Popular Bible Verses from Ezeq 1

Share

Wet ow'enlä häp leyalh tä äytaji tä tälh tafwojyhiye, pule tä nekche, matche tä wuj. Tä nek, wet itäj tä tälho puletso, lhal y'ajlhaphä, hätet iwoye häp pelhay tä talepilhi. Wet m'ak tä ilunejlhi puletso matche tä isi, wet itäj lechowej hätet iwoye lechinaj tä õ'lejlhi tä matche tä isi. Wet iche cuatro häp m'ak tä ihi lechowej, t'isanis hätet iwoye hin'ol. Elh tefwaji lhetek hiw'en cuatro tate'pelis, wet cuatro lhafwis tä hiw'en. Lhechey tatshupichehchä, wet lepach'ol hätet iwoye häp w'asetaj lhäs lepach'ol. Wet matche tä isiche, hätet iwoye bronce tä õyäm nofwlhi tä õ'lejlhi. Wet takwech'ol hätet iwoye hin'ol takwech'ol tä tälhomche cuatro lhipey, ichetchufwi häp lