1 Corintios 14
14
Nisha nisha nananquë nonpisoꞌ
1Napoaton iyaroꞌsaꞌ, noya ninosorocoꞌ. Ina quëran Yosë nontocoꞌ Ispirito Santo catahuainquëmaꞌ maꞌsona nohuantërinsoꞌ nicacamasoꞌ. Yosë nanamën shaꞌhuicasoꞌ naꞌcon naꞌcon nohuantocoꞌ. 2Aꞌnaquën Ispirito Santo nohuanton, nisha nananquë nonpiso pochin nonpi. Co natanchináchinhuëꞌ nonpi niꞌton, co piyapiꞌsaꞌ natanpihuëꞌ. Yosëíchin natanin. Yosëri ayonquirinsoꞌ nonsapirinahuëꞌ, co aꞌnapitari natanpihuëꞌ. 3Napoaponahuëꞌ, Yosë nanamën shaꞌhuitohuatëhuasoꞌ, noya nataninënpoaꞌ. Ina yonquihuachinaꞌ, noya noya imasapi. Shaꞌhuitohuatëhuaꞌ, achinicancanarihuaꞌ. Sëtopirinahuëꞌ, natanatënënpoaꞌ, chiníquën cancantapi. 4Nisha nananquë nonpiso pochin nonpachinaꞌ, inahuara Yosë yonquiatonaꞌ, chiníquën cancantapi. Nipirinhuëꞌ, Yosë nanamën shaꞌhuitohuachinënpoaꞌ, yaꞌipi imarëhuasopita natanpatëhuaꞌ, chini chiníquën cancantarihuaꞌ.
5Nisha nananquë pochin nonacasoꞌ noya nipirinhuëꞌ, Yosë nanamën shaꞌhuicasoꞌ noya noya, tënahuë. Ina naꞌcon naꞌcon Yosë nohuantërin. Nisha nananquë nonpachina, ina piquëran maꞌsona tapon naporinsoꞌ shaꞌhuichinënquëmaꞌ. Imaramasopita natanatomaꞌ, noya yonquicamaso marëꞌ shaꞌhuichinënquëmaꞌ. 6Yosë aꞌchintohuachincora, inachachin iyaroꞌsaꞌ shaꞌhuitëranquëmaꞌ. Ina anitotohuachincora, nanamën chachin aꞌchintëranquëmaꞌ. Inapotato, catahuaranquëmaꞌ noya noya imacamaso marëꞌ. Nisha nananquë nonpiso pochin nontëranquëmaꞌ naporini, co nataintomacohuëꞌ. Co ina quëran noya noya imaitomahuëꞌ. Canpita nananquë chachin noꞌtën nanan pënënpatënquëmaꞌ, tëhuënchachin catahuaranquëmaꞌ.
7Niꞌcoꞌ. Quina co noya pihuihuachinahuëꞌ, napoonin natanpi. Quitarantaꞌ co noya piꞌnihuachinahuëꞌ, napoonin natanpi. 8Tronpitantaꞌ nisha nisha pihuipi sontaroꞌsaꞌ nitotacaiso marëꞌ. Aꞌna tahuëri inimicoroꞌsaꞌ huëꞌpachinara, tronpita pihuipi sontaroꞌsaꞌ përacaiso marëꞌ. Co noꞌtëquën pihuihuachinahuëꞌ, co sontaroꞌsaꞌ niyontoanpihuëꞌ inimicoroꞌsaꞌ ahuëcaiso marëꞌ. 9Inapochachin canpitantaꞌ nisha nananquë nonpiso pochin nonpatamaꞌ, co natanarinënquëmahuëꞌ. Topinan quëran nonsaramaꞌ. 10Tëhuënchachin iyaroꞌsaꞌ nisha nisha nanan yaꞌhuërin. Nisha nisha piyapiꞌsaꞌ ninontacaiso marëꞌ yaꞌhuëpirinhuëꞌ, 11co nitotohuatëhuahuëꞌ, co natanarihuahuëꞌ. “Nisha piyapi niꞌton, nisha nananquë nonin,” tënëhuaꞌ. Co ninontacasoꞌ nanitarihuahuëꞌ. 12Naꞌcon nohuantëramaꞌ Ispirito Santo catahuainquëmasoꞌ. Nisha nisha nicacamasoꞌ nohuantëramaꞌ niꞌquëhuarëꞌ maꞌsona tërantaꞌ nipatamaꞌ, aꞌnapita imapisopita catahuacoꞌ noya noya cancantacaiso marëꞌ.
13Napoaton nisha nananquë nonpiso pochin yanonpatamaꞌ, Yosë nontocoꞌ maꞌsona tapon nonamasoꞌ nitotamaquë. Ina quëran nitotatomaꞌ, canpita nananquë chachin piyapiꞌsaꞌ shaꞌhuitocoꞌ. 14Nisha nananquë Yosë nontohuato, ispiritonëhuë quëran nontopirahuëꞌ, maꞌsona tapo naporahuësoꞌ co nitotërahuëꞌ. 15Napoahuarëꞌ, ¿onpocasota yaꞌhuërin? Ispiritonëhuë quëran Yosë nontarahuëꞌ, cantarahuë, napoarahuë. Napoaporahuëꞌ, maꞌsona tapo naporahuësontaꞌ yonquiato, Yosë nontarahuë, cantarahuë napoarahuë, tënahuë. 16Niyontonpatamaꞌ, aꞌnaquëmaꞌ Yosë chinotatomaꞌ, “Yosparinquën,” itohuachina, napopináchin yonquiatomaꞌ, “Amen,” tënamaꞌ. Napoaponahuëꞌ, nisha nananquë nonpiso pochin nontëramaꞌ naporini, aꞌnapitasoꞌ co nitotatonahuëꞌ, co “Amen” taꞌcaisoꞌ nanichitonahuëꞌ. 17Noya Yosë nontopiramahuëꞌ, aꞌnapitasoꞌ topinan quëran natanpi niꞌton, co catahuaramahuëꞌ. 18Cantaꞌ nisha nananquë nonpiso pochin nitononahuë. Canpita quëran naꞌcon naꞌcon nitotërahuë. Ina marëꞌ “Yosparinquën” itërahuë Yosë. 19Napoaponahuëꞌ, Yosë chinotacaso marëꞌ niyontonpatëhuaꞌ, aꞌchinacasoꞌ noya noya tënahuë. Nisha nananquë pochin nonato, shonca huaranca nanan nonahuë naporini, topinan quëran nointohuëꞌ. Canpoaꞌ nananquë cara nanaínchin tërantaꞌ nonpato, natanamaꞌ niꞌton, noya noya ninin, tënahuë.
20Canpitasoꞌ iyaroꞌsaꞌ chinotonoꞌsa pochin yonquicoꞌ. Ama huaꞌhuaroꞌsa pochin yonquicosohuëꞌ. Napoaponahuëꞌ, huaꞌhuaroꞌsa pochin noyápiachin cancantatomaꞌ, noyasáchin nicoꞌ. Inapitasoꞌ co yonquiyatërapihuëꞌ oshahuanacaisoꞌ. 21Yosë quiricanënquë iráca ninshitërin: “Cotioroꞌsaꞌ huaꞌquiꞌ pënënpirahuëꞌ, co yanatërinacohuëꞌ. Napoaton nisha piyapiꞌsaꞌ inaquë aꞌparahuë. Nisha nananquë nontapirinahuëntaꞌ, co natëarinacohuëꞌ,” tënin Yosë. 22Aꞌnaquën nisha nananquë nonpiso pochin nonpi. Co imapisopitasohuëꞌ ayonquicaiso marëꞌ napopi. “Yosë nohuanton, naporin,” taꞌtonaꞌ, yonquiaponaꞌ nimara. Imarëhuasopitaso nipirinhuëꞌ, canpoara nanamënpoaquë chachin Yosë nanamën shaꞌhuitohuachinënpoaꞌ, noya cancantarihuaꞌ: “Ma noyacha catahuarinpoa paya,” tarihuaꞌ. 23Yosë chinotacaso marëꞌ niyontonëhuaquë, aꞌnaquën co Yosë imanaꞌpiroꞌsahuëntaꞌ yaꞌconpi. Nisha nananquërachin nonpatamaꞌ, co natanatonaraihuëꞌ: “Huaꞌyantomaraiꞌ,” taponaꞌ. 24Nipirinhuëꞌ, Yosë nanamën aꞌchintohuatamaꞌ, co imarinsopitahuëntaꞌ noya natanapi. Pënëntërinsoꞌ natanahuatonaꞌ, yonquiapi: “Tëhuënchachin cantaꞌ co noyahuëꞌ nicato, oshahuanahuë,” tosapi. 25Cancanëna quëran yonquipisopita aꞌninquëchin shaꞌhuitapi niꞌton, ina yonquiatonaꞌ, oshanëna marëꞌ sëtapi. Isonahuatonaꞌ, Yosë chinotapi: “Tëhuënchachin Yosë catahuarinquëmaꞌ,” itarinënquëmaꞌ.
Niyontonpachinara Yosë chinotopisoꞌ
26Napoaton iyaroꞌsaꞌ niyontonpatamaꞌ, noyasáchin yonquicoꞌ. Aꞌnaquëmaꞌ cantaramaꞌ. Aꞌnaquëmaꞌ Yosë nanamën aꞌchinaramaꞌ. Aꞌnaquëmaꞌ Yosë anitotërinquëmasoꞌ shaꞌhuitaramaꞌ. Aꞌnaquëmantaꞌ nisha nananquë nonpiso pochin nonsaramaꞌ. Ina piquëran aꞌnaquëmasoꞌ maꞌsona tapon nonamasoꞌ canpita nananquë shaꞌhuitaramaꞌ. Maꞌsona tërantaꞌ nipatamaꞌ, nicatahuacoꞌ yaꞌipinquëmaꞌ noya noya imacamaso marëꞌ. 27Nisha nananquë pochin yanonpachinaꞌ, aꞌnaya aꞌnaya noinaꞌ. Catoyaꞌpihuë nipon, carayaꞌpihuë nipon, inaíchin noinaꞌ. Naporahuaton, aꞌnantaꞌ maꞌsona tapon noninsoꞌ shaꞌhuiin. 28Co insoari tërantaꞌ shaꞌhuitacasoꞌ nanitohuachinhuëꞌ, niyontonpiquë ama ina pochin noinasohuëꞌ. Ina pochin yanonpachin, inaora paaton, noin Yosëíchin natanacaso marëꞌ. 29Niyontonpatamaꞌ, catoya, caraya nimara Yosëri anitotërinsoꞌ shaꞌhuiinaꞌ. Aꞌnapitasoꞌ natainaꞌ. Noꞌtën nanan nipachin, noya natanatomaꞌ yonquicoꞌ noꞌtëquën natëcamaso marëꞌ. Yosë nanamënáchin imacasoꞌ yaꞌhuërin. 30Aꞌnantaꞌ inaquë huënsërinsoꞌ Yosëri nanan anitotohuachin, inantaꞌ shaꞌhuiin. Yashaꞌhuihuachin, yaꞌnan nonaꞌpi taꞌtaton, nataꞌin. 31Inapoatomaꞌ, aꞌnaya aꞌnayanquëmaꞌ pënëntocoꞌ. Yaꞌipinquëmaꞌ noya noya yonquicamaso marëꞌ nipënëncoꞌ. Napohuatamaꞌ, canpita capini niachinicancanaramaꞌ. 32Nipënënpatëhuaꞌ, aꞌnaya aꞌnayanpoaꞌ pënëntacasoꞌ yaꞌhuërin. Aꞌnaꞌton tonihuachin, aꞌnantaꞌ pënëntantaꞌin. Ina toniantahuachin, aꞌnantaꞌ pënëntantaꞌin. 33Yosësoꞌ co nisha nisha ayonquirinpoahuëꞌ. Catahuarinpoaꞌ sano cancantacasoꞌ. Niyontonëhuaquëntaꞌ catahuarinpoaꞌ aꞌnaya aꞌnayanpoaꞌ pënëntatëhuaꞌ noya Yosë chinotacaso marëꞌ.
Yaꞌipi Yosë imarëhuasopita nisha nisha niyontonëhuaquë, 34sanapiꞌsasoꞌ taꞌtatonaꞌ, natainaꞌ. Ama pënënchinasohuëꞌ. “Quëmapiꞌsaꞌ natëinaꞌ,” tënin Yosë pënëntërinquë. 35Maꞌsona yanitotohuachinaꞌ, pëinënaquë soꞌinaꞌ natainaꞌ. Yosë chinotacaso marëꞌ niyontonpatamaꞌ, sanapiꞌsasoꞌ co nonacaisoꞌ yaꞌhuërinhuëꞌ.
36Isontaꞌ yonquicoꞌ. Co canpitaꞌton Yosë nanamën nitotëramahuëꞌ. Naporahuaton, co canpitaráchin aꞌchintërainquëmahuëꞌ. 37Yosë nanamën chachin noꞌtëquën aꞌchintëranquëmaꞌ. Noꞌtëquën ninshitëranquëmaꞌ. Insosona yapënëntohuachin, natëinco. Ispirito Santo tëhuënchachin catahuahuachinquëmaꞌ, ina nanan chachin natëaramaꞌ. 38Nisha aꞌchintohuachinënquëmaꞌ, ama natëtocosohuëꞌ, tënahuë.
39Napoaton iyaroꞌsaꞌ, Yosë anitotërinquëmasoꞌ shaꞌhuicamasoꞌ naꞌcon naꞌcon nohuantocoꞌ. Aꞌnaquën nisha nananquë nonpiso pochin yanonpachina, tananpitocoꞌ noin. 40Nipirinhuëꞌ, ama noncarocosohuëꞌ. Aꞌnaya aꞌnayanquëmaꞌ noncoꞌ. Noyápiachin cancantatomaꞌ, Yosë yonquicoꞌ.
Currently Selected:
1 Corintios 14: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.