1 Corintios 11

1Casoꞌ Quisocristo noya nonanahuë. Canpitantaꞌ nonanatomaco, noya nicoꞌ.

Sanapiꞌsaꞌ Yosë imapisopita

2Ma noyanquëmaꞌ iyaroꞌsaꞌ niꞌton, naꞌcon yonquiramaco. Yosë nanamën aꞌchintohuatënquëmara, noya natëramaco. 3Isontaꞌ iyaroꞌsaꞌ aꞌchinchinquëmaꞌ nitotocoꞌ. Co insontaꞌ inaora nohuanton yaꞌhuërinhuëꞌ. Tëhuënchachin natëcasoꞌ yaꞌhuërin, tënahuë. Sanapiꞌsasoꞌ soꞌinaꞌ natëinaꞌ. Quëmapiꞌsantaꞌ Quisocristo natëinaꞌ. Quisocristosoꞌ Tata Yosë natërin. 4Quëmapinpoaꞌ niyontonëhuaquë Yosë nontohuatëhuaꞌ, ama motënpoaꞌ niimomototahuasohuëꞌ. Niimomotohuatëhuaꞌ, co Quisocristo natërëhuahuëꞌ. Inapochachin pënëntohuatëhuaꞌ, ama niimomototahuasohuëꞌ. 5Canpitantaꞌ, imoyaroꞌsaꞌ, niyontonëhuaquë Yosë nontohuatamaꞌ, soꞌyamaꞌ natëtomaꞌ, niimomototocoꞌ. Yosë anitotërinquëmasoꞌ shaꞌhuihuatamantaꞌ, niimomototocoꞌ. Co niimomototohuatamahuëꞌ, noyá niyaꞌitopiso pochin yaꞌnoaramaꞌ. Ina pochin nipatamaꞌ, soꞌyamaꞌ atapanaramaꞌ. 6Niꞌcoꞌ. Sanapiꞌsaꞌ co quëmapiꞌsa pochin niyaꞌitopihuëꞌ. Yaꞌipi noyá niyaꞌitopi naporini, tapaintonahuëꞌ. Napoaton imoyaroꞌsaꞌ niimomototocoꞌ. 7Quëmapinpoaso nipirinhuëꞌ Yosë nontohuatëhuaꞌ, ama motënpoaꞌ niimomototahuasohuëꞌ. Yosë nininpoaꞌ ina pochin huaꞌanëntacaso marëꞌ. Inasáchin, iyaroꞌsaꞌ, natëhuatëhuaꞌ, nóya cancantarihuaꞌ. Ina marëꞌ acorinpoaꞌ. Inapochachin sanapiꞌsantaꞌ soꞌinaꞌ noya natëhuachinaꞌ, nóya cancantapi. 8Quëmapiꞌton Yosëri ninin. Ina quëran ahuëꞌëtahuaton, aꞌna nininpitëracaꞌ ocoitërin. Ina ocoitahuaton, ina quëran chachin sanapi ninin. 9Quëmapiꞌton ninin. Ina piquëran sanapi ninin soꞌin catahuacaso marëꞌ. 10Napoaton quëmapiꞌsaꞌ chini chiníquën nanantopi. Sanapiꞌsasoꞌ soꞌinaꞌ natëinaꞌ. Natëtonaꞌ, motënaꞌ niimomotochinaꞌ. Napohuachinaꞌ, soꞌinaꞌ natëpi niꞌton, anquëniroꞌsarintaꞌ noya niꞌsapi. 11Napoaponahuëꞌ, Yosë napopináchin nosororinpoaꞌ. Co quëmapiꞌsaráchin nohuantërinhuëꞌ. Sanapiꞌsantaꞌ nohuantërin. Quisocristo imapatëhuaꞌ, napopináchin niꞌninpoaꞌ. 12Yaꞌipinpoaꞌ Yosë nininpoaꞌ. Quëmapiꞌton nisahuaton, quëmapi nininpitën quëran sanapi ninin. Naporo quëran huarëꞌ quëmapinpoantaꞌ sanapiꞌsa quëran nasitërëhuaꞌ. Yosë nohuanton naporin.

13Iporasoꞌ iyaroꞌsaꞌ, imoyaroꞌsaꞌ, cancanëma quëran yonquicoꞌ noya nicacamaso marëꞌ. Niyontonpatamaꞌ, ¿noya ipora sanapiꞌsaꞌ co niimomototaponaraihuëꞌ Yosë nontacaisoꞌ to? 14Niꞌcoꞌ. Quëmapinpoaꞌ niyaꞌitërëhuaꞌ. Co ain aꞌpamacasoꞌ nohuantërëhuahuëꞌ. 15Sanapiꞌsaso nipirinhuëꞌ ainën aꞌpamapi. Aꞌpamahuachinara, noya yaꞌnopi. Yosëri naporopi ain quëtërin noyá niimomototacaiso marëꞌ. 16Aꞌnaquëmaꞌ nisha yonquihuatamaꞌ, isoíchin shaꞌhuitaranquëmaꞌ: Quiyasoꞌ co nisha nisha aꞌchinaihuëꞌ. Yaꞌipi parti imapisopitantaꞌ inachintopi.

Niyontonpachinara, aꞌnaquën co noyahuëꞌ nipisoꞌ

17Niyontonpatamaꞌ iyaroꞌsaꞌ, noya nicacasoꞌ yaꞌhuëpirinhuëꞌ, aꞌnaquëmaꞌ co noyahuëꞌ ninamaꞌ. Co ina marëꞌ noya niꞌnanquëmahuëꞌ. Napoaton pënënaranquëmaꞌ. 18Yosë chinotacaso marëꞌ niyontonpatamara, aꞌna huënton aꞌna huënton nicatomaꞌ, ninoꞌhuiramaꞌ, natantërahuë. Noꞌtëquën shaꞌhuitërinaco, topirahuëꞌ. 19Co yaꞌipi cancanëma quëran imapatamahuëꞌ, nisha nisha yonquiaramaꞌ. Co napopináchin yonquiaramahuëꞌ. Ina quëran Yosë cancanën manëhuasopita nohuitërinënpoaꞌ. Co yaꞌipinpoaꞌ nisha nisha yonquirëhuahuëꞌ. Aꞌnapitaso nipirinhuëꞌ co noya yonquiatonahuëꞌ, co noꞌtëquën imapihuëꞌ. 20Quisocristo yonquicaso marëꞌ niyontonatomaꞌ, coshatapomarahuëꞌ, co tëhuënchachin chimininsoꞌ yonquiramahuëꞌ. 21Aꞌnaquëmaꞌ co ninosoroatomahuëꞌ, niapiratëramaꞌ. Aꞌnaroáchin canpitaora cosharonëmaꞌ caꞌnamaꞌ. Co nipatomatëramahuëꞌ. Inapotohuatamara, aꞌnaquën tanapi. Aꞌnaquënso nipirinhuëꞌ naꞌcon oꞌotonaꞌ, noꞌpipi. Napoatomaꞌ, co nanitëramahuëꞌ Quisocristo chimininsoꞌ yonquiatomaꞌ coshatacamasoꞌ. 22¿Coꞌna pëinëmaꞌ yaꞌhuëtërinquëmahuëꞌ inaquë coshatamasoꞌ, oꞌocamasoꞌ? ¿Onpoatontaꞌ corto pëiquë chachin pahuantërinsopita atapanaramaꞌ? ¿Maꞌtaꞌ ina marëꞌ ichinquëmaꞌ? Co ina marëꞌ noya niꞌnanquëmahuëꞌ.

Quisocristo chimininsoꞌ yonquiatëhuaꞌ, caꞌnëhuasoꞌ

(Mateo 26.26-29; Marcos 14.22-25; Lucas 22.14-20)

23Sinioro shaꞌhuitërincoso chachin nani shaꞌhuitëranquëmaꞌ. Iráca Cotasëri Quisocristo shaꞌhuirapirin. Sontaroꞌsari yamapachinara, naporoꞌ tashiꞌ caꞌtanoꞌsanënpitarëꞌ coshatopi. Cosharoꞌ masahuaton, 24“Yosparinquën Tata Yosë,” itahuaton, sëꞌpanin. Sëꞌpanahuaton, aꞌnaya aꞌnaya quëtërin. “Ca nonëhuë pochin isoꞌ. Caꞌcoꞌ. Canpita marëꞌ chiminarahuë. Niyontonpatamaꞌ, chiminahuësoꞌ yonquiatomaco, piꞌpian cosharoꞌ caꞌcoꞌ,” itërin. 25Nani coshatohuachinara, minëaꞌhua manin. “Huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë niꞌton, anoyacancantaranquëmaꞌ. Ca yonquiatomaco, oꞌocoꞌ. Ipora quëran huarëꞌ inapoatomaꞌ, yonquico,” itërin Quisosori. 26Onporosona cosharoꞌ ina nonën pochin nininsoꞌ caꞌpatamaꞌ, huënainën pochin nininsontaꞌ oꞌopatamaꞌ, Quisoso chimininsoꞌ aꞌnapita anitotaramaꞌ. Sinioro oꞌmantaquë huarëꞌ inapoaramaꞌ.

Onpopinsona Quisoso chimininsoꞌ yonquicasoꞌ yaꞌhuërin

27Ina marëꞌ niyontonpatamaꞌ, ama topinan quëran caꞌcosohuëꞌ. Ama nisha nisha yonquiatomaꞌ, oꞌocosohuëꞌ. Co Sinioro nonën, huënainën inapita noya yonquihuatamahuëꞌ, oshahuanaramaꞌ. 28Napoaton canpitaora yonquinëma quëran noꞌtëquën yonquicoꞌ. Piꞌpisha tërantaꞌ co noyahuëꞌ yonquihuatamaꞌ, naniantocoꞌ. Noyapiachinsáchin cancantatomaꞌ, caꞌcoꞌ, oꞌocoꞌ. 29Quisoso chimininsoꞌ noꞌtëquën yonquicasoꞌ yaꞌhuërin. Topinan quëran caꞌpatamaꞌ, topinan quëran oꞌopatamaꞌ, naꞌcon oshahuanaramaꞌ. Ina marëꞌ Yosë anaꞌintarinquëmaꞌ. 30Napoaton naꞌanquëmaꞌ canioramaꞌ. Aꞌnaquëmantaꞌ co chiniramahuëꞌ. Aꞌnaquënsoꞌ ina marëꞌ chiminin. 31Yaꞌipi cancanënpoa quëran huarëꞌ nitantiacasoꞌ yaꞌhuërin niꞌton, yonquiaꞌahuaꞌ. Co noyahuëꞌ yonquirëhuasopita naniantohuatëhuaꞌ, co Yosë anaꞌintarinpoahuëꞌ. 32Aꞌna tahuëri oshahuanoꞌsaꞌ anaꞌintomiatarin. Imarëhuasopitaso nipirinhuëꞌ, ipora chachin piꞌpian anaꞌintarinpoaꞌ noya noya yonquicaso marëꞌ. Ina quëran ayaroꞌ tahuëri co anaꞌintomiatarinpoahuëꞌ.

33Napoaton iyaroꞌsaꞌ noyápiachin cancantatomaꞌ, Quisocristo chimininsoꞌ yonquicaso marëꞌ niyontoncoꞌ. Ina marëꞌ niyontonpatamaꞌ, ama aꞌnaroáchin caꞌcosohuëꞌ. Nininacoꞌ. Yaꞌipi nanihuatamaꞌ, napopináchin caꞌcoꞌ. 34Aꞌnaquën tanahuachinaꞌ, inahuara pëinënaquë coshachinaꞌ. Ina quëran noya niyontonpatamaꞌ, co Yosë anaꞌintarinquëmahuëꞌ. Aꞌna tahuëri paꞌsarahuë nicaponquëmaꞌ. Naporoꞌ naꞌcon naꞌcon aꞌchinchinquëmaꞌ.

Currently Selected:

1 Corintios 11: cbt

Highlight

Copy

Compare