Hch 23

1Laj Pablo kixka'ya eb' li xninqal ru aj raqol aatin ut kixye:

—Ex was wiitz'in, laa'in xinwank chi q'axal tiik inch'ool chiru li Yos chalen toj anaqwan.

2Naq kirab'i a'an laj Ananías, li xyuwa'il aj tij, kixtaqlaheb' laj tenq' re xsak'b'al sa' re. 3Toja' naq laj Pablo kixye re:

—Li Yos taasak'oq aawe, at saqob'resinb'il tz'ak! K'ojk'ookat chi raqok aatin chiwix jo' naxye li Chaq'rab', ut laa'at nakaq'et li Chaq'rab' rik'in xtaqlankil insak'b'al.

4Ut eb' li wankeb' chi xk'atq ke'xye re:

—A' li xyuwa'il aj tij li nak'anjelak chiru li Yos yookat chi xhob'b'al!

5Kichaq'ok laj Pablo ut kixye:

—Ex was wiitz'in, ink'a' xinnaw naq a'an ta li xyuwa'il aj tij, xb'aan naq tz'iib'anb'il: «Maamajewa li xb'eenil laatenamit».#23,5 Ex 22,27.

6Naxnaw laj Pablo naq jun raqal chi xninqaleb' ru aj raqol aatin a'aneb' aj Saduseey ut li jun raqaleb' chik aj Pariseey; jo'kan naq kixye reheb' chi kaw xyaab' xkux:

—Ex was wiitz'in, laa'in aj Pariseey, ralalin aj Pariseey. Xb'aan naq xaqxo li woyb'enihom chirix li xwaklijikeb' chi yo'yo eb' li kamenaq, jo'kan naq yo xraqb'al aatin chiwix.

7Naq kixye a'an, kitiklaak jun nimla wech'ij ib' sa' xyanqeb' laj Pariseey ut eb' laj Saduseey, ut li ch'utam kixjach rib'. 8Xb'aan naq eb' laj Saduseey neke'xye naq maak'a' xwaklijikeb' chi yo'yo li kamenaq, maak'a'eb' li ánjel ut eb' li musiq'ej; a'ut eb' laj Pariseey neke'xpaab' chixjunil a'in. 9Chixjunileb' kaw ke'ok chi xjapb'al reheb'. Wankeb' aj tz'iib' xkomoneb' laj Pariseey ke'xaqliik ut ke'ok chi wech'ink:

—Laa'o maajun maak naqataw chirix li winq a'in. Mare anchal musiq'ej malaj ánjel x'aatinak rik'in, chankeb'.

10Li wech'ij ib' yo chi nimank ut li xjolomileb' laj puub' kixxiwa naq laj Pablo taat'upiiq xb'aaneb'; jo'kan naq kixtaqlaheb' laj puub' chi kub'eek, re naq te'xmaq' laj Pablo sa' ruq'eb' ut te'xk'am sa' li wartel.

11Sa' li q'oqyink jun chik, li Qaawa' kixk'ut rib' chiru ut kixye re: “Kawu aach'ool! Xach'olob' li yaal chiwix Jerusalén; jo'kanaqat ajwi' aran Roma”.

Eb' laj Judiiy ke'xk'uub' xkamsinkil laj Pablo

12Naq kisaqewk, eb' laj Judiiy ke'xch'utub' rib' chi k'uub'ank ut ke'xye rik'in jurament naq ink'a' chik te'wa'aq te'uk'aq toj reetal te'xkamsi laj Pablo. 13Numenaqeb' ka'k'aal eb' li ke'xb'aanu li sumk'uub'ank a'in. 14Ke'wulak rik'ineb' li xb'eenil aj tij ut eb' li cheekel winq, ut ke'xye reheb':

—Xqaye rik'in jurament naq maak'a' tqayal toj reetal tqakamsi laj Pablo. 15Laa'ex eerochb'eeneb' li xninqal ru aj raqol aatin yehomaq anaqwan re li xjolomileb' laj puub' naq chixkub'sihaq chaq laj Pablo wankex wi', jo' yal teeraj raj xtz'ilinkil rix chi chaab'il k'aru xye ut xb'aanu. Laa'o yo'oon wanqo re xkamsinkil rub'elaj li xk'ulunik.

16Naq li xyum li ranab' laj Pablo kirab'i resil li xk'a'uxeb', kox'okaq sa' li wartel ut kixye a'an re laj Pablo. 17A'in kixb'oq jun reheb' laj k'amol xb'eheb' laj puub' ut kixye re:

—K'am li saaj al a'in rik'in li xjolomileb' laj puub' xb'aan naq wank k'aru toxye re.

