2 Kr 35
35
Laj Josías kixninq'ehi li Paswa
(2 R 23,21-33)
1Laj Josías kixninq'ehi li Paswa#35,1 Ex 12,1-13.21-27; Lv 23,5-8; Nm 28,16; Dt 16,1-8. sa' xk'ab'a' li Qaawa' aran Jerusalén: sa' li kaalaju xb'e li xb'een po ke'xmayeja li karneer re ninq'ehik. 2Kixk'eheb' wi' chik laj tij chi xb'aanunkil li xk'anjeleb' ut kixkawila xch'ooleb' chi k'anjelak sa' rochoch li Yos. 3Ut kixye reheb' laj Leví li neke'xtzol chixjunileb' laj Israel ut xq'axtesihomeb' rib' chi k'anjelak chiru li Qaawa': “K'ehomaq li Loq'laj Kaax sa' rochoch li Yos li kixyiib' laj Salomón, ralal laj David, awab'ej re Israel, xb'aan naq ink'a' chik teepaqo. Anaqwan k'anjelanqex chiru li Qaawa' leeYos ut chiruheb' laj Israel, li xtenamit. 4K'uub'omaq eerib' chejunqkab'alil chi k'anjelak jo' chanru leech'uutal ut jo' chanru tz'iib'anb'il xb'aan laj David, awab'ej re Israel, jo'wi' xb'aan laj Salomón, li ralal.#35,4 2 Kr 8,14. 5Chiwanq eena'aj sa' li loq'laj na'ajej, jo' chanru xmolamil li xjunqkab'aleb' leeras eeriitz'in, leerech tenamitul, ut jo' chanru xmolamileb' laj Leví. 6Chemayeja li karneer re xninq'ehinkil li Paswa, ch'ajob'resiiq eerib' ut k'uub'omaq li aajel ru cho'q reheb' leeras eeriitz'in, re naq te'xpaab' li chaq'rab'anb'ileb' wi' xb'aan li Qaawa' chi xtz'uumal re laj Moisés”.
7Chirix chik a'an laj Josías kixk'e xkok' ketomq cho'q reheb' li tenamit: kixsi lajeeb' xka'k'aal mil (30,000), jo' karneer ut chib'aat, re xninq'ehinkil li Paswa, ut lajeek'aal xwaqxaq o'q'ob' (3,000) li b'ooyx cho'q reheb' li wanqeb' aran. Chixjunil li kixsi reheb', a'an xketomq li awab'ej. 8Jo'kaneb' ajwi' li xjolomileb' li tenamit ki'alaak ajwi' sa' xch'ooleb' xk'eeb'al xmayejeb' reheb' li tenamit, reheb' laj tij ut eb' laj Leví. Laj Jilkías, laj Sakarías ut laj Jehiel, li neke'ilok re li rochoch li Yos, ke'xq'axtesi reheb' laj tij lajeek'aal xwuq o'q'ob' (2,600) li karneer ut o'lajuk'aal (300) li b'ooyx cho'q re li Paswa. 9Laj Kenanías jo' ajwi' laj Semaías ut laj Natanael li riitz'ineb', ut laj Jasabías, laj Jehiel ut laj Josabad, xjolomileb' laj Leví, ke'xsi ajwi' oob' mil li karneer ut o'k'aal xkab' o'q'ob' (500) li b'ooyx cho'q reheb' laj Leví re xninq'ehinkil li Paswa.
10Naq ak k'uub'k'u li ninq'e chi jo'ka'in, eb' laj tij jo'wi' eb' laj Leví ke'xtawaxi xna'ajeb', jo' chanru li xch'uutaleb', jo' kixye li awab'ej. 11Toja' naq ke'kamsiik li mayej re li Paswa ut, naq eb' laj tij yookeb' chi xkirkirinkil li kik' li nak'eemank reheb' xb'aaneb' laj Leví, eb' laj Leví li junch'ol chik yookeb' chi risinkil li rixeb' li xul li ke'kamsiik. 12Yookeb' ajwi' chi xjek'b'al li k'aru taak'atmanq cho'q mayej xb'aan li xjunqkab'aleb' li tenamit, re naq taamayejamanq chiru li Qaawa', jo' chanru tz'iib'anb'il sa' xhu laj Moisés. Jo'kan ajwi' ke'xb'aanu rik'ineb' li b'ooyx. 13Ke'xpom sa' ru xam li mayej re li Paswa, jo' chanru li mayejak;#35,13 Ex 12,8-9. ut li k'a' chik ru jwal loq' ke'xchiq sa'eb' li uk'al ut chi junpaat ke'xjek'i reheb' li tenamit. 14Moqon eb' laj Leví ke'xkawresi li Paswa cho'q reheb' ut reheb' ajwi' laj tij, xb'aan naq jwal laatz'eb' ru laj tij xkomoneb' laj Aharón chi mayejak ut chi xyeechi'inkil li xxeeb'ul li xul toj ki'ok q'oqyink. Jo'kan naq eb' laj Leví ke'xk'uub' li mayej cho'q reheb' ut cho'q reheb' laj tij xkomoneb' laj Aharón.
