Lv 26
26
Li rosob'tesihom li Yos
(Dt 7,12-24; 28,1-14)
1“Meeyiib' eejalanil yos chi moko jalam u; meewaklesi sa' leetenamit junaq loq'laj pek chi moko let'exinb'il pek, re naq texwiq'laaq chiruheb', xb'aan naq laa'in li Qaawa' leeYos.#26,1 Ex 20,4; Lv 19,4; Dt 5,8; 16,21-22; 27,1.
2“Cheroxloq'i linkutan sábado ut chek'e xloq'al linSantil Na'aj: laa'in li Qaawa'.#26,2 Lv 19,30.
3“Wi texwanq jo' chanru naxye li waatin, wi teepaab' linchaq'rab' ut teek'anjela ru, 4laa'in tintaqla eere li hab' sa' xq'ehil, re naq li ch'och' ut eb' li che'k'aam te'uuchinq. 5Wanq eetriiw toj reetal taawulaq xq'ehil li xxokb'al ru li uub', ut wanq ajwi' ee'uub' toj sa' xq'ehil li awk; texwa'aq toj reetal taak'ojlaaq eech'ool ut texwanq sa' sahilal sa' leetenamit.#26,3-5 Dt 11,13-15. 6Tink'e tuqtuukil usilal sa' leena'aj ut sa ajwi' texwarq, xb'aan naq maajun taaxib'esinq eere. Laa'in te'wisi sa' leetenamit eb' li josq' aj xul ut maa'ani taa'ok chi yalok eerik'in. 7Laa'ex teeraanilaheb' li xik' neke'ilok eere ut eb' a'an te'kamsiiq chi ch'iich' cheru laa'ex. 8Oob' eere laa'ex te'raanilasi o'k'aal ut o'k'aal sa' eeyanq te'raanilasi lajeeb' mil; eb' li xik' neke'ilok eere te'kamsiiq chi ch'iich' cheru laa'ex. 9Laa'in tinb'aanu usilal eere ut texink'e chi k'ihank; junelik xaqxooq xwankil linSumwank eerik'in. 10Teetzeka li triiw k'uulanb'il chaq sa'eb' li chihab' xe'nume'k, ut teerisi li najter triiw re chik xk'uulankil li toja' xexok.
11“Laa'in tink'ojob' linmuheb'aal sa' eeyanq ut ink'a' texintz'eqtaana; 12tinwanq sa' eeyanq, ut laa'inaq leeYos ut laa'exaq intenamit.#26,11-12 2 Ko 6,16; Ap 21,3. 13Laa'in li Qaawa' leeYos, li kin'isink chaq eere Ejiipt re naq ink'a' chik wanqex rub'el xwankilaleb'. Kint'upi li kareen b'ak'b'ookex wi' aran ut kexink'e chi b'eek chi taqenaq leerilob'aal.
Ra te'xk'ul eb' laj q'etol Chaq'rab'
(Dt 28,15-68)
14“Ab'an wi ink'a' tineerab'i ut ink'a' teepaab' chixjunil li chaq'rab' a'in, 15wi teeq'etq'eti eerib' chiru lintaqlahom ut teetz'eqtaana li waatin, wi ink'a' teek'anjela ru chixjunil linchaq'rab' ut teeq'et linSumwank, 16jo'kan ajwi' tinb'aanu eere laa'in: tintaqla chaq sa' eeb'een li xiwak, li raxkamk, li tiq, li xyajel sa' uhej ut xlub'ik leetib'el; maak'a' rajb'al naq tex'awq xb'aan naq a'eb' li xik' neke'ilok eere te'yaloq xsahil ru leerawimq. 17Laa'in tinjosq'o'q eerik'in ut eb' li xik' neke'ilok eere te'xq'ax eeru; te'numtaaq sa' eeb'een eb' li neke'kaqalink eere, ut tento tex'eleliq chi maajun taa'aanilasinq eere.
18“Ab'anan wi toj ink'a' ajwi' tex'ab'inq, laa'in texinrahob'tesi wuqub' sutaq wi' chik xb'aan leemaak. 19Tinsach xkawilal leeq'etq'etil ut tinye re li choxa naq ink'a' chik tixtaqla chaq li hab' ut li ch'och' ink'a' chik taa'uuchinq ru. 20Maak'a'aq chik aj e naq teetawasi eerib' xb'aan naq ink'a' chik taa'elq li awimq sa' li ch'och' chi moko te'uuchinq li che' sa' leena'aj.
21“Ut wi toj yooqex chi xq'etb'al li waatin ut ink'a' teeraj inpaab'ankil, laa'in texinrahob'tesi wuqub' sutaq wi' chik xb'aan leemaak. 22Tintaqla chaq eb' li josq' aj xul sa' eeb'een li te'xtiweb' leeralal eek'ajol, te'xt'upi leewakax. Moko k'ihex ta chik texwanq ut nakirirnak taakanaaq li b'e.
23“Ut wi toj teeq'etq'eti eerib' chiwu ut maji' neketaw ru, us ta eek'ulum chixjunil li rahilal a'in, 24laa'in tinjosq'o'q eerik'in ut texinrahob'tesi wuqub' sutaq wi' chik xb'aan leemaak. 25Texinrahob'tesi rik'in q'esnal ch'iich' li taa'eeqajunq chirix li Sumwank; laa'ex texxik sa'atqeb' leetenamit re xkolb'al eerib', ab'an laa'in tintaqla chaq li raxkamk sa' eeyanq ut laa'ex texq'axtesiiq sa' ruq'eb' li xik' neke'ilok eere.
