2 Kr 36
36
Laj Johakás, awab'ej re Judá
(2 R 23,31-35)
1Eb' li tenamit ke'xsik' ru laj Johakás, ralal laj Josías, ut ke'xxaqab' cho'q awab'ej aran Jerusalén, sa' xna'aj li xyuwa'. 2Oxib' xka'k'aal chihab' wank re laj Johakás naq ki'ok cho'q awab'ej, ut oxib' po ajwi' kitaqlank sa' xb'een Jerusalén. 3Li awab'ej re Ejiipt ki'isink re sa' xwankil aran Jerusalén ut kixteneb' tojok sa' xb'eeneb' li tenamit chi oxlaju xka'k'aal kintal li plaat ut oxib' aroow li oor. 4Li awab'ej re Ejiipt kixxaqab' laj Eliakín, riitz'in laj Johakás, cho'q awab'ej re Judá ut Jerusalén, ut aj Johakín chik kixk'e cho'q xk'ab'a'. Ut laj Johakás li asb'ej kik'ame'k xb'aan laj Nekó aran Ejiipt.#36,4 Jr 22,11-12.
Laj Johakín, awab'ej re Judá
(2 R 23,36—24,7)
5Oob' xka'k'aal chihab' wank re laj Johakín#36,5 Jr 22,18-19; 26,1-6; 35,1-19. naq ki'ok cho'q awab'ej, ut junlaju chihab' ki'awab'ejink aran Jerusalén. Ab'an kixb'aanu li ink'a' nawulak chiru li Qaawa' li xYos. 6Laj Nabukodonosor, li awab'ej re Babilonia, koho chi yalok rik'in,#36,6 Jr 25,1-38; 36,1-32; 45,1-5; Dn 1,1-2. kixb'ak' chi kareen q'anch'iich' ut kixk'am Babilonia. 7Laj Nabukodonosor kixxok ajwi' li k'aru re li rochoch li Qaawa', kixk'am sa' li tenamit Babilonia ut koxk'e sa' rochoch li xyos.
8Chixjunil li xyehom ut xb'aanuhom laj Johakín, li maa'usilal kixb'aanu ut chixjunil li kik'ulmank, tz'iib'anb'ileb' sa' xHuhil li xyehom ut xb'aanuhomeb' li awab'ej re Israel ut Judá. Ut a' chik laj Johakín li ralal ki'ok chi awab'ejink sa' xna'aj.
Laj Johakín, awab'ej re Judá
(2 R 24,8-17)
9Waqxaqlaju chihab' wank re laj Johakín naq ki'ok cho'q awab'ej, ut oxib' po rik'in lajeeb' kutan ki'awab'ejink aran Jerusalén. Ab'an kixb'aanu li ink'a' nawulak chiru li Qaawa'.
10Sa' li saq'ehil re li chihab' a'an, laj Nabukodonosor kixtaqla chaq xchapb'al laj Johakín re xk'amb'al Babilonia,#36,10 Jr 22,24-30; 24,1-10; 29,1-2; Ez 17,12. rochb'een li k'a'aq re ru q'axal loq' re li rochoch li Qaawa', ut kixxaqab' laj Sedesías, rech'alal laj Johakín, cho'q awab'ej re Judá ut Jerusalén.#36,10 Jr 37,1; Ez 17,13.
Laj Sedesías, awab'ej re Judá
11Jun xka'k'aal chihab' wank re laj Sedesías#36,11 Jr 27,1-22; 28,1-17. naq ki'ok cho'q awab'ej, ut junlaju chihab' kitaqlank sa' xb'een Jerusalén. 12Ab'an kixb'aanu li ink'a' nawulak chiru li Qaawa' ut ink'a' kixkub'si xwankil naq kiq'use'k xb'aan li Qaawa' chi xtz'uumal re laj Jeremías li propeet.#36,12 Jr 37-39. 13Laj Sedesías ajwi' kixq'etq'eti rib' chiru laj Nabukodonosor,#36,13 Ez 17,15. awab'ej re Babilonia, ut ink'a' chik ki'okenk chirix, us ta ak xyehom li raatin sa' jurament; kixkawub'resi b'an li xch'ool, kixjipu rib' ut ink'a' kisutq'iik rik'in li Qaawa', xYos laj Israel.
