Lv 25
25
Xchihab'il li hilank
1Li Qaawa' kiraatina laj Moisés sa' xb'een li tzuul Sinaí ut kixye re:
2“Ye a'in reheb' laj Israel: Naq akaq xex'ok sa' li ch'och' li tink'e eere, tento taahilanq li ch'och' sa' xk'ab'a' li Qaawa'. 3Waqib' chihab' naru tex'awq sa' leech'och'. Chiru ajwi' waqib' chihab' naru teesaab'esi leerawimq uub' ut teexok li ru, 4ab'anan sa' xwuq li chihab' teek'e chi hilank li ch'och' sa' xk'ab'a' li Qaawa': chiru li chihab' a'an mex'awk sa' leech'och' chi moko teesaab'esi leerawimq. 5Meexok li ru li triiw li taayo'laaq xjunes rib' naq akaq xexraqe'k chi xxokb'al ru li awimq, chi moko teexok ru li uub' li ink'a' saab'esinb'il eeb'aan: li ch'och' tento taahilanq chi tz'aqal re ru. 6Jo'k'ihal taaruuchin li ch'och' xjunes naq yooq chi hilank, taatz'aqloq cho'q eetzekemq laa'ex, cho'q reheb' leemoos winq ut ixq, cho'q reheb' li neke'k'anjelak cheru chi tojb'il, ut cho'q reheb' ajwi' laj ab'l tenamit li wanqeb' sa' eeyanq. 7Jo'k'ihal taaruuchin li ch'och', taak'anjelaq ajwi' cho'q reheb' leeketomq ut eb' li k'iche'il xul wankeb' sa' leena'aj.#25,1-7 Ex 23,10-11.
Xchihab'il li ach'ab'ank
8“Tento teerajla wuqub' xamaan chi chihab', naraj naxye wuqub' chihab' ut taatamb'resimanq chi wuqutq, taawulaq b'eleeb' roxk'aal chihab', 9ut sa' li lajeeb' xb'e li xwuq po, sa' xkutankil li kuyuk sachok maak, teek'e chi yaab'asiik li xukub' sa' chixjunil li tenamit. 10Teexaqab' li lajeeb' roxk'aal chihab' cho'q santil chihab': a'anaq jun chihab' re li ach'ab'ank. Chiru li chihab' a'an teeye resil li rach'ab'ankileb' chixjunil li wankeb' sa' xsutam li tenamit. Li junjunq taasutq'iiq wi' chik rik'ineb' li xkomon ut toxreechani wi' chik li xch'och'. 11Li lajeeb' roxk'aal chihab' a'anaq jun santil chihab' re li ach'ab'ank: ink'a' truuq tex'awq chi moko teexok li triiw li taayo'laaq xjunes rib', chi moko teesaab'esi leerawimq uub' ut teexok li ru, 12xb'aan naq a'an jun santil chihab' ut re ach'ab'aak cho'q eere laa'ex. Ka'ajwi' li k'aru taaruuchin li ch'och' xjunes, a'an teetzeka.
13“Chiru li santil chihab' a'in chejunilex laa'ex toxeereechani wi' chik leech'och'. 14Maajun eere tixb'alaq'i li ras riitz'in naq tixk'ayi malaj tixloq' junaq ch'och'. 15Ani taaloq'oq, tento tixtoj a' yaal naxye jarub' chihab' xnumik li xchihab'il li ach'ab'ank, ut li nak'ayink tento tixpatz' xtz'aq a' yaal jarub' sut chik taa'elq li rawimq sa' li ch'och' a'an toj taawulaq li santil chihab'. 16Wi toj naab'al sut chik taa'elq li rawimq, tertookaq ajwi' xtz'aq li ch'och'; wi ut yal ajlanb'il chihab' aj chik li xokok awimq taawanq, kub'enaqaq ajwi' li xtz'aq, xb'aan naq li nak'ayimank a'an li rajlankil li xokok.
17“Meerahob'tesi leeras eeriitz'in. Chexiwaaq ru leeYos, xb'aan naq laa'in li Qaawa', leeYos. 18Paab'omaq linchaq'rab', chek'uula sa' leech'ool lintaqlahom ut k'anjelahomaq ru, re naq sa wanqex sa' li tenamit a'in. 19Taa'uuchinq li ch'och', ut laa'ex texwanq sa' xyaalal chisa' ut teetzeka li ru toj reetal taak'ojlaaq eech'ool.
