Ro 8

Li yu'am sa' xk'ab'a' li Musiq'ej

1Jo'kan utan, maak'a' chik tojb'amaak sa' xb'eeneb' li wankeb' rik'in li Kristo Jesus. 2Xb'aan naq li xchaq'rab' li Musiq'ej li nak'ehok yu'am sa' xk'ab'a' li Kristo Jesus xatrach'ab' chiru xchaq'rab' li maak ut li kamk. 3Naraj naxye, li k'aru ch'a'aj xb'aanunkil chiru xChaq'rab' laj Moisés xb'aan naq na'aaleek li tz'ejwalej, a'an li ki'uxk xb'aan li Yos: kixtaqla chaq li Ralal jo' qech winqilal na'aaleek, ut a'an kixk'am qach'och'el qasululel, re risinkil li maak. Chi jo'kan li Yos kixraq aatin sa' xb'een li maak 4re naq naru tqab'aanu chixjunil li qataqlankil xb'aan li Chaq'rab', xb'aan naq ink'a' chik wanko jo' naraj li tz'ejwalej, jo' b'an naraj li Musiq'ej.

5Relik chi yaal naq eb' li wankeb' jo' naraj li tz'ejwalej, a' li k'a'aq re ru re li tz'ejwalej neke'xrahi; a'ut li wankeb' jo' naraj li musiq'ej, a' li naraj li musiq'ej neke'xrahi. 6Wi naqataaqe li k'a' re ru naxrahi li tz'ejwalej, a' li kamk toxooraqe'q wi'; ab'an wi naqataaqe li naxrahi li musiq'ej, tqataw li yu'amej ut li tuqtuukil usilal. 7Li nak'amok wi' li xrahinkil li naraj li tz'ejwalej, a'an wank sa' xiik'ilal rik'in li Yos: li tz'ejwalej ink'a' naxk'e rib' rub'el xwankil xchaq'rab' li Yos, chi moko taaruuq aj ta wi'; 8ut eb' li wankeb' sa' rajom li tz'ejwalej, ink'a' naru taasaho'q xch'ool li Yos rik'ineb'.

9Ab'anan laa'ex moko wankex ta chik sa' li naraj li tz'ejwalej, sa' b'an li naraj li musiq'ej, xb'aan naq li xMusiq' li Yos wank eerik'in. Ani maak'a' li xMusiq' li Kriist rik'in, a'an moko re ta li Kriist. 10Ab'an wi li Kriist wank eerik'in, us ta kamenaq chik leetz'ejwal xb'aan li maak, yo'yo leemusiq' xb'aan naq tiikob'resinb'il leech'ool. 11Ut wi wank eerik'in li xMusiq' li Yos li kiwaklesink re chi yo'yo li Jesus sa' xyanqeb' li kamenaq, a' ajwi' li kiwaklesink re li Kriist chi yo'yo taak'ehoq xyu'am leech'och'el leesululel sa' xk'ab'a' li xMusiq' wank eerik'in.

12Jo'kan utan, ex was wiitz'in, moowank jo' naraj li tz'ejwalej, xb'aan naq maak'a'o rub'el xwankil: 13wi texwanq jo' naraj li tz'ejwalej, texkamq; ab'an wi rik'in xk'anjel li Musiq'ej teek'e chi kamk li xb'aanuhom li tz'ejwalej, taawanq eeyu'am.

Ralal xk'ajolo li Yos sa' xk'ab'a' li Musiq'ej

14Chixjunileb' li b'eresinb'ileb' xb'aan li xMusiq' li Yos, a'aneb' ralal xk'ajol li Yos. 15Ut laa'ex moko xemaatani ta junaq musiq'ej nak'ehok eere chi moosil re naq wanqex wi' chik sa' leexiw; xemaatani b'an li Musiq'ej nak'ehok eere chi alalb'ej k'ajolb'ejil, a' li nokooruuk wi' chi xyeeb'al chi kaw: “Abbá”, naraj naxye: “At inYuwa'”.#8,15 Cf. Mk 14,36; Gal 4,6. 16A' ajwi' li Musiq'ej rochb'een li qaanm naxch'olob' xyaalal naq ralalo li Yos. 17Ut wi laa'o li alal k'ajolb'ej, too'eechaninq ajwi' maatan, taaqeechani xyeechi'om li Yos, sum'eechaninelaqo qochb'een li Kriist, xb'aan naq qochb'een A'an naqak'ul rahilal re naq qochb'een ajwi' A'an taanimaaq qaloq'al.

Li xnimal qaloq'al chaalel chaq

18Laa'in nink'oxla naq moko naru ta xjuntaq'eetankil li rahilal yooko chi xk'ulb'al anaqwan rik'in li xnimal loq'al taak'utb'esimanq qik'in. 19Jo'ch'inal jo'nimal li wank junsut junrub'el choxa q'axal yo chi xrahinkil ut xyo'oninkil naq taak'utb'esimanq chi yaal naq laa'o ralal xk'ajol li Yos. 20Chixjunil li ruuchich'och' kiq'axtesiik rub'el xwankil li jo'maajo'il na'leb', moko rik'in ta naq kiraj xch'ool, rajom b'an li kiq'axtesink re.#8,20 Naraj naxye: rajom li winq aj maak. Wan ajwi' neke'yehok naq a'an rajom li Yos. Ab'an wank royb'enihom: 21naq taa'ach'ab'aaq chiru xwankil li q'aak ut toxtaw li wank chi ach'ab'anb'il, a' li xnimal xloq'al eb' li ralal xk'ajol li Yos.

22Naqanaw naq chixjunil li wank junsut junrub'el choxa na'ayaynak chaq ut wank sa' rahilal jo' jun li ixq ok re chi alank. 23Laa'o ajwi' li qak'ulum li xb'een ru li Musiq'ej nokoo'ayaynak sa' li qach'ool, naq yooko chi xyo'oninkil naq li Yos tooxk'ul jo' tz'aqal ralal xk'ajol ut taakole'q li qach'och'el qasululel. 24Yaal ajwi' naq ak kolb'ilo, ab'anan ka'ajwi' rik'in oyb'enink; ut li qoyb'enihom, wi na'ilmank ru, moko oyb'eniik ta chik naraj, xb'aan naq ani tab'i' naroyb'eni li k'aru na'ilmank ru? 25Ab'an wi li qoyb'enihom ink'a' naqil ru, a'an q'axal naqayo'oni rik'in xnimal qakuyum.

26Jo'wi' anchal li Musiq'ej nakoloxtenq'a sa' xmajelal li qana'leb', xb'aan naq ink'a' naqanaw chan tz'aqal ru tootijoq. Ab'an a' ajwi' li Musiq'ej natz'aamank chiqix rik'in jiq'ok ch'ool li ink'a' naru xyeeb'al yal rik'in aatin. 27Ut li Yos, li ch'olch'o chiru k'aru wank sa' ch'oolej, naxnaw k'aru xk'a'uxl li Musiq'ej, xb'aan naq li Musiq'ej natijok chirixeb' laj santil paab'anel jo' chanru naraj li Yos.

Wanko rub'el xrahom li Yos

28Naqanaw ajwi' naq li Yos na'okenk re naq chixjunil taakanaaq cho'q usilal cho'q reheb' li neke'rahok re, a' li b'oqb'ileb' jo' chanru rajom li xch'ool. 29Xb'aan naq eb' li kixnaweb' ru ut kixraheb' chi junxilaj, kixxaqab'eb' ajwi' chi xjalam'uuchinkil li Ralal, re naq a'anaq asb'ej sa' xyanqeb' xk'ihaleb' li riitz'in. 30Ut eb' li kixxaqab'eb' chaq, eb' a'an kixtiikob'resiheb' chaq xch'ool; ut eb' li kixtiikob'resiheb' xch'ool, kixk'eheb' ajwi' xloq'al.

31K'aru tqaye chirix a'an? Wi li Yos na'okenk chiqix, ani truuq twanq sa' xiik'ilal qik'in? 32Li Yos ink'a' kiril xtoq'ob'aal ru li Ralal, kixq'axtesi b'an sa' qak'ab'a' chiqajunilo. Jo'kan wi kixk'e li Ralal, k'a' ta naq ink'a' tixsi ajwi' qe chixjunil? 33Ani taajitoq reheb' li sik'b'ileb' ru xb'aan li Yos? Ma li Yos li natiikob'resink ch'oolej? 34Ani taak'ehoq sa' tojb'amaak? Ma li Kristo Jesus li kikamk, ab'an kiwakliik wi' chik chi yo'yo? Anaqwan a'an wank sa' xnim uq' li Yos ut na'aatinak chaq chiqix. 35Ani taajachoq qe rik'in li xrahom li Kriist? Ma li rahilal, li ch'a'ajkilal, li rahob'tesiik, li we'ej, li t'usam, li xiik'ilal malaj li kamsiik? 36Tz'iib'anb'il sa' li Santil Hu:

“Sa' aak'ab'a' laa'at nokook'ehe'k chi kamk rajlal kutan,

chanchano eb' li karneer re kamsiik”.#8,36 Sal 44,23.

37Ab'an chixjunil a'in naqaq'ax ru chi chaab'il sa' xk'ab'a' Li kirahok qe. 38Laa'in ninnaw naq chi moko li kamk malaj li yu'am, chi moko eb' li ánjel malaj li neke'awab'ejink sa' choxa, chi moko li k'a' re ru wank anaqwan malaj li toj chaalel, chi moko li wankeb' xwankil, 39jo'wi' li wankeb' taqe'q ut taq'a, tik maak'a' naru taajachoq qe rik'in li xrahom li Yos li wank rik'in li Kristo Jesus, li Qaawa'.

Currently Selected:

Ro 8: QQC

Highlight

Compare

Copy