ. Co nanpiantacasoꞌ yaꞌhuërinhuëꞌ naporini, co Yosë yonquicasoꞌ yaꞌhuëꞌitonhuëꞌ. “¡Huëcoꞌ coshatahuaꞌ. Huëcoꞌ oꞌoahuaꞌ. Co huaꞌquiya quëranhuëꞌ chiminarihuaꞌ niꞌton, capa cancantahuaꞌ!” topiso pochin nichitërihuahuëꞌ.
33Ama ina pochin yonquicosohuëꞌ. Niꞌcona aꞌnapita anishacancantochinënquëmaꞌ. “Co noyahuëꞌ nipisopitarëꞌquëmaꞌ nipayahuatamaꞌ, canpitantaꞌ nitapicancanaramaꞌ. Inapita nonanpatamaꞌ, co huachi noyápiachin cancantaramahuëꞌ,” topi iráca. Noꞌtëquën napopi. 34Noꞌtëquën yonquiatomaꞌ, noyasáchin nicoꞌ. Ama huachi tëhuëcosohuëꞌ. Aꞌnaquëmaꞌ co Yosë nohuichátëraramahuëꞌ. Ina yonquiatomaꞌ, tapanacamasoꞌ yaꞌhuërin, tënahuë.
Nasha nonënpoaꞌ quëtarinpoasoꞌ
35Aꞌnaquëmaꞌ yanitotëramaꞌ. “Chiminpatëhuaꞌ, ¿onporahuatëhuataꞌ nanpiantarihuaꞌ? ¿Onpopintaꞌ nonënpoaꞌ yaꞌhuëtaponpoasoꞌ?” tënamaꞌ. 36¡Co canpitasoꞌ nitoyonquiramahuëꞌ! Niꞌcochi. Yaꞌpirin shaꞌpatëra, yaꞌpirin chachinsoꞌ chimininso pochin ninin. Acopoꞌ yaꞌpiraꞌhuainso nipirinhuëꞌ, noya papotërin. 37Tricoraya yonquiaꞌahuaꞌ. Ina shaꞌpatamara, aipi noshinënsoꞌ co papotërinhuëꞌ. Yaꞌpiraꞌhuain papotohuachina, nisha yaꞌnorin huachi. 38Yosë nohuanton, maꞌsha papotërin. Nisha nisha yaꞌpirin shaꞌpatëra, nisha nisha papotërin. Co napopináchin papotërinhuëꞌ. Yosë nohuanton, naporin. 39Maꞌsharoꞌsantaꞌ nisha nisha noshatopi. Piyapinpoantaꞌ nonënpoaꞌ nisha. Ohuacaroꞌsaꞌ, inairaroꞌsaꞌ, samiroꞌsaꞌ, inapitantaꞌ nisha nisha noshatopi. Co napopináchin noshatërëhuahuëꞌ. Nisha nisha acorinpoaꞌ. 40Nisha nisha maꞌsha isoroꞌpaquë yaꞌhuërin. Inápaquë yaꞌhuëpisopitantaꞌ nisha nisha yaꞌnopi. Co napopináchin noyápiachin yaꞌnopihuëꞌ. 41Piꞌisoꞌ huënaráchin huënaráchin aꞌpinin. Yoquintaꞌ nisha aꞌpinin. Tayoraroꞌsantaꞌ nisha nisha aꞌpinpi. Co napopináchin aꞌpinpihuëꞌ.
42Inapochachin canpoantaꞌ nanpiantahuatëhuaꞌ, nisha yaꞌnoarihuaꞌ. Chiminpatëhuara, nonënpoaꞌ chanatopirinhuëꞌ, nanpiantahuatëhuaꞌ, nasha nonënpoaꞌ yaꞌhuëtarinpoaꞌ. Co onporontaꞌ chanatarinhuëꞌ. 43Iporasoꞌ nonënpoaꞌ co onpopinchin noyahuëꞌ. Chiminpatëhuaꞌ, paꞌpitarinënpoaꞌ. Aꞌna tahuërisoꞌ nipirinhuëꞌ, noyápiachin nonënpoaꞌ yaꞌhuëtarinpoaꞌ. Iporasoꞌ co chinipirëhuahuëꞌ. Nanpiantahuatëhuaꞌ, chiniarihuaꞌ. 44Isoroꞌpa marëáchin nonënpoaꞌ yaꞌhuëtërinpoaꞌ niꞌton, chiminëhuaꞌ. Paꞌpitopirinënpoahuëꞌ, ananpitaantahuachinpoaꞌ, nisha nonënpoaꞌ quëtarinpoaꞌ Yosëꞌpaꞌ yaꞌhuëcaso marëꞌ. Iporasoꞌ nonënpoaꞌ Yosë acotërinpoaꞌ isoroꞌpaquë yaꞌhuëcaso marëꞌ. Aꞌna tahuëriso nipirinhuëꞌ noya noya nonënpoaꞌ quëtarinpoaꞌ inápaquë yaꞌhuëcontacaso marëꞌ.