18A'an kixk'am li saaj al chirix, koxxaqab' chiru li xjolomileb' laj puub' ut kixye:

—Laj Pablo li wank sa' tz'alam xinxb'oq ut xtz'aama chiwu naq tink'am chaq aawik'in li saaj al a'in. K'a' tana ru tixye aawe.

19Li xjolomileb' laj puub' kixchap chi ruq', kixk'am sa' junesal ut kixpatz' re:

—K'aru li taawaj xyeeb'al we?

20Kichaq'ok li al ut kixye:

—Eb' laj Judiiy xe'xk'e rib' sa' aatin re xtz'aamankil chawu naq wulaj taakub'si laj Pablo sa' li xraqleb'aaleb' aatin, yal re xtz'ilinkil rix chi us k'aru xye ut xb'aanu. 21Ab'anan laa'at maapaab'eb', xb'aan naq numenaq ka'k'aal chi winq sa' xyanqeb' a'an te'raj xra'lenkil: xe'xye rik'in jurament naq ink'a' te'wa'aq te'uk'aq toj reetal te'xkamsi laj Pablo. Ut anaqwan yo'oon wankeb'; ka'ajwi' neke'royb'eni laawaatin.

22Toja' naq li xjolomileb' laj puub' kixchaq'rab'i li saaj al: “Maa'ani aj e chaye naq xolaye we chixjunil a'in”, chan re.

Laj Pablo kitaqlaak aran Cesarea

23Chirix chik a'an kixb'oqeb' wiib' aj k'amol xb'e eb' laj puub' ut kixye reheb': “Kawresihomaq lajeek'aal (200) aj puub' re te'xik Cesarea sa' b'eleeb' honal re q'oqyink, rochb'eenaqeb' lajeeb' xkaak'aal li te'xik chirix kawaay jo'wi' lajeek'aal li wanqeb' xjutz' ch'iich'. 24Kawresihomaq ajwi' jun kawaay taaxik wi' laj Pablo, ut k'amomaq sa' xyaalal chi maak'a' tixk'ul, toj rik'in laj Félix ruuchil li awab'ej”.#23,24 Laj Antonio Félix kiwank cho'q ruuchil li awab'ej aran Judea sa'eb' li chihab' 52-59. 25Kixtz'iib'a ajwi' jun li hu naxye chi jo'ka'in:

26“Laa'in aj Klawdio Lisias nintaqla xsahil aach'ool, at xnimal ru ruuchil li awab'ej. 27Li winq a'in xchape'k xb'aaneb' laj Judiiy. Okeb' raj re chi xkamsinkil naq xinwulak laa'in wochb'eeneb' laj puub' wankeb' wik'in ut xinkol sa' ruq'eb', xb'aan naq xwab'i resil naq a'an aj Roma. 28Xwaj ajwi' xnawb'al k'aru neke'xjit wi'; jo'kan naq xink'am taq'a sa' li xraqleb'aaleb' aatin. 29Ut xintaw xyaalal naq najite'k yal chirix k'a'aq re ru wank sa' xchaq'rab'eb' a'an ut maajun maak xb'aanu xk'ulub' wi' li kamk malaj xik ta sa' tz'alam. 30Ab'anan xwab'i resil naq eb' laj Judiiy xe'xk'uub' xra'lenkil li winq a'in; jo'kan naq xintaqla aawik'in chi junpaat ut xinye ajwi' reheb' laj jitol re naq te'xch'olob' chawu k'aru neke'xye chirix. Chawil aawib'”.

31Eb' laj puub' ke'xchap laj Pablo jo' chaq'rab'inb'ileb' wi' ut ke'xk'am chi q'eq toj sa' li tenamit Antípatris. 32Sa' li kutan jun chik eb' li neke'xik chi oqej ke'sutq'iik sa' li wartel aran Jerusalén, ut eb' li wankeb' chirix kawaay toj ke'rochb'eeni laj Pablo. 33Ut naq ke'wulak Cesarea, ke'xk'e li hu re laj Félix ut ke'xq'axtesi ajwi' laj Pablo. 34Naq li ruuchil li awab'ej kiril xsa' li hu, kixpatz' b'ar xtenamit laj Pablo, ut naq kirab'i naq yo'lajenaq sa' xteepal Silisia, kixye re:

35—Chalqeb' wan laj jitol aawe; tojo' naq tatwab'i.

Ut kixtaqla xk'aak'alenkil sa' rochoch laj Herodes.

Currently Selected:

Hch 23: QQC

Highlight

Compare

Copy