14Jo'kaneb' ajwi' chixjunileb' li xyuwa'ileb' laj tij ut eb' li poyanam: numtajenaq li maa'usilal ke'xb'aanu, jo' chanru k'aynaqeb' xb'aanunkil eb' li jalanil tenamit, ut ke'xmux li rochoch li Yos, li ak q'axtesinb'il chi xloq'oninkil ru li Qaawa' aran Jerusalén. 15Ab'an li Qaawa', xYos li xxe'toonil yuwa'eb', jwal nim li xraab'al li xtenamit ut li xloq'laj muheb'aal: kiril xtoq'ob'aal ru li xtenamit ut chalen chaq sa' xtiklajik kixtaqla naab'aleb' li xtaql chi xk'eeb'al xna'leb'eb'. 16Ab'anan eb' a'an ke'xse'e eb' li xtaql li Yos, ke'xtz'eqtaana li raatineb', ke'reetz'uhatq li xpropeet, toj reetal kichalk xjosq'il li Qaawa' rik'in li xtenamit ut maak'a' chik kikolok reheb'.
Li rochoch li Yos kisache'k ut eb' laj Judá ke'k'ame'k chi preexil
(2 R 25,8-21; Jr 39,8-10; 52,12-30)
17Toja' naq li Qaawa' kixtaqla chaq li awab'ej re Kaldeha#36,17 Jr 21,1-10; 34,1-5. chi yalok rik'ineb' laj Judá. Ut a'an kixkamsiheb' chi ch'iich' eb' li kaweb' rib', sa' rochoch li Yos, ut ink'a' kiril xtoq'ob'aal ruheb' li saaj winq, eb' li tuq'ixq, eb' li cheekel winq chi moko eb' li saq aj chik rismal xjolomeb': chixjunileb' ke'q'axtesiik xb'aan li Qaawa' sa' ruq'eb' laj Kaldeha. 18Chixjunil li k'a'aq re ru li nak'anjelak sa' rochoch li Yos, jo' kok' jo' ninq, chixjunil li xsahil eechej li Qaawa' ut li k'aru nak'anjelak re li awab'ej ut reheb' laj k'anjel chiru, kik'ame'k Babilonia. 19Ke'xk'at ajwi' li rochoch li Qaawa',#36,19 1 R 9,8. ke'xjuk' li xsuttz'akil Jerusalén, ke'xk'e xxamlel li xninqaleb' ru ochoch ut ke'xputz'i chixjunil li k'a'aq re ru jwal loq'.
20Chirix chik a'an eb' li ink'a' ke'kamsiik, ke'k'ame'k chi preexil Babilonia, ut aran ke'k'anjelak chiru li awab'ej ut chiruheb' li ralal, toj reetal eb' laj Persia ke'numtaak sa' xb'eeneb' laj Kaldeha. 21Chi jo'kan kitz'aqlok ru li xyehom li Qaawa' chi xtz'uumal re laj Jeremías li propeet: “Li na'ajej taakanaaq chi po'lemil ut taahilanq chiru lajeeb' xkaak'aal chihab', re xtojb'al rix chixjunileb' li hilob'aal kutan ink'a' ke'roxloq'i xb'enwa”.#36,21 Jr 25,11; 29,10; Zak 1,12.
Li xtaqlahom laj Siro
(Esd 1,1-4)
22Sa' li xb'een chihab' rokik laj Siro cho'q awab'ej re Persia, re naq taatz'aqloq ru li raatin li Yos kixye chi xtz'uumal re laj Jeremías, li Qaawa' kixtoch' xch'ool laj Siro, awab'ej re Persia, re naq tixtaqla xpuktesinkil li chaq'rab' a'in chi yeeb'il ut chi tz'iib'anb'il, sa' chixjunileb' li na'ajej wankatqeb' rub'el li xwankil: 23“Jo'ka'in xye laj Siro, awab'ej re Persia: Li Qaawa', xYos li choxa, xk'e rub'el linwankil chixjunileb' li tenamit sa' ruuchich'och'. Ut a'an xchaq'rab'ink we naq tinkab'la jun rochoch aran Jerusalén,#36,23 Is 44,28; 45,1-4. sa' xteepal Judá. Jo'kan utan, chejunilex li xkomonex li xtenamit li Yos naru texxik aran. Ut li Qaawa' leeYos chiwanq taxaq eerik'in!”.
Currently Selected:
2 Kr 36: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.