Ezeq 1
1
Ezequiel hiw'en häp Lhawuk leniyatyajw'et
1-3Olham ohäpe Ezequiel, wet sacerdote, wet ojcha häp Buzi. Ifwalahte oi'pe tewok tä lhey Kebar lhip tä oihi häp Babilonia, oiyej wichi tä letayhfwas ihänehte häp honhat tä kalew'eta. Wet ow'en pule tä lhaich'enhi, wet häp tä ow'en Dios. Häpe nekchäm tä treinta wet iwel'a tä cuatro, häp ifwala tä cinco, wet cinco nekchämis tä tajyäme tä õ'häne honhat tä kalew'eta Babilonia häp rey Joaquín.#2~Rey 24.10-16 Wet Lhawuk iti n'o'pe takwey.
4Wet ow'enlä häp leyalh tä äytaji tä tälh tafwojyhiye, pule tä nekche, matche tä wuj. Tä nek, wet itäj tä tälho puletso, lhal y'ajlhaphä, hätet iwoye häp pelhay tä talepilhi. Wet m'ak tä ilunejlhi puletso matche tä isi, wet itäj lechowej hätet iwoye lechinaj tä õ'lejlhi tä matche tä isi. 5Wet iche cuatro häp m'ak tä ihi lechowej,#Apoc 4.6 t'isanis hätet iwoye hin'ol. 6Elh tefwaji lhetek hiw'en cuatro tate'pelis, wet cuatro lhafwis tä hiw'en. 7Lhechey tatshupichehchä, wet lepach'ol hätet iwoye häp w'asetaj lhäs lepach'ol. Wet matche tä isiche, hätet iwoye bronce tä õyäm nofwlhi tä õ'lejlhi. 8Wet takwech'ol hätet iwoye hin'ol takwech'ol tä tälhomche cuatro lhipey, ichetchufwi häp lhafwis. Hiw'en cuatro tate'pelis wet cuatro lhafwis tä hiw'en, 9wet lhafwis tijwek. Wet tä yikhen, tek itilhakche len'äyij, iyahinche t'at tä tatache.
10Häp m'ayhay tä cuatrona, lhetekpej hiw'en cuatro tate'pelis. Wet tate'pe tä ihi tä tatache hätet iwoye häp hin'o tate'pe, wet tate'pe elh tä iyej t'asi tä lefwomkat hätet iwoye häp t'owalhaj tate'pe, wet tate'pe elh tä iyej t'asi tä lets'amkat hätet iwoye häp w'asetaj tate'pe, wet tate'pe elh tä tatache lewhoyey hätet iwoye häp afwenche tä iyhäjkottaj.#Apoc 4.7 11Wet itichephä lhafwis tä hich'enhiche, wet täkwfwas lhafwis tä tijwek, wet täkwfwas lhafwis iyhäj tä hip'oyejpe häp t'isan. 12Wet nilhokej häp lhamel tä yikhen, tatache t'at häp lhip tä inukwe wet tek itilhakche len'äyij. Tataye t'at lhip tä Lhawuk lakhajyhayaj ihäne. 13Wet iche m'ak tä hätet iwoye fwiyhol tä lak'e tä iyej m'ayhayna, wok oyok, hätet iwoye n'ochäkw tä w'ahuwethä. Wet itäjtso wuj tä isi, lhal y'ajlhaphä, wet wuj lep lhayis tä tälho.#Apoc 4.5 14Wet m'ayhaytso lhamel yikhen wet tapilchehenpej wet äp yikhenpej, iläfwel hätet iwoye pelhay tä talepilhi.
15Wet tä oyahin häp m'ayhaytso tä ihi cuatro, wet ow'en tä honhate elh tefwaji iche m'ak tä iyej lhip, hätet iwoye häp kaletaj kälä. 16Wet cuatro kaletaj käläyna nichät lhamchehen wet lhäy'e lhip tä isiche, hätet iwoye häp tunte tä ika'tu tä isilataj. Wet elh tefwaji m'ak tä n'äle lech'oye tet häp chik äp elh kaletaj kälä. 17Wet tä lhamel yikhen tä cuatro, elh tatachepej t'at tä inukwe, tek itilhakche len'äyij. 18Wet lechinhas tä i'pe takäläytso atoschephä wet tanhoch'ay, wet wujpey tatelhoy tä ihi.
19Wet tä yikhen häp m'ayhayna, kaletaj käläy yikche. Wet tä nechephä, kamaj kaletaj käläy yikche t'at. 20Tä m'ayhayna yikhen, inukwe t'at len'äyij tä Dios lakhajyhayaj ne'tek inukwe. Wet kaletaj käläy äpte nechephä, yikche t'at häp lhamel, tsi lew'atshancheyaj kamaj häpe t'at m'ayhayna lew'atshancheyaj. 21Häpet tä yikhen m'ayhaytso, kaletaj käläy äpte yikhen. Wet tä takasthen, kaletaj käläy äpte takasthen. Wet tä äp nechephä tä tälh honhate, wet äp nechephä kaletaj käläy, tsi lew'atshancheyaj kamaj häpe t'at m'ayhayna lew'atshancheyaj.
22Wet iche m'ak tä iche'pe lhethey häp m'ayhayna, häte iwoye pule mat t'un wet w'awulhchä, isi, hätet iwoye tunte tä n'äl lech'oye.#Apoc 4.6 23Wet tä m'ayhayna ichufwi häp m'ak tä häte iwoye puletso, lhafwis tä ipiynhiche tijwek, wet täkwfwas iyhäj tä hip'oyejpe häp t'isan. 24Wet oläte lhafwis lepakas tä lhamel yikhen, hätet iwoye häp inät lhayis tä wus. Lepak hätet iwoye Dios tä lajit letumfwaya lepak, wet hätet iwoye sip'älis tä wujpey lepakas. Wet tä lhamel takasthen tä ileyej tä yikhen, wet nech'e lhamel itichehchä häp lhafwis.
25Wet iche n'opak tä tumpe m'ak tä hätet iwoye pule tä i'pe lhamel lhethey. 26Wet lhiptso tä ikaphä, ow'en m'ak tä hätet iwoye häp n'oniyatyajw'et tä nichätche tunte tä ifwak'an tä isilataj. Wet iche m'ak tä i'pe, hätet iwoye hin'o, tatayphä t'at. 27Wet m'ak tä ow'en, tälhe lakawakw'et tä tumphä matche tä isi, hätet iwoye lechinaj tä õ'lejlhi. Wet m'ak tä ilunejlhi hätet iwoye itäj. Wet lakawakw'et tä tumchä hätet iwoye itäj pajtha nichäte lepach'ol. Wet m'ak tä ilunejlhi leleplehyaj ihi wet isi, 28hätet iwoye lawo tä n'älehi pule chik nichäte ifwala tä iwomchä.
Mälhyej'attso tä lhain'älit Lhawuk lewujyaj tä isi,#Apoc 4.2-3 wet tä ow'en ot'upeyhchä pajtha otacho tiji honhat.
Currently Selected:
Ezeq 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.