1 Corintios 12

Ispirito Santo nisha nisha catahuarinpoasoꞌ

1Apira Ispirito Santo naporinsoꞌ iyaroꞌsaꞌ, aꞌchinchinquëmaꞌ noꞌtëquën nitotacamaso marëꞌ. Ina tëhuënchachin catahuarinpoaꞌ nohuantërinsoꞌ nicacasoꞌ. Aꞌnaya aꞌnayanpoaꞌ catahuarinpoaꞌ.

2Iráca co Yosë natëyatërapomahuëꞌ, nisha nisha yonquiatomaꞌ, mamanshi mosharamaꞌ. Co nanpiton natanpirinquëmahuëꞌ, sopai nohuanton, inapita chinotëramaꞌ. 3Iporahuantaꞌ aꞌnaquëni co noyahuëꞌ yonquirapitonaꞌ Quisocristo noꞌhuipi. Inapitasoꞌ co Ispirito Santo natëpihuëꞌ. Ispirito Santo yaꞌcoancantohuachinpoaꞌ, catahuarinpoaꞌ Quisocristo natëcasoꞌ. “Quisocristoíchin natërahuë. Inasoꞌ huaꞌanëntërinco,” tënëhuaꞌ. Ispirito Santo nohuanton, naporëhuaꞌ.

4Yosë acorinpoaꞌ nisha nisha nitotacaso marëꞌ. Ispirito Santo chachin catahuarinpoaꞌ noya nicacasoꞌ. 5Sinioro nohuanton, nisha nisha ninëhuaꞌ aꞌnapita catahuacaso marëꞌ. Nisha nisha nirihuarahuëꞌ, yaꞌipinpoaꞌ Sinioro natërëhuaꞌ. 6Aꞌnaya aꞌnayanpoaꞌ ananitërinpoaꞌ nisha nisha nicacaso marëꞌ. Yaꞌipinpoaꞌ Yosë chachin catahuarinpoaꞌ. 7Co canpoara nanitopirëhuahuëꞌ, Ispirito Santo ananitërinpoaꞌ maꞌsona ina nohuantërinsoꞌ nicacasoꞌ. Catahuarinpoaꞌ niꞌton, aꞌnapitantaꞌ catahuarihuaꞌ noya noya imacaiso marëꞌ. 8Ispirito Santo nohuanton, aꞌnaquën noyá nitotërin pënëntacasoꞌ. Noꞌtëquën yonquiaton, pënëntarin. Aꞌnaquëontaꞌ noya noya nitotaton, aꞌchinarin. 9Aꞌnaquëontaꞌ catahuarin chiníquën Yosë natëcaso marëꞌ. “Yosë yaꞌipiya nanitaparin,” taꞌton ina nontërin. Nontohuachina, Yosëri naꞌcon catahuarin. Aꞌnantaꞌ Ispirito Santori catahuarin caniaꞌpiroꞌsaꞌ anoyatacaso marëꞌ. 10Ispirito Santo nohuanton, aꞌnaquëontaꞌ nanitërin sacai nininsoꞌ nicacasoꞌ. Aꞌnaquën Yosë yonquirinso chachin cancanën quëran anitotërin aꞌnapita shaꞌhuitacaso marëꞌ. Aꞌnaquëontaꞌ Ispirito Santo nohuanton, macarisona catahuarinsoꞌ nitoninorin. Co Ispirito Santoachin yacatahuarinpoahuëꞌ. Sopairintaꞌ piyapiꞌsaꞌ catahuarin nonpintinpoaso marëꞌ. Napoaton aꞌnapita pënënpachinpoaꞌ, ninocasoꞌ yaꞌhuërin. Nonpin nanan nipachina, shaꞌhuitërinpoaꞌ ama natëcaso marëhuëꞌ. Aꞌnaquëontaꞌ Ispirito Santo nohuanton, nisha nananquë nonpiso pochin nonpi. Aꞌnapitantaꞌ catahuarin maꞌsona nisha nananquë topisoꞌ shaꞌhuicaisoꞌ. 11Yaꞌipi imarëhuasopita catahuarinpoaꞌ. Aꞌnaíchin Ispirito Santo niponahuëꞌ, catahuarinpoaꞌ nisha nisha nitotacasoꞌ. Inaora nohuantërinsoꞌ ananitërinpoaꞌ.