15Jo'kaneb' ajwi' laj b'ichanel, li ralaleb' laj Asaf, wankatqeb' sa' li xna'ajeb', jo' kixye laj David, laj Asaf, laj Hemán ut laj Jedutún, laj ilol moy u li kik'anjelak chiru li awab'ej.#35,15 1 Kr 25,1. Jo'kaneb' ajwi' laj ilol re kab'l, wankatqeb' sa' li xna'ajeb'; ink'a' ke'xkanab' li xk'anjeleb', xb'aan naq eb' laj Leví, li ras riitz'ineb', ke'xk'uub' li xtzekemqeb'.
16Chi kama'in kikawresiik chixjunil li xk'anjel li Qaawa' sa' li kutan a'an, re xninq'ehinkil li Paswa ut xyeechi'inkil eb' li k'atb'il mayej sa' xb'een li x'artal li Qaawa', jo' chanru kixye laj Josías li awab'ej. 17Eb' laj Israel li wankeb' aran sa' li kutan a'an, ke'xninq'ehi li Paswa ut chiru wuqub' kutan ke'xninq'ehi li xkutankil li wa ink'a' yuub'il.#35,17 Ex 12,1-20. 18Maajun wa ke'xninq'ehi li Paswa chi jo'kan eb' laj Israel, chalen naq kiwank laj Samuel li propeet; maajun junaq awab'ej kixninq'ehi li Paswa jo' kixninq'ehi laj Josías, rochb'eeneb' laj tij, eb' laj Leví ut chixjunileb' laj Judá ut eb' laj Israel li wankeb' aran, jo' ajwi' chixjunileb' laj Jerusalén. 19Ke'xninq'ehi li Paswa a'in naq ak waqxaqlaju chihab' rokik chi awab'ejink laj Josías.
Xkamik laj Josías
(2 R 23,28-30)
20Moqon chik, naq laj Josías ak kixyiib' chi us li rochoch li Yos, laj Nekó, awab'ej re Ejiipt, koho sa' xjayal li nima' Éwfrates re yalok sa' li na'ajej Karkemis; ut laj Josías ki'elk chi xk'ulb'al. 21Ab'anan laj Nekó kixtaqla xyeeb'al re: “K'aru wank we aawik'in, at awab'ej re Judá? Ink'a' xinchalk chi yalok aawik'in anaqwan, xinchalk b'an chi yalok rik'in jalan chik tenamit li xik' neke'ilok we. Ut li Qaawa' yo chinseeb'ankil. Jo'kan utan, maaram li b'e chiru li Qaawa' li wank wik'in; mare anchal tixsach aawu laa'at”.
22Ab'an laj Josías ink'a' kixjal xk'a'uxl, xb'aan naq kaw xch'ool chi yalok rik'in laj Nekó, ut ink'a' kirab'i li raatin laj Nekó, li kichalk rik'in li Yos. Jo'kan naq ke'ok chi yalok sa' xtaq'ahil Mejido. 23Eb' laj puub' re laj Nekó ke'xkuti chi simaj laj Josías li awab'ej. Toja' naq li awab'ej kixye reheb' laj k'anjel chiru. “Isihomaqin arin, xb'aan naq kamk we”. 24Tikto eb' laj k'anjel chiru ke'risi laj Josías sa' li b'eleb'aal ch'iich' wan wi' ut ke'xq'axtesi sa' li b'eleb'aal ch'iich' jun chik; ke'xk'am Jerusalén ut aran kikamk. Ke'xmuq sa' li xmuqleb'aaleb' li xna' xyuwa' ut chixjunileb' laj Judá ut eb' laj Jerusalén ke'yaab'ak chirix laj Josías. 25Laj Jeremías#35,25 Jr 1,1-2; 3,6; 22,10-15. kixk'uub' jun li b'ich re rahil ch'oolej sa' xk'ab'a' laj Josías. Chalen toj anaqwan chixjunileb' laj b'ichanel winq ut ixq neke'aatinak chirix laj Josías sa' li xb'icheb', ut k'aynaqeb' laj Israel chi xb'aanunkil a'an. Natawmank li b'ich a'in sa' xHuhil li rahil ch'oolej.
26Li xyehom ut xb'aanuhom laj Josías, chixjunil li us kixb'aanu jo' naxye li xChaq'rab' li Qaawa', 27chalen sa' xtiklajik toj sa' xraqik, tz'iib'anb'il sa' xHuhil li xyehom ut xb'aanuhomeb' li awab'ej re Israel ut Judá.
Currently Selected:
2 Kr 35: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.