1 Ko 4

Li xk'anjeleb' li apóstol

1Jo'kan utan, che'xnawaq chixjunileb' naq laa'o xmoos li Kriist ut taqlanb'ilo chi k'anjelak chirixeb' li xmuqmuukil k'a'uxl li Yos. 2Li na'ajmank ru rik'ineb' laj k'anjel, a'an naq tiikaqeb' xch'ool. 3Ab'anan laa'in maak'a' nawaj wi' naq yooqex chi xwech'inkil wix, malaj naq taatz'ilmanq aatin chiwix sa' junaq raqleb'aal aatin. Chi moko ninwech' wib' injunes! 4Laa'in naweek'a naq maak'a' inmaak, ab'anan moko naraj ta naxye naq tiik linch'ool. Laj raqol aatin sa' inb'een a'an li Qaawa'.

5Jo'kan naq mexraqok aatin chi maji' xq'ehil, toj reetal tol'elq li Qaawa'. A'an taakutanob'resinq re li k'a'aq re ru muqmu chaq sa' li aak'ab' ut tixk'utb'esi li na'alaak sa' xch'ool chixjunileb'. Toja' naq li junjunq tixk'ul xloq'al rik'in li Yos.

6Ex was wiitz'in, chixjunil li xinye,#4,6 Chixjunil li xinye a'an li wank sa' 1 Ko 3,4-9. chirix laj Apolo ut chiwix re eetenq'ankil naq xinye, re naq teetzol eerib' qik'in chirix xyaalal li aatin a'in: “Meeq'ax ru li ak tz'iib'anb'il”. Maa'ani chixnimob'resi rib' chirix junaq ut tixtz'eqtaana li jun chik, 7xb'aan naq ani xsik'ok aawu chiruheb' chixjunil? K'aru wank aawe chi ink'a' ta aak'ulum? Ut wi yal aak'ulum, k'a' put naq nakanimob'resi aawib' chanchan naq moko aak'ulum ta?

8Ak xexnujak! Ak xexb'ihomo'k! Xex'ok chi awab'ejink chi ink'a' xexqatenq'a laa'o! Us rajan naq ak ta xex'ok chi awab'ejink re naq laa'o ajwi' too'awab'ejinq eerochb'een! 9Xb'aan naq nink'oxla naq li Yos xooxkanab' laa'o li apóstol toj sa' xmaril, kama' wi' naq teneb'anb'il kamk sa' qab'een; k'eeb'ilo chi ka'yaak xb'aan chixjunil li ruuchich'och', jo'eb' li ánjel jo'eb' li tenamit. 10Laa'o maak'a' qana'leb' sa' xk'ab'a' li Kriist, ut laa'ex wank eena'leb' rik'in li Kriist. Laa'o maak'a' qametz'ew, ut laa'ex kaw eerib'. Laa'ex nim eeloq'al, ut laa'o tz'eqtaananb'ilo. 11Chalen toj anaqwan yooko chi xkuyb'al tz'okaak, chaqi'eel, t'usam; sak'b'ilo ut maak'a' qochoch. 12Naqatawasi qib' chi k'anjelak rik'in quq'. Nokoohe'xhob', ut naqusilaheb'. Nokoohe'xsik' re qarahob'tesinkil, ut naqakuy. 13Nokoohe'xmajewa, ut nokoosumenk rik'in chaab'il aatin. Chalen toj anaqwan chanchano xmulel li ruuchich'och', tz'eqtaananb'ilo xb'aaneb' chixjunil.#4,10-13 Chirix li rahilal xk'ulum chaq li apóstol: cf. 2 Ko 4,7-12; 6,4-10; 11,23-33; 2 Ti 3,10-12.

14Ink'a' nintz'iib'a chixjunil a'in yal re xk'utb'al eexutaan, re b'an xk'eeb'al eena'leb' jo'kex inraarookil alal. 15Xb'aan naq us ta wanq lajeeb'aq mil aj ch'ilom eere sa' xk'ab'a' li Kriist, ab'an moko naab'aleb' ta leeyuwa'. Sa' xk'ab'a' li Kristo Jesus laa'in xinsiyank eere xb'aan li Chaab'il Esilal. 16Nintz'aama b'i' cheru naq chek'amaq eere wik'in.

17A'in tz'aqal aj e naq xintaqla eerik'in laj Timoteo, linraarookil alal ut tiik xch'ool chi xpaab'ankil li Qaawa'. A'an tixjultika eere li xb'e li Kriist li nintaaqe laa'in, jo' chanru ninch'olob' yalaq b'ar, sa' li junjunq chi Iklees. 18Wankeb' xe'q'etq'eto'k sa' eeyanq kama' tawi' naq laa'in ink'a' tinwulaq eerik'in. 19Ab'anan tinxik chi junpaat eerik'in, wi jo'kan naraj li Qaawa'. Toja' naq toxinnaw k'aru tz'aqal neke'xnaw xb'aanunkil li q'etq'eteb' a'an li q'axal sa neke'aatinak. 20Xb'aan naq li xnimajwal awab'ejihom li Yos moko wank ta sa' k'iila aatin, rik'in b'an k'anjelak chi kaw. 21K'aru teeraj? Ma tinxik eerik'in chi wanq inche', malaj rik'in rahok ut tuulanil?

Currently Selected:

1 Ko 4: QQC

Highlight

Copy

Compare