Sal 94
94
SAALM 94 (93)
Li Qaawa' naxb'aanu li tiikilal
1Xaqlin, at Qaawa', laa'at aj eeqajunel,
laa'at li Yos li nakaweeqajuni li ink'a' us.
2Chak'ut chaq laawankil,
laa'at aj raqol aatin sa' xb'een li ruuchich'och',
ut chak'e chi xtojb'aleb' xmaak eb' li q'etq'et!
3Jo' najtil chik te'saho'q sa' xch'ool li ink'a' useb' xna'leb'?
Jo' najtil chik te'numtaaq sa' qab'een, at Qaawa'?
4Neke'choqoqnak, junes yib' aj aatin neke'xye;
k'ajo' naq neke'xnimob'resi rib'
chixjunileb' laj b'aanuhom maa'usilal.
5A' laatenamit neke'xrahob'tesi, at Qaawa',
ut neke'xjuk' xwankil li sik'b'ileb' ru aab'aan.
6Neke'xkamsi li xmalka'an ut laj ab'l tenamit;
neke'xtoq xkux li neb'a'yox.
7Neke'xyehatq: “Maak'a' naril li Qaawa',
li xYos laj Jakob ink'a' naxk'e reetal”.
8K'ehomaq reetal, ex tenamit li maak'a' eena'leb';
ex jip, toj jo'q'e teetaw xyaalal?
9Ma maak'a' trab'i li xyiib'ank re li xikej?
Ma maak'a' tril li xyiib'ank re xsa' li uhej?
10Li naq'usuk reheb' li tenamit,
ma ink'a' tixk'eheb' chi xtojb'al xmaakeb'?
Ma ink'a' tixnaw chixjunil,
li nak'ehok xna'leb' li poyanam?
11Li Qaawa' naxnaw xk'a'uxl li poyanam,
naxnaw naq a'an yal maak'a' na'ok wi'.#94,11 1 Ko 3,20.
12Us xaq re li nakak'e xna'leb', at Qaawa',
ut nakatzol rik'in laachaq'rab':
13taawanq sa' tuqtuukilal sa' xq'ehil li rahilal,
a'ut li ink'a' useb' xch'ool taab'ekmanq xjuleb'.
14Xb'aan naq li Qaawa' ink'a' tixtz'eqtaana li xtenamit,
chi moko tixkanab' xjunes li reechanihom.
15Taaraqmanq wi' chik aatin sa' tiikilal,
ut chixjunileb' li tiikeb' xch'ool te'saho'q rik'in li yaal.
16Ani taakoloq we sa' ruq'eb' li ink'a' useb' xna'leb'?
Ani taa'okenq chiwix chiruheb' laj b'aanuhom maa'usilal?
17Wi ta li Qaawa' ink'a' xinxtenq'a,
ak raj wankin sa' xyanqeb' li kamenaq.
18Rajlal naq xinye: “Ok we chi tichk'ok”,
a' chik laawusilal xkuutunk we, at Qaawa'.
19Naq numtajenaq namayok sa' inch'ool,
laa'at nakak'ojob' ut nakasahob'resi li waanm.
20Ma aakomoneb' tab'i' li neke'raqok aatin sa' b'alaq'il,
eb' li neke'muxuk re li chaq'rab' rik'in rahob'tesink?
21Neke'raj xkamsinkil li tiik xch'ool
ut neke'xteneb' li kamk sa' xb'eeneb' li maak'a'eb' xmaak.
22A'ut li Qaawa' ninkol wi' wib',
linYos a'an li saqoonak li ninmuhenk wi'.
23A'an taak'ehoq chi xtojb'aleb' xmaak eb' laj b'aanuhom maa'usilal,
tixsach ruheb' li yib'ru xna'leb'eb'.
Li Qaawa' li qaYos tixjuk'eb' xwankil chi junajwa.
Currently Selected:
Sal 94: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