20“Mare teeye: «K'aru tqatzeka sa' li xwuq chihab' wi ink'a' naru too'awq chi moko tqaxok ru li qawimq?», cha'qex. 21Ab'an laa'in tintaqla li wosob'tesihom sa' eeb'een sa' li xwaq chihab', re naq tz'aqalaq li ru leerawimq cho'q re oxib' chihab'. 22Naq tex'awq sa' li xwaqxaq chihab', toj yooqex ajwi' chi xtzekankil ru leerawimq k'uulanb'il. Ut toj yooqex ajwi' chi xtzekankil a'an sa' li xb'ele chihab', toj taawulaq xq'ehil li xokok.
23“Li ch'och' ink'a' naru xk'ayinkil chi junajwa: li ch'och' a'an we laa'in ut laa'ex yal aj numelex chisa', chanchanex wula'. 24Jo'kan utan, sa' chixjunil li na'ajej wankex wi' cho'q eereechanihom, li najter eechal re naru tixloq' wi' chik cheru.
25“Wi ani junaq aawech tenamitul taakanaaq sa' neb'a'il ut tixk'ayi aawe junaq xch'och', naru taachalq junaq rech'alal chi xkolb'al rix li ak xk'ayi li xkomon.#25,25 Rt 2,20; 4,1-10.
26“Wi junaq poyanam maak'a' li rech'alal li taaruuq raj chi xkolb'al rix li ch'och', wi tixtaw xtumin moqon, 27xb'iraq rix jarub' chihab' ak xnume'k chalen li xk'ayinkil li ch'och', chixq'ajsi re laj loq'onel jo'k'ihal chik tumin tento taatz'aq, ut taa'ok wi' chik chi reechaninkil li xch'och'. 28Ab'an wi ink'a' tixtaw xtumin re xloq'b'al wi' chik li ch'och', li na'ajej a'an taakanaaq cho'q re laj loq'onel toj reetal taawulaq xchihab'il li ach'ab'ank; ut chiru li santil chihab' a'an taakanaaq chi ach'ab'anb'il li na'ajej, ut li kik'ayink re toj aran truuq taa'ok wi' chik chi reechaninkil li xch'och'.
29“Wi ani nak'ayink junaq ochoch sa' tenamit sutsu chi tz'ak, xk'ulub' xkolb'al rix toj chiru jun chihab' chirix li xk'ayinkil. 30Ab'an wi li ochoch ink'a' naru xkolb'al rix chiru jun chihab', taakanaaq chi junajwa cho'q re li xloq'ok ut cho'q reheb' li ralal xk'ajol. Moko truuq ta taakanaaq chi ach'ab'anb'il sa' li xchihab'il li ach'ab'ank. 31A'ut eb' li ochoch li wankeb' sa' tenamit li ink'a' sutsu chi tz'ak, chanchanaqeb' li wankeb' sa' k'aleb'aal: truuq xkolb'al rix ut te'kanaaq chi ach'ab'anb'il sa' xchihab'il li ach'ab'ank.
32“Eb' laj Leví junelik xk'ulub'eb' xkolb'al rix li ochoch wankeb' sa' li xtenamiteb'. 33Wi laj loq'onel a'an jun aj Leví, tento tixkanab' li ochoch sa' xchihab'il li ach'ab'ank ut taaxik sa' li tenamit b'arwi' wank xna'aj, xb'aan naq li reechanihomeb' laj Leví sa' xyanqeb' laj Israel a'an li ochoch li wank sa' li xtenamiteb'. 34Li ch'och' wank chi xsutam li xtenamiteb' laj Leví, ink'a' naru xk'ayinkil xb'aan naq reheb' a'an chi junajwa.
Chanru tento xtenq'ankileb' li qas qiitz'in
35“Wi junaq laawech tenamitul xkanaak sa' neb'a'il ut tixtz'aama xtenq'ankil aawik'in, tento taatenq'a jo' tawi' junaq aj ab'l tenamit malaj jo' junaq aawula', ut taak'e chi hilank sa' laawochoch.#25,35 Dt 15,7-8.