45Yosë quiricanënquë tapon: “Iráca Yosëri yaꞌnan quëmapi nininsoꞌ Atan itërin. Inasoꞌ nonën quëtërin isoroꞌpaquë nanpicaso marëꞌ,” tënin. Iporasoꞌ Quisocristontaꞌ Atan pochin nicaponahuëꞌ, Yosë chachin niꞌton, catahuarinpoaꞌ canpoantaꞌ Yosë pochin nanpicaso marëꞌ. 46Napoaponahuëꞌ, yaꞌnan nipon, nonënpoaꞌ quëtërinpoaꞌ isoroꞌpaquë nanpicaso marëꞌ. Ina piquëran nasha nonënpoantaꞌ quëtarinpoaꞌ inápaquë nanpimiatacaso marëꞌ. 47Atansoꞌ noꞌpa quëran ninin isoroꞌpaquë nanpicaso marëꞌ. Quisocristoso nipirinhuëꞌ Yosë yaꞌhuërin quëran oꞌmarin niꞌton, noya noya ninin. 48Yaꞌipi piyapinpoaꞌ Atan pochin nicatëhuaꞌ, ina nonën pochin yaꞌhuëtërinpoaꞌ. Napoaponahuëꞌ, Quisocristo imapatëhuaꞌ, aꞌna tahuëri ina nonën pochachin yaꞌhuëtarinpoaꞌ. 49Iporasoꞌ Atan pochin yaꞌnorëhuaꞌ. Aꞌna tahuëriso nipirinhuëꞌ Quisocristo pochin yaꞌnoarihuaꞌ.
50Nonënpoaꞌ ipora yaꞌhuëtërinpoasoꞌ co nanitërinhuëꞌ Yosë huaꞌanëntërinquë paacasoꞌ. Chiminpatëhuaꞌ, nonënpoaꞌ chanatarin, co yaꞌhuëmiatarinhuëꞌ. 51Noya natanco iyaroꞌsaꞌ. Naꞌa piyapiꞌsaꞌ co nitotopirinahuëꞌ, shaꞌhuitaranquëmaꞌ. Co yaꞌipi imarëhuasopita chiminarihuahuëꞌ. Napoaponahuëꞌ, Yosë nohuanton, yaꞌipi imarëhuasopita nisha yaꞌnoarihuaꞌ. 52Aꞌnanaya nisha nonënpoaꞌ yaꞌhuëtarinpoaꞌ. Oꞌmantacasoꞌ tahuëri nanihuachin, tronpita pihuirarin. Pihuihuachin, chiminpisopita nanpiantarapi. Quisocristo imapi niꞌton, ananpitaantarin huachi. Naporoꞌ yaꞌipi imarëhuasopita nisha nonënpoaꞌ yaꞌhuëtarinpoaꞌ. Co huachi chiminarihuahuëꞌ. 53Nonënpoaꞌ ipora yaꞌhuëtërinpoasoꞌ chanatarin. Aꞌna tahuëriso nipirinhuëꞌ nisha nonënpoaꞌ yaꞌhuëtohuachinpoaꞌ, co chanatarinhuëꞌ. Nasha aꞌmorëso pochin nisarihuaꞌ. Co huachi chiminarihuahuëꞌ. 54Nisha nonënpoaꞌ quëtohuachinpoaꞌ, nanpiantarihuaꞌ. Yosë quiricanën quëran ninoton, naporin: “Aꞌna tahuëri Yosëri chimirin minsëarin. Co huachi chiminacasoꞌ yaꞌhuaponhuëꞌ. 55¿Onporahuatontaꞌ chimirin minsëarinpoaꞌ? Co huachi nanitarinhuëꞌ. Yaꞌhuan quëtëhuachinpora chiminëso pochin chiminacasoꞌ yaꞌhuëpirinhuëꞌ, co huachi chiminacasoꞌ tëꞌhuatarihuahuëꞌ,” tënin. 56Yosë iráca pënëntërinsoꞌ co natëtatëhuahuëꞌ, oshahuanëhuaꞌ. Oshahuanëhuaꞌ niꞌton, chiminacasoꞌ yaꞌhuërin. 57Yaꞌhuëpirinhuëꞌ, ¡ma noyacha Tata Yosësoꞌ niꞌton, nichaꞌërinpoa paya! Ina nohuanton, Quisocristo yaꞌhuërëtërinpoaꞌ. Corosëquë chiminaton, sopai minsërin. Nanpiantarahuaton, chimiriontaꞌ minsërin. Ina marëꞌ: “Yosparinquën,” itahuaꞌ.
58Napoaton iyaroꞌsaꞌ chiníquën cancantocoꞌ. Nosororanquëmaꞌ niꞌton, pënënaranquëmaꞌ: Ama nisha nisha yonquicosohuëꞌ. Naporahuaton, paatomaꞌ aꞌnapita aꞌchintëraꞌpiacoꞌ. Sinioro catahuahuachinquëmaꞌ, co onporontaꞌ topinan quëran aꞌchinaramahuëꞌ. Aꞌchinpatamaꞌ, Yosëri nohuantërinsopita imasapi huachi.
Currently Selected:
1 Corintios 15: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.