Gal 5

Meek'e chik eerib' rub'el xwankil li Chaq'rab'

1Li Kriist ki'ach'ab'ank qe re naq ach'ab'anb'ilaqo chi yaal. Wanqex b'i' chi kaw eech'ool sa' leepaab'aal ut meek'e chik eerib' chi wank chi b'ak'b'o.

2K'ehomaq reetal, laa'in laj Pablo li ninye eere: wi toj teek'ul li sirkunsisyon, maak'a' taa'ok wi' li Kriist cheru. 3Jun wa wi' chik ninch'olob' chiruheb' chixjunil li te'k'uluq re li sirkunsisyon, naq teneb'anb'il sa' xb'eeneb' xpaab'ankil chixjunil li Chaq'rab'. 4Laa'ex li nekeroyb'eni xtiikob'resinkil eech'ool sa' xk'ab'a' li Chaq'rab', xerisi eerib' rik'in li Kriist ut xetz'eqtaana li rusilal li Yos. 5Ab'anan laa'o naqayo'oni chi anchal qach'ool li tiikil ch'oolej xb'aan li Musiq'ej sa' xk'ab'a' li paab'aal. 6Xb'aan naq rik'in li Kristo Jesus maak'a' na'ok wi' xk'ulb'al li sirkunsisyon malaj ink'a', ka'aj b'an wi' li paab'aal li naxk'ut rib' rik'in li rahok.

7Chaab'il naq xetikib' aanilak. Ani xramok cheru naq teekanab' li yaal? 8Li takchi' a'an moko chalenaq ta rik'in li Yos li nab'oqok eere. 9“B'a'b'ay li yu naxch'amob'resi chixjunil li q'em”.#5,9 Cf. 1 Ko 5,6. 10Laa'in kaw inch'ool cherix laa'ex sa' xk'ab'a' li Qaawa' naq ink'a' teek'am jalan chik li b'e; ab'an li yo chi po'ok re leech'ool tixk'ul xtojb'al xmaak, a' yaal ani a'an.

11Ex was wiitz'in, wi ta toj yookin chi xyeeb'al naq tento li sirkunsisyon, ink'a' raj chik tine'xrahob'tesi eb' laj Judiiy, xb'aan naq ak xraqe'k raj chi jo'kan li luktesink ch'oolej chirix li krus.#5,11 Cf. 1 Ko 1,23. 12Us rajan te'xset rib'eb' chi junajwa li yookeb' chi xpo'b'al leech'ool!

13Ex was wiitz'in, xexb'oqe'k re wank chi ach'ab'anb'il. Ab'anan sa' xk'ab'a' naq wankex chi ach'ab'anb'il mex'ok chi xb'aanunkil li naraj li tz'ejwalej, chera b'an eerib' ut chetenq'a eerib' cherib'il eerib'. 14Xb'aan naq chixjunil li Chaq'rab' natz'aqlok ru rik'in jun chi aatin: “Chara laawas aawiitz'in jo' naq nakara aawib' laa'at”.#5,14 Lv 19,18. 15Chek'ehaq reetal, wi neketiw eerib' ut neket'upihatq eerib' cherib'il eerib', toxeekamsi eerib' cherib'il eerib'!

Li Musiq'ej ut li tz'ejwalej

16Chineerab'i: chexb'eeq rub'el xwankil li Musiq'ej, ut chi jo'kan ink'a' teeb'aanu li naxrahi ru li tz'ejwalej.#5,16 Cf. Ro 8,4-5. 17Xb'aan naq li k'aru naxrahi li musiq'ej xik' na'ile'k xb'aan li tz'ejwalej ut li naxrahi li tz'ejwalej xik' na'ile'k xb'aan li musiq'ej: eb' li wiib' a'in xik' neke'ril rib' chirib'ileb' rib', jo'kan naq laa'ex ink'a' nekeb'aanu li us li nekeraj raj xb'aanunkil. 18Ab'anan wi b'eresinb'ilex xb'aan li Musiq'ej, moko wankex ta rub'el xwankil li Chaq'rab'.

19Nawno chi us k'aru nachalk rik'in li tz'ejwalej: ko'b'eetak yumb'eetak, muxuk ib', jo'maajo'il wank, 20xloq'oninkil li yal k'oxlanb'il yos,#5,20 Li xloq'oninkil li yal k'oxlanb'il yos a'an li xloq'oninkil li saq'e, li po malaj junaq xul jo' neke'xb'aanu chaq eb' li tenamit najter q'e kutan. A'an ajwi' naq naxik qach'ool junes chirix li tumin, li traaw, malaj chirix li maa'usilal: a'an chik li qayos (cf. Ef 5,5). tuulak, xik'il uuchink, po'ok ru junajil, kaqalik, josq'ink, yoob'ank raaxiik', wech'ij ib', jachok ib', 21sowenk, kalaak, num wa'ak num uk'ak, ut wank chik xkomon jo'keb' a'in. Chirix a k'a'aq re ru a'in ak inyehom eere, ut ninjultika wi' chik cheru naq eb' li neke'b'aanunk re chixjunil a'in moko te'reechani ta li xnimajwal awab'ejihom li Yos.

22A'ut li naruuchin li Musiq'ej a'an li rahok, sahil ch'oolej, tuqtuukilal, kuyuk, chaab'ilal, usilal, paab'ank, 23tuulanil, kuyuk ib'. Maak'a' junaq chaq'rab' naxye naq ink'a' us xb'aanunkil chixjunil a'in. 24Ut eb' li reheb' li Kriist xe'xk'e chiru krus li tz'ejwalej jo' ajwi' li k'aru naxrahi ut narataw ru. 25Wi li Musiq'ej naxk'e qayu'am, choob'eeq ajwi' rub'el xwankil li Musiq'ej.

26Miqasik' qawankil qajunes qib', miqayoob' qajosq'il chiqib'il qib' chi moko chiqakaqali qib'.

Currently Selected:

Gal 5: QQC

Highlight

Copy

Compare