36“Mik'a' aamaq' chiru chi moko taapatz' ral li tumin li xak'e re chi to', chaxiwa b'an ru laaYos ut sik' xna'aj laawech tenamitul sa' laawochoch. 37Maapatz' ral li tumin li xak'e re chi to',#25,37 Ex 22,25; Dt 23,19-20. chi moko taaterq'usi xtz'aq li tzekemq li taak'e re. 38Laa'in li Qaawa' leeYos, li kin'isink chaq eere Ejiipt re xk'eeb'al eere li ch'och' sa' xteepal Kanahán ut re naq laa'inaq leeYos.
39“Wi junaq laawech tenamitul xkanaak sa' neb'a'il chi wank aawik'in, ut tixk'ayi rib' re k'anjelak aawik'in, maak'e chi k'anjelak jo' junaq aj mun; 40chiwanq b'an jo' junaq aj k'anjel chi tojb'il malaj jo' junaq aawula'. Taak'anjelaq chawu toj sa' li xchihab'il li ach'ab'ank. 41Toja' naq truuq tixkanab' laawochoch rochb'eenaqeb' li ralal xk'ajol re naq taasutq'iiq sa' xyanqeb' li xkomon ut sa' li xna'ajeb' li xna' xyuwa'. 42Xb'aan naq a'aneb' inmoos, laa'in kin'isink chaq reheb' aran Ejiipt, ut moko naru ta xk'ayinkileb' jo' na'uxk re junaq aj mun. 43Maatawasiheb', chaxiwa b'an ru laaYos.
44“Wi taawaj naq wanqeb' aamun winq ut ixq, loq' aawe sa' jalanil tenamit li wankeb' chasutam. 45Truuq ajwi' taaloq' li jalaneb' xtenamit li wanqeb' sa' eeyanq ut eb' li ralal xk'ajol li te'yo'laaq naq wanqeb' sa' leetenamit: eb' a'an truuq teeloq' cho'q eere 46ut teekanab' cho'q reechanihomeb' leeralal eek'ajol naq texkamq laa'ex. Junelik te'k'anjelaq cheru, ab'an maajun eere laa'ex aj Israel tixtawasi li ras riitz'in malaj taakawiltaqlanq sa' xb'eeneb'.#25,39-46 Ex 21,2-6; Dt 15,12-18.
47“Wi junaq aj ab'l tenamit malaj junaq aawula' li wank sa' laach'och' taab'ihomo'q ut laawech tenamitul taaneb'a'o'q ut tixk'ayi rib' re laj ab'l tenamit a'an malaj ut re jalan chik ab'l tenamit, 48toj naru naq taaloq'e'q wi' chik naq ak xk'ayi rib' chi munil. Taaruuq chi kole'k rix xb'aan junaq ras riitz'in, 49junaq rikan, junaq ralal li rikan malaj junaq chik rech'alal. Truuq ajwi' tixkol rib' xjunes wi wank k'aru tixb'aanu wi'. 50Rochb'een laj loq'ol re, te'xb'ir rix ak jarub' chihab' chik xk'ayinkil wi' rib' toj sa' xchihab'il li ach'ab'ank: taaxaqab'amanq li xtz'aq a' yaal naxye li rajlankil li chihab' ut jo' chanru natojmank junaq aj k'anjel nakutanib'k. 51Wi toj naab'al ma nawulak li santil chihab', tento tixq'ajsi b'ayaq li tumin xk'ayi wi' rib', jo' chanru xe'xb'ir rix; 52ab'an wi ink'a' chik k'i maa nawulak li xchihab'il li ach'ab'ank, tento tixtoj li xkolb'al rib' jo' tz'aqal naxye li rajlankil eb' li chihab' a'an. 53Laj eechal re tixb'aanu jo' naxb'aanu reheb' laj k'anjel li neke'k'anjelak chiru jun chihab'; ut ink'a' naru tixtawasi.
54“Ut wi ink'a' xkole'k chiruheb' li chihab' a'an, taakanaaq chi ach'ab'anb'il sa' xchihab'il li ach'ab'ank, rochb'eenaqeb' li ralal xk'ajol, 55xb'aan naq eb' laj Israel a'aneb' inmoos, tz'aqal weheb' ut aj k'anjeleb' chiwu; laa'in kin'isink chaq reheb' Ejiipt. Laa'in li Qaawa', leeYos.
Currently Selected:
Lv 25: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.