1 Ts 5

Yo'oon wanqo

1Chirix li xq'ehil ut li xkutankil moko aajel ta ru naq tintz'iib'aq eerik'in, ex was wiitz'in. 2Laa'ex nekenaw chi us naq li xkutankil li Qaawa' taachalq jo' nachalk junaq aj elq' chi q'eq. 3Naq yooqeb' chi xyeeb'al: “Wanko sa' tuqtuukilal ut maak'a' chik qak'a'uxl”, toja' naq taachalq li roso'jikeb' sa' junpaat chi maak'a'aq sa' xch'ooleb', jo' naq nachalk xrahil li alank sa' xb'een li ixq; ut ink'a' naru te'eleliq chiru.

4A'ut laa'ex, ex was wiitz'in, moko sa' aak'ab' ta wankex; jo'kan naq li Kutan a'an ink'a' taachalq sa' eeb'een kama' junaq aj elq'. 5Chejunilex laa'ex ralal xk'ajolex li kutan saqenk, moko reho ta li q'oqyink chi moko reho li aak'ab'. 6Jo'kan b'i' moowark jo'keb' li junch'ol, chooyo'leq b'an ut aj'ajaq qu. 7Xb'aan naq eb' li neke'wark, chi q'eq neke'wark; ut eb' li neke'kalaak, chi q'eq neke'kalaak. 8A'ut laa'o li reho li kutan wanqo chi aj'ajaq qu, qatiqib'aq qib' rik'in li koleb' ch'iich' nak'ehe'k xb'aan li paab'aal ut li rahok; ut li qakolb'al li yooko chi royb'eninkil, a'an chik'anjelaq qe jo' ruuchil li punit ch'iich'.#5,8 Cf. Is 59,17; Ef 6,11-17. 9Li Yos ink'a' xooxk'e cho'q re li tojb'amaak, chi xtawb'al b'an li kolb'a ib' sa' xk'ab'a' li Jesukriist li Qaawa': 10a'an kikamk sa' qak'ab'a' re naq, us ta yo'yooqo us ta kamenaqo chik naq taak'ulunq, chiwanq qayu'am qochb'een A'an. 11Jo'kan naq chek'e xkawub' eech'ool ut chetenq'a eerib' cherib'il eerib', jo' li ak yookex xb'aanunkil.

Laj Pablo naxk'e xna'leb'eb' laj paab'anel ut naxchaq'rab'iheb'

12Ex qas qiitz'in, naqatz'aama cheru naq chek'ehaq sa' xnaq' eeru eb' li neke'xk'e xch'ool chi k'anjelak sa' eeyanq, eb' li neke'jolomink eere sa' xk'ab'a' li Qaawa' ut neke'xch'olob' eena'leb'.#5,12 Cf. 1 Ko 16,16; 1 Ti 5,17; Heb 13,17. 13Ka'loq' oxloq' cherileb'; cherahaqeb' sa' xk'ab'a' li xk'anjeleb'. Chexwanq sa' tuqtuukil usilal cherib'il eerib'.

14Naqatz'aama ajwi' cheru, ex qas qiitz'in, cheq'usaqeb' li sachsookeb' xna'leb'; chewaklesihaqeb' li neke'ch'inank xch'ool, chetenq'aheb' li ink'a' kaweb' xch'ool sa' xpaab'aaleb' ut chiwanq eekuyum rik'ineb' chixjunil. 15Chek'e reetal, maa'ani chi'eeqajunq maa'usilal rik'in maa'usilal, a' b'an li us cheb'aanu junelik cherib'il eerib' ut rik'ineb' chixjunil.

16Junelik sahaq eech'ool. 17Junelik chextijoq. 18Chexyoxinq chirix jo'ch'inal jo'nimal li nekek'ul, xb'aan naq a'an a'in li naraj li Yos naq teeb'aanu, sa' xk'ab'a' li Kristo Jesus.

19Meechup li Musiq'ej. 20Meetz'eqtaana eb' li neke'aatinak jo' propeet. 21Tz'ilomaq rix chixjunil ut k'uulahomaq sa' eech'ool li us. 22Chekolaq eerib' chiru chixjunil li k'a'aq re ru chi maa'usilal.

Xraqik li hu

23A' taxaq li Yos li nak'ehok li tuqtuukil usilal chisantob'resinq eere chi tz'aqal. Ut leejunxaqalil, leemusiq', leech'ool ut leetz'ejwal chiwanq taxaq chi maak'a' eeq'usb'al toj reetal sa' xk'ulunik li Qaawa' Jesukriist. 24Chaab'il A'an li nab'oqok eere, ut tixb'aanu chixjunil a'in.

25Ex qas qiitz'in, chextijoq ajwi' chiqix. 26Chek'ehaq xsahilaleb' xch'ool chixjunileb' li qas qiitz'in rik'in li santil utz'uk u.#5,26 Najter q'e kutan, sa' xtiklajik li kristiyanil, eb' laj paab'anel k'aynaqeb' chi xk'eeb'al xsahilaleb' xch'ool rik'in li tz'ub'uk. Chirix li santil utz'uk u: cf. Ro 16,16; 1 Ko 16,20; 1 P 5,14. 27Nintz'aama ut nawelaji cheru sa' xk'ab'a' li Qaawa' naq chiyaab'asimanq li hu a'in sa' xyanqeb' chixjunileb' laj paab'anel.

28Li rusilal li Qaawa' Jesukriist chiwanq taxaq eerik'in.

Currently Selected:

1 Ts 5: QQC

Highlight

Copy

Compare