Hch 24

Laj Pablo chiru laj Félix, ruuchil li awab'ej

1Oob' kutan chik chirix a'an, laj Ananías, li xyuwa'il aj tij, kikub'eek Cesarea, wankeb' ajwi' cheekel winq rochb'een ut jun li na'aatinak chirixeb' sa' raqleb'aal aatin, aj Tértulo xk'ab'a'. Chixjunileb' a'an ke'wulak wan wi' li ruuchil li awab'ej chi xjitb'al laj Pablo, 2ut naq kib'oqe'k chaq a'an, laj Tértulo kixtikib' xjitb'al chi jo'ka'in:

—B'anyox xaq aawe, at qaawa' Félix, wanko sa' nimla tuqtuukilal ut yo chi usaak li tenamit a'in xb'aan xnimal laak'a'uxl. 3Rik'in a'in nasaho'k qach'ool junelik ut yalaq b'ar; k'ajo' naq naqab'anyoxi chawu. 4Anaqwan nintz'aama chawu naq, sa' xk'ab'a' xnimal laawusilal, taawab'i taxaq li ok qe chi xyeeb'al. Junpaat ajwi' tatqach'i'ch'i'i. 5Xqataw li winq a'in, q'axal yib'ru xna'leb': a'an aj yoob'anel raaxiik' sa' xyanqeb' laj Judiiy sa' chixjunil li ruuchich'och' ut aj k'amol xb'eheb' li xkomoneb' laj Nazaret.#24,5 A'aneb' li kristiyan, a'eb' li xtzolom li Jesus aj Nazaret. 6Xraj ajwi' xmuxb'al li rochoch li Yos, ut laa'o xqachap chaq.#24,6 Li raqal chalk re: Laa'o xqaj raj xraqb'al aatin sa' xb'een jo' chanru naxye li qaChaq'rab'; 7 ab'anan xol'elq li xjolomileb' laj puub', aj Lisias xk'ab'a', ut sa' josq'il xmaq' sa' quq'. 8 Xtaqlaheb' ajwi' chaq laj jitol re chi chalk aawik'in, moko tz'aqal xcha'al ta li Hechos, a'an b'an yal xtiqb'al aj chik li raqal 6. 8Patz' re ut taataw xyaalal chixjunil a k'a'aq re ru a'in li naqajit wi'.

9Ke'okenk ajwi' eb' laj Judiiy chi xyeeb'al naq yaal chixjunil a'an. 10Toja' naq li ruuchil li awab'ej kixk'e chi aatinak laj Pablo ut a'an kixye:

—Laa'in ninnaw naq ak k'iila chihab' aawokik cho'q aj raqol aatin sa' li tenamit a'in; jo'kan naq chi anchal inch'ool tin'aatinaq re xkolb'al wib'. 11Toj maji' numenaq kab'laju kutan anaqwan xintaqe'k Jerusalén chi utz'uk: laa'at ajwi' tatruhanq chi xk'eeb'al reetal naq yaal li ninye. 12Maajun sut xine'xtaw eb' laj Judiiy chi wech'ink rik'in anihaq malaj chi xpo'b'al xch'ooleb' li tenamit sa' rochoch li Yos, chi moko sa'eb' li ch'utleb'aal kab'l malaj sa' junaq chik na'ajej sa' li tenamit. 13Eb' a'in ink'a' te'ruuq chi xk'utb'al chawu naq yaal li k'aru nikine'xjit wi' anaqwan. 14Laa'in tinye xyaalal aawe: ninloq'oni ru li xYos eb' linna' linyuwa' jo' chanru yeeb'il sa' li loq'laj B'e a'in, «jachb'il paab'aal» nayeemank re xb'aaneb' laj Judiiy. Ninpaab' chixjunil li tz'iib'anb'il sa' li Chaq'rab' ut sa' xHuheb' li Propeet, 15ut kaw linch'ool chi royb'eninkil rik'in li Yos naq te'wakliiq wi' chik chi yo'yo li tiikeb' xch'ool ut eb' laj maak, jo' ajwi' neke'royb'eni eb' a'in. 16Jo'kan naq laa'in ajwi' ninyal inq'e chi wank junelik chi tiik linch'ool chiru li Yos ut chiruheb' li was wiitz'in.

17“Chirix k'iila chihab', xinchalk chi k'amok lemoox cho'q re lintenamit ut chi mayejak. 18Xkohin sa' rochoch li Yos chi xb'aanunkil a'an. Moko k'iila tenamit ta wochb'een, chi moko nokootub'ub'nak. 19Aran xine'xtaw eb' laj Judiiy li xe'chalk chaq sa' xsutam Asia: a'aneb' li tento raj te'xk'ut rib' chawu chinjitb'al, wi relik chi yaal wank k'aru tine'xjit wi'. 20Wi ut ink'a', xyeeqeb' a'an k'aru linmaak xe'xtaw chiwix naq xink'ame'k sa' li xraqleb'aaleb' aatin. 21Mare ka'ajwi' a'in te'xtaw: wankin jun sut sa' xyanqeb' ut xinjap we chi xyeeb'al reheb': «Sa' li kutan a'in naraqmank aatin chiwix cheru laa'ex xb'aan naq ninpaab' li xwaklijikeb' chi yo'yo eb' li kamenaq»”.

Laj Pablo kik'ehe'k sa' tz'alam aran Cesarea

22Laj Félix naxnaw chi chaab'il k'aru naxk'ut li Ak' B'e; jo'kan naq kixchaq'rab'iheb' laj jitol re laj Pablo ut kixye:

—K'ulunq wan laj Lisias, li xjolomileb' laj puub', ut tinchoy xtz'ilb'al rix li nekeye.

23Ut kixchaq'rab'i laj k'amol xb'e eb' laj puub' chi xk'aak'alenkil laj Pablo, ab'an chixb'aanuuq sa' q'unil, ut mirame'k chiruheb' li xkomon li te'chalq chi k'anjelak chiru.

24Ink'a' ajwi' k'iila kutan chirix a'an naq kik'ulunk wi' chik laj Félix rochb'een lix Drusila li rixaqil, a'an jun li ixq aj Judiiy. Laj Félix kixb'oq chaq laj Pablo ut kirab'i chi aatinak chirix li xpaab'ankil li Kristo Jesus. 25Ab'anan, naq laj Pablo kixtikib' aatinak chirix li tiikilal, li kuyuk ib' ut li raqb'a aatin chaalel, laj Félix ki'ok xxiw ut kichaq'ok:

—Tz'aqal a'in; truuq tatxik anaqwan. Jo'q'e tixk'e rib' chiwu, tintaqla wi' chik aab'oqb'al, chan.

26Laj Félix naroyb'eni ajwi' naq taak'ehe'q raj b'ayaq xtumin xb'aan laj Pablo: jo'kan naq kok'aq xsa' naxb'oq chaq ut naseeraq'ik rik'in.

27Jo'ka'in naq ke'nume'k wiib' chihab'. Chirix chik a'an ki'ok laj Porsio Festo#24,27 Laj Porsio Festo kiwank cho'q ruuchil li awab'ej aran Judea sa'eb' li chihab' 59-62. cho'q reeqaj laj Félix; ut a'an kiraj xq'unb'esinkil xch'ooleb' laj Judiiy, jo'kan naq kixkanab' laj Pablo sa' tz'alam.

Currently Selected:

Hch 24: QQC

Highlight

Compare

Copy