1 Ko 3

1Ex was wiitz'in, laa'in ink'a' xinru cheraatinankil jo' aj paab'anel wank tz'aqal li Musiq'ej rik'ineb', xexwaatina b'an jo' li toj q'uneb' xch'ool, toj k'uula'alex chi xpaab'ankil li Kriist. 2Leech xink'e cheruk', ut ink'a' kawil tzekemq#3,2 Chirix li leech ut li kawil tzekemq: cf. Heb 5,12-14; 1 P 2,2. li toj maji' xexru chi xkuyb'al xtzekankil. Chi moko anaqwan ajwi' teekuy, 3xb'aan naq toj q'un leech'ool chi paab'ank. Naq toj wanq sa' eeyanq li kaqalik ut li wech'ij ib', ma ink'a' tab'i' yaal naq toj nekexk'oxlak ut nekexk'anjelak jo'kex li winq junch'ol? 4Naq naxye junaq: “Laa'in rehin laj Pablo”, ut wan wi' chik nayehok: “Laa'in rehin laj Apolo”, ma ink'a' yookex chi xb'aanunkil jo' naxye xna'leb' li ruuchich'och'?

Yal aj k'anjelo chiru li Yos

5Ani laj Apolo? Ani laj Pablo? Yal aj k'anjeleb'. Sa' xk'ab'a'eb' a'an xex'ok chi paab'ank, ut li junjunq xb'aanu li xk'anjel a' yaal chanru xk'ehe'k re xb'aan li Qaawa'. 6Laa'in xin'awok, laj Apolo xt'aqresink; ut li xk'iiresink, a'an li Yos. 7Jo'kan naq maak'a' xwankil laj awinel chi moko laj t'aqresinel; ka'ajwi' li Yos li nak'iiresink wank xwankil. 8Li na'awok ut li nat'aqresink juntaq'eeteb' xloq'al, ab'an li junjunq toxk'ul xq'ajkamunkil a' yaal chanru xk'anjelak. 9Laa'o nokook'anjelak qochb'een li Yos ut cho'q re A'an; ut laa'ex xk'aleb'aalex li Yos, xkab'lahomex li Yos.

10Jo' chanru linmaatan k'eeb'il we xb'aan li Yos, laa'in xink'e li rub'elankil li kab'l, jo' chaab'il aj jolominel re li kab'lak, ut jalan chik nakab'lak sa' xb'een. Ab'an chirilaq li junjunq chanru yo chi kab'lak, 11xb'aan naq maa'ani naru tixk'e junaq chik rub'elankil li kab'l chiru li ak wank, a' li Jesukriist. 12Ut wi yooko chi kab'lak sa' xb'een li ub'elanb'il a'in rik'in oor, plaat, chaq'alil ru pek, che', pim malaj k'im, 13li xk'anjel li junjunq toxk'utb'esiiq sa' li xnimal kutan. Xb'aan naq sa' roso'jikeb' li kutan li xam taayaloq xchaab'ilal xk'anjel li junjunq. 14Wi laak'anjel laa'at tkanaaq sa' xna'aj, taak'ul aaq'ajkamunkil; 15ab'an wi li xb'aanuhom laj k'anjel a'an taa'oso'q xb'aan li xam, ra tixk'ul li poyanam a'an. Ab'anan taakole'q: chanchan taanume'q sa' xam naq taakole'q.

16Ma ink'a' nekenaw naq laa'ex rochoch li Yos ut li xMusiq' li Yos nawank eerik'in? 17Wi ani naxjuk' li rochoch li Yos, a' ajwi' li Yos taajuk'uq re a'an, xb'aan naq li rochoch li Yos a'an sant ut a'anex laa'ex.

18Maa'ani chixb'alaq'i rib'! Wi wan junaq sa' eeyanq nareek'a naq wank xna'leb' sa' li ruuchich'och' a'in, chixb'aanuhaq rib' jo' li maak'a' naxnaw re naq tixtaw xna'leb'. 19Xb'aan naq li xnimal xk'a'uxl li ruuchich'och' a'in a'an sachalil na'leb' chiru li Yos. Tz'iib'anb'il sa' li Santil Hu: “Naxchapeb' li wankeb' xna'leb' rik'in ajwi' li xseeb'aleb'”.#3,19 Job 5,13. 20Tz'iib'anb'il ajwi': “Li Qaawa' naxnaw naq maak'a' na'ok wi' li xk'a'uxeb' li wankeb' xna'leb'”.#3,20 Sal 94,11.

21Jo'kan utan, maa'ani chixnimob'resi rib' sa' xk'ab'a'eb' li winq, xb'aan naq chixjunil li k'a'aq re ru eere laa'ex: 22laj Pablo, laj Apolo, laj Sefas, li ruuchich'och', li yu'am, li kamk, chixjunil li wank anaqwan ut li toj chaalel, chixjunil eere laa'ex; 23ut laa'ex rehex li Kriist, ut li Kriist re li Yos.

Currently Selected:

1 Ko 3: QQC

Highlight

Copy

Compare