Sal 109
109
SAALM 109 (108)
Xyaab'ankil xk'ab'a' li Qaawa' aj eeqajunel
1Re li xjolomileb' laj b'ichanel. Xsaalm laj David.
At inYos li ninloq'oni, maatz'apxiki aawib',
2xb'aan naq li ink'a' us xna'leb' ut laj b'alaq'
xe'ok chi aatinak chiwix:
junes sa' tik'ti' neke'aatinak wik'in,
3xik' nikine'ril ut nikine'xsut rik'in b'alaq'il aatin,
nikine'xpleeti chi maak'a' inmaak.
4Jo' reeqaj linrahom, k'ajo' naq nikine'xjit;
ab'an laa'in junes tijok ninb'aanu.
5Li usilal ninb'aanu naq'ajkamuuk rik'in maa'usilal,
ut xik' nikine'ril xb'aan naq ninrahok.
6Neke'xye chiwix:
“Chixaqab'aaq junaq ink'a' us xna'leb' li taaq'ab'anq re,
chiwanq junaq aj jitonel chi xk'atq.
7Chiyeemanq sa' li raqb'a aatin naq wank xmaak,
ut a' ajwi' li xtij chik'eemanq cho'q maak.
8Chikamq ta chi junpaat
ut jalan ta chik chik'uluq re li xk'anjel;#109,8 Hch 1,20.
9che'kanaaq ta chi neb'a'yox eb' li ralal xk'ajol
ut li rixaqil chikanaaq ta chi xmalka'anil.
10Che'xb'eeni ta rib' chi lemooxnik li ralal xk'ajol
ut che'isiiq ta sa' li xpo'lemil ochocheb'.
11A' ta li nato'onink tumin chireechani jo'ch'inal jo'nimal li wank re,
ut eb' laj ab'l poyanam che'relq'a ta chixjunil li naruuchin li xk'anjel.
12Maajun ta chitoq'ob'anq ru,
ut maa'ani ta chi'uxtaananq ruheb' li xneb'a'yox.
13Che'oso'q ta chi junajwa eb' li ralal xk'ajol;
che'sache'q ta li xk'ab'a'eb' sa'eb' li kutan chalkeb' re.
14Chijultikamanq chiru li Qaawa' li xmaak li xna' xyuwa',
ut ink'a' chisachmanq li k'aru kimaakob'k wi' li xna'.
15Junelik ta chiwanq sa' xch'ool li Qaawa' chixjunil a'an
re naq chixsach li xk'ab'a'eb' sa' ruuchich'och'.
16Xb'aan naq ink'a' kinaqk sa' xch'ool li uxtaanank u,
kixrahob'tesi b'an li neb'a', li toq'ob'aal ru,
jo'wi' li jwal ra sa' xch'ool, re xkamsinkileb'.
17Kixra ru li majewank: chikanaaq sa' xb'een a'an;
ink'a' kiraj li osob'tesiik: mi'osob'tesiik ajwi' a'an.
18Kixtiqib' rib' rik'in maa'usilank jo' junaq xb'atb'al rib':
a' ta li majewank chi'ok sa' chixjunil li xtz'ejwal jo' naq na'ok li ha';
kama'aq li aseeyt naq chiwulaq toj sa' li xsulutzil li xb'aqel.
19Chiwanq ta li maa'usilal chi xb'een jo' xb'aatal,
jo' xk'aamal xsa' li b'ak'b'ooq wi' junelik!”.
20Jo'ka'in nikine'xjit chiru li Qaawa'
eb' li neke'yoob'ank xik' aj aatin chiwix.
21Ab'anan chinaatenq'a, at Qaawa', at inYos;
chinaakol taxaq xb'aan xnimal laarahom.
22Q'axal neb'a'in ut jwal toq'ob' wu,
ut numtajenaq nayot'nak linch'ool.
23Kama' nanume'k li q'oqyink,
jo'kan naq yo chi oso'k li waanm;
xine'xchiq'chiq'i kama' na'uxk re junaq aj saak'.#109,23 Job 8,9; 14,2; Sal 39,6-7; 102,12.
24Yal nab'ase'k aj chik li xb'enwaq xb'aan li kuyuk sa';
maak'a' chik lintib'el ut b'aqin aj chik.
25Hob'etalin aj chik xb'aaneb' a'an;
nikine'xka'ya ut neke'xb'anb'ani li xjolomeb'.#109,25 Mt 27,39; Mk 15,29.
26At Qaawa', at inYos, chinaatenq'a taxaq
ut chinaakol sa' xk'ab'a' xnimal laawuxtaan!
27Che'xk'ehaq reetal naq arin wank laawuq',
naq laa'at, at Qaawa', xatb'aanunk re a'in.
28Xmajewaaqineb' a'an, a'ut laa'at nikinaawosob'tesi.
Wi te'xkut rib' sa' inb'een, xutaanal te'kanaaq wi';
ab'an q'axal taasaho'q linch'ool laa'in aj k'anjel chawu.
29Eb' li neke'jitok we che'sachq ta xch'ool
ut che'kanaaq sa' xutaan chi junajwa.
30Tinb'anyoxinq chiru li Qaawa' chi anchal li waanm,
tinloq'oni li xk'ab'a' sa' xyanqeb' li k'iila tenamit,
31xb'aan naq junelik wank chi xk'atq li neb'a'
ut naxkol li xyu'am chiruheb' li neke'xteneb' li kamk sa' xb'een.
Currently Selected:
Sal 109: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