26“Naq tinmaq' cheru chixjunil leetzekemq, lajeeb' chi ixq te'chiqoq leewa sa' jun chi chiqleb'aal, ut b'isb'il chik li wa li teewa': texwa'aq, ab'anan ink'a' taak'ojlaaq leech'ool.
27“Ut wi toj teeq'etq'eti eerib' chiwu ut ink'a' teeraj rab'inkil li waatin, us ta eek'ulum chixjunil li rahilal a'in, 28taanumtaaq linjosq'il sa' eeb'een ut texinrahob'tesi wuqub' sutaq wi' chik xb'aan leemaak. 29Toja' naq laa'ex teetzeka chik leeralal eek'ajol. 30Laa'in tinjuk' leetijob'aal ut tinputz'iheb' li x'artalil leesununkil ensens, teb'intuub' leekamenaq sa' xb'eeneb' leekamenaqil yos ut texintz'eqtaana; 31po'lem tinkanab' leeninqal tenamit ut tinsacheb' li rochochil leejalanil yos; ink'a' chik taaxik inch'ool chirix leesununkil b'an.
32“Nakirirnak li ch'och' tinkanab', ut eb' li xik' neke'ilok eere li te'chalq chi wank aran, te'sachq xch'ool. 33Texincha'cha'i laa'ex sa' xyanqeb' li tenamit ut texwaanilasi rik'in q'esnal ch'iich'. Leena'aj taasutq'iiq cho'q chaqich'och', ut eb' leetenamit tinkanab'eb' cho'q po'lem. 34Toja' naq li ch'och' taasaho'q xch'ool chi hilank chiru chixjunileb' li kutan naq taakanaaq chi yamyooq ut laa'ex wanqex sa' xtenamiteb' li xik' neke'ilok eere; jo'kan naq taahilanq ut taasaho'q xch'ool jo' reeqaj naq ink'a' xhilank junxil. 35Jo' najtil taawanq li ch'och' chi yamyo, tixyal xsahil li hilank cho'q reeqaj chixjunileb' li sábado li tento raj xhilank naq xexwank aran laa'ex.
36“Jo'k'ihaleb' sa' eeyanq te'kole'q, teb'ink'e chi xiwak ut te'eleliq naq te'rab'i chi t'ane'k junaq xxaq li che'; te'eleliq kama' tawi' naq yooqeb' chi elelik sa' li yalok, ut te't'ane'q chi maajun taa'aanilasinq reheb'. 37Te'xtich rib' chirib'ileb' rib' kama' tawi' naq yooqeb' chi elelik chiru li nimla yalok, us ta maajun taa'aanilasinq reheb'. Maajun eere taaruhanq chi xkolb'al rib' chiruheb' li xik' neke'ilok eere. 38Texsache'q chi junajwa sa' xyanqeb' li xninqal ru tenamit ut tex'oso'je'q sa' xna'ajeb' li xik' neke'ilok eere. 39Ut eb' li te'kanaaq chi yo'yo sa' eeyanq, te'kamq xb'aaneb' li xmaa'usilaleb' sa' li xna'ajeb' li xik' neke'ilok eere: te'kamq rochb'eeneb' li xna' xyuwa' sa' xk'ab'a' li xmaa'usilaleb'.
40“Toja' naq te'xch'olob' li xmaakeb' ut li xmaa'usilaleb' li xna' xyuwa', chanru naq xe'xq'etq'eti rib' ut xe'jipunk chiwu. 41Jo'kan ajwi' laa'in tinxaqab' wib' chiruheb' ut tink'ameb' sa' xtenamiteb' li xik' neke'ilok reheb': aran taakub'eeq xwankil li xch'ooleb' ink'a' xk'ulumeb' li sirkunsisyon ut te'xtoj rix li xmaakeb'. 42Laa'in taajultiko'q we li Sumwank kinb'aanu rik'in laj Jakob,#26,42 Gn 28,13-14. laj Isahak#26,42 Gn 26,3-4. ut laj Abrahán,#26,42 Gn 17,7-8. ut taajultiko'q we li ch'och'. 43Ab'an li ch'och' taakanab'aaq xb'aaneb' a'an ut tixyal xsahil li hilank naq wanq chi nakirirnak; toja' naq te'xtoj rix li xmaa'usilaleb' xb'aan naq xe'xq'et li waatin ut xe'xtz'eqtaana linchaq'rab'.
44“Ab'an chirix chixjunil a'in, us ta wanqeb' chaq sa' xtenamiteb' li xik' neke'ilok reheb', laa'in ink'a' te'sachq sa' inch'ool, ink'a' tintz'eqtaanaheb'; moko tinsach ruheb' chi junajwa, chi moko tsachq sa' inch'ool li Sumwank kinb'aanu rik'ineb', xb'aan naq laa'in li Qaawa', li xYoseb'. 45Taajultiko'q we li Sumwank kinb'aanu rik'ineb' li xxe'toonil yuwa'eb' naq ke'wisiheb' chaq Ejiipt chiruheb' li xninqal ru tenamit, re naq laa'inaq li xYoseb'. Laa'in li Qaawa'”.
46A'aneb' a'in li chaq'rab', li aatin ut li taqlahom kixaqab'aak xwankil xb'aan li Qaawa' cho'q reheb' laj Israel sa' xb'een li tzuul Sinaí, chi xtz'uumal re laj Moisés.
Currently Selected:
Lv 26: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.