1 Corintios 16
16
Pahuantërinsopita catahuacasoꞌ yaꞌhuërinsoꞌ
1Aꞌnantaꞌ shaꞌhuichinquëmaꞌ, yonquicoꞌ. Aꞌnaquën imapisopita maꞌsha pahuantarin niꞌton, parisitapi. Inapita catahuacaso marëꞌ coriqui yaaꞌparamaꞌ. Carasiaquë imapisopitantaꞌ coriqui aꞌparapi. Inapita nani shaꞌhuitërahuë coriqui yontonacaiso marëꞌ. Inapochachin canpitantaꞌ shaꞌhuitaranquëmaꞌ. 2Nani Tomio tahuëri niyontonpatamaꞌ, coriqui acocoꞌ. Nanitëramasoꞌ acocoꞌ. Naꞌcon canahuatamaꞌ, naꞌcon quëtocoꞌ. Piꞌpian canahuatamaꞌ, piꞌpian quëtocoꞌ. Nani simana inapohuatamaꞌ, nicaponquëmaꞌ paꞌpato, coriqui yontonamasoꞌ quënanconarahuë. 3Aꞌnaquëmaꞌ noya niꞌnamasopita huayoncoꞌ coriqui quëpacaiso marëꞌ. Canconpato, quiricatarahuë huayonamasopita nohuitacaiso marëꞌ. Nani quiricatahuato, inarë chachin huayonamasopita aꞌpaarahuë. Quirosarinquë quëparapi pahuantërinsopita quëtacaiso marëꞌ. 4Nanitohuato, cantaꞌ paꞌsamaraco. Paꞌpatosoꞌ, napopináchin paꞌsarai.
Nicapon yapaꞌninsoꞌ
5Nicaponquëmaꞌ yapaꞌpirahuëꞌ, iporasoꞌ co nanitërahuëꞌ. Masitonia parti pacaꞌhuasoꞌ yaꞌhuërin. Nani niꞌtontahuato, yaꞌhuëramaquë paꞌsarahuë. 6Canpitataquë huaꞌquimiáchin yacaparanquëmaꞌ. Oꞌnapi tahuëri inaquë naꞌhuëanatapo nimara. Ina quëran catahuaramaco aꞌna parti pacaꞌhuasoꞌ, topirahuëꞌ. 7Co topinan niraponquëmahuëꞌ. Aꞌna tahuëri Yosë nohuantohuachin, huaꞌquiꞌ yacaparanquëmaꞌ. 8Iporaso nipirinhuëꞌ Ipisoquë yaꞌhuato, aꞌchinárahuë. Pinticostisë tahuëri huarëꞌ isëquë yaꞌhuapo. 9Yosë nohuanton, naꞌa piyapiꞌsaꞌ isëquë yaimapi niꞌton, aꞌchintárahuë. Aꞌnaquënsoꞌ noꞌhuipirinacohuëꞌ, pënëntárahuë. Naꞌamiachin imasapi.
10Iya Timotio cantonpachinquëmaꞌ, noya nontocoꞌ noya cancanchin. Ca pochachin inantaꞌ Yosë nanamën aꞌchinarin. 11Huiꞌnapi nipirinhuëꞌ, ama nocancosohuëꞌ, noya natancoꞌ. Noya nontatomaꞌ, catahuacoꞌ isëquë huënantaꞌin. Ina ninarahuë. Aꞌnapita iyaroꞌsarëꞌ canquimapon, tënahuë.
12Iya Aporosëntaꞌ shaꞌhuitopirahuëꞌ. “Iyaroꞌsaꞌ paꞌpachinaꞌ, quëmantaꞌ paquëꞌ,” itopirahuëꞌ, co ipora nohuantërinhuëꞌ. Nanitohuachin, nicaponquëmaꞌ paꞌsarin.
Tiquiapon pochin pënëninsoꞌ
13Ama huëꞌërëso pochin cancantatomarahuëꞌ, noya yonquicoꞌ. Yaꞌipi cancanëma quëran natëmiatocoꞌ. Maꞌsha onpoapomarahuëntaꞌ, chiníquën cancantocoꞌ. Niachinicancancoꞌ. 14Maꞌsona tërantaꞌ nipatamaꞌ, noya ninosoroatomaꞌ, nicoꞌ.
15Istipano saꞌinë chachin nohuitëramaꞌ. Iráca Acaya parti aꞌchinpatëra, inapitaꞌton Quisocristo imapi. Pëinënquë yaꞌhuëpisopitantaꞌ imasapi. Imatonaꞌ, naꞌcon catahuarinënquëmaꞌ. Yaꞌipi imapisopita catahuapi. 16Inapitasoꞌ noya natëcoꞌ, tënahuë. Aꞌnapitantaꞌ chiníquën catahuarinquëmaꞌ noya imacamaso marëꞌ. Insosona ina pochin aꞌchintohuachinquëmaꞌ, noya niꞌcoꞌ.
17Istipanasë, Portonato, Acaico, inapita isëquë cantihuachinacora, nóya cancantërahuë. Canpitasoꞌ aquë yaꞌhuatomaꞌ, co niꞌnamacohuëꞌ. Inapitasoꞌ yaꞌhuërama quëran huëcatonaꞌ, catahuarinaco. 18Noya nontatonaco, achinicancaninaco. Canpitantaꞌ achinicancaninënquëmaꞌ, tënahuë. Cancoantahuachinaꞌ, noya nicatomaꞌ, natancoꞌ.
19Yaꞌipi imapisopita Asia parti yaꞌhuëpisoꞌ yonquiatënquëmaꞌ, saludos aꞌpatarinënquëmaꞌ. Aquira saꞌinë chachin naꞌcon yonquiatënquëmaꞌ, saludos aꞌpatarinquëmaꞌ. Pëinënquë niyontonpisopitantaꞌ yonquirinënquëmaꞌ. Canpitantaꞌ Sinioro imaramaꞌ niꞌton, naꞌcon yonquirinënquëmaꞌ. 20Yaꞌipicoi saludos aꞌpatarainquëmaꞌ. Noya iyaroꞌsaꞌ yaꞌhuëcoꞌ, tënai. Noya ninosoroatomaꞌ, nisëꞌquëcoꞌ.
21Ca Paonoco naꞌcon yonquiranquëmaꞌ. Caora imirahuë quëran isoíchin ninshitaranquëmaꞌ.
22Insosona co Sinioro Quisocristo nosorohuachinhuëꞌ, Yosëri anaꞌinchin. ¡Aꞌnaroáchin Sinioro oꞌmantaquëꞌ! tënahuë.
23Inaora nohuanton, Sinioro Quisoso catahuainquëmaꞌ. 24Yaꞌipinquëmaꞌ Quisocristo imaramaꞌ niꞌton, nosororanquëmaꞌ. Nani ninshitëranquëma huachi.
Paono
Currently Selected:
1 Corintios 16: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.