Aꞌna huëntona pochin ninëhuasoꞌ

12Nonënpoaꞌ aꞌnaíchin nipirinhuëꞌ, nisha nisha yaꞌhuëtërin. Yaꞌpiranpoaꞌ, nantënpoaꞌ, imiranpoaꞌ, inapita yaꞌhuëtërinpoaꞌ. Inapochachin Quisocristo imarëhuasopita nisha nisha nirihuarahuëꞌ, aꞌna huëntoínchin ninëhuaꞌ. Nonën pochin Quisocristo niꞌninpoaꞌ. 13Ispirito Santo chachin Quisocristo huëntonënquë ayaꞌconinpoaꞌ. Cotioroꞌsahuë nipon, nisha piyapiꞌsahuë nipon, napopináchin Yosë niꞌninpoaꞌ. Aꞌnaquëmaꞌ canpitaora marëꞌ sacatëramaꞌ. Aꞌnaquëmaꞌ nani tahuëri patronëmaꞌ asacatërinënquëmaꞌ. Nisha nishanpoaꞌ nipirihuahuëꞌ, Ispirito Santo catahuarinpoaꞌ. Quisocristo imarëhuaꞌ niꞌton, huëntonënquë ayaꞌconinpoaꞌ. Aporintohuachinënpoara, aꞌna huëntoínchin ninëhuaꞌ. Yaꞌipi imarëhuasopita Ispirito Santo yaꞌcoancantërinpoaꞌ.

14Nonënpoaꞌ aꞌnaíchin nipirinhuëꞌ, nisha nisha yaꞌhuëtërin. Nantënpoaꞌ, imiranpoaꞌ, yaꞌpiranpoaꞌ, inapita pochin nininsopita yaꞌhuëtërinpoaꞌ. 15Nantëhuë nontërinco naporini, “Casoꞌ co imirancohuëꞌ. Napoaton co nohuantancosoꞌ yaꞌhuërinhuëꞌ,” itërinco naporini, co noꞌtëquën nonchitoncohuëꞌ. Nantëhuëntaꞌ nohuantërahuë. 16Huëratëhuëntaꞌ nontërinco naporini, “Casoꞌ quëma huëratënco. Co yaꞌpirancohuëꞌ. Napoaton co nohuantancosoꞌ yaꞌhuërinhuëꞌ,” itërinco naporini, co noꞌtëquën nonchitoncohuëꞌ. Huëratëhuëntaꞌ nohuantërahuë. 17Yaꞌpiranpoáchin yaꞌhuërin naporini, ¿ma quërantaꞌ natanchitërihuahuëꞌ? Huëratënpoáchin yaꞌhuërin naporini, ¿ma quërantaꞌ imëchitërihuahuëꞌ? tënahuë. 18Yosëso nipirinhuëꞌ nisha nisha acotërinpoaꞌ. Ina nohuanton, imiranpoaꞌ, nantënpoaꞌ, yaꞌpiranpoaꞌ, inapita yaꞌhuëtërinpoaꞌ. Aꞌnaya aꞌnaya nohuantërinquë chachin acotërinpoaꞌ. 19Aꞌnaíchin yaꞌhuëtërinpoaꞌ naporini, co nonënpoaꞌ inaichitonhuëꞌ. Napoaton nisha nisha acotërinpoaꞌ. 20Nisha nisha yaꞌhuëtopirinpoahuëꞌ, aꞌnaíchin nonënpoaꞌ yaꞌhuërin.

21Isontaꞌ yonquicoꞌ. Yaꞌpirari imira nocanin naporini, “Quëmasoꞌ napoonan. Co nohuantëranquënhuëꞌ,” itërin naporini, co noꞌtëquën nonchitonhuëꞌ. Motënpoantaꞌ co nantënpoaꞌ nocanacasoꞌ yaꞌhuërinhuëꞌ. Yaꞌpiranpoaꞌ, imiranpoaꞌ, motënpoaꞌ, nantënpoaꞌ, yaꞌipi nohuantërëhuaꞌ. 22Niꞌcoꞌ. Ninopinënpoaꞌ, saꞌporonënpoaꞌ, inapita pochin nininsopita co aꞌninquëchin yaꞌnoponahuëꞌ, naꞌcon naꞌcon nohuantërëhuaꞌ nanpicaso marëꞌ. Inapitasoꞌ noya noya ananpirinpoaꞌ. Co inapita yaꞌhuëtërinpoahuëꞌ naporini, chimiintërihuahuëꞌ. 23Aꞌnaquën nonënpoaquë yaꞌhuërinsoꞌ co onpopinchin paꞌyatërëhuahuëꞌ. Nipirinhuëꞌ, inasoꞌ noya noya aꞌmotërëhuaꞌ. Taparonënpoapitantaꞌ noya imotërëhuaꞌ. 24Imiranpoaꞌ, yaꞌpiranpoaꞌ, inapita co imotërëhuahuëꞌ. Nisha nisha yaꞌhuëtopirinpoahuëꞌ, yaꞌipi nohuantërëhuaꞌ. Yosë nohuanton, co aꞌninquëchin nininsopitahuëꞌ naꞌcon naꞌcon yonquirëhuaꞌ. 25Nonënpoaꞌ aꞌnaíchin nipirinhuëꞌ, nisha nisha yaꞌhuëtërin. Co ninoꞌhuitonahuëꞌ, nicatahuapi. 26Maquënpoa tërantaꞌ iquin nipachina, yaꞌipi ninatanëꞌ. Inapochachin maquënpoa tërantaꞌ paꞌyatohuachinënpoaꞌ, yaꞌipi nonënpoaꞌ capa cancantërin.

27Canpoantaꞌ imarëhuaꞌ niꞌton, aꞌna huëntoínchin ninëhuaꞌ. Nonën pochin Quisocristo niꞌninpoaꞌ. Aꞌnaya aꞌnayanpoaꞌ nohuantërinpoaꞌ. 28Yosë nisha nisha acorinpoaꞌ imarëhuasopita capini nicatahuacaso marëꞌ. Quisocristo isoroꞌpaquë nipon, aꞌnaquën acorin paatonaꞌ nanamën aꞌchinacaiso marëꞌ. Inapitaꞌton Yosëri acorin. Ina quëran aꞌnapitantaꞌ acorin pënëntacaiso marëꞌ. Naporahuaton, aꞌnaquëontaꞌ acorin Quisocristo nanamën aꞌchinacaiso marëꞌ. Yosë nohuanton, aꞌnaquën sacaiꞌ nininsoꞌ nanitaparin. Aꞌnaquën acorin caniaꞌpiroꞌsaꞌ anoyatacaso marëꞌ. Aꞌnaquën acorin aꞌnapita catahuacaso marëꞌ. Aꞌnaquën acorin huaꞌan pochin nicacaso marëꞌ. Aꞌnaquën Yosë nohuanton, nisha nananquë nonpiso pochin nonin. 29Co yaꞌipinpoaꞌ acorinpoahuëꞌ paatëhuaꞌ aꞌchinacaso marëꞌ. Co yaꞌipinpoaꞌ nitopënëntërëhuahuëꞌ. Co yaꞌipinpoaꞌ Quisocristo nanamën aꞌchinacasoꞌ ananitërinpoahuëꞌ. Co yaꞌipinpoaꞌ sacaiꞌ nininsopita nanitaparëhuahuëꞌ. 30Co yaꞌipinpoaꞌ ananitërinpoahuëꞌ caniaꞌpiroꞌsaꞌ anoyatacasoꞌ. Co yaꞌipinpoaꞌ nisha nananquë nonëhuahuëꞌ. Nisha nanan natanpatëhuara, co yaꞌipinpoaꞌ nanitërëhuahuëꞌ maꞌsona tëninsoꞌ shaꞌhuicasoꞌ. Co yaꞌipinpoaꞌ inachachin nicacasoꞌ acorinpoahuëꞌ. Ispirito Santo nohuanton, nisha nisha ninëhuaꞌ. 31Yosë nontocoꞌ Ispirito Santo catahuainquëmaꞌ noya noya nininsopita nitotatomaꞌ aꞌnapita catahuacaso marëꞌ.

Ninosorocasoꞌ yaꞌhuërinsoꞌ

Napoaponahuëꞌ, piyapi nosorocasoꞌ noya nóya tënahuë. Ina aꞌchinchinquëmaꞌ.

Currently Selected:

1 Corintios 12: cbt

Highlight

Copy

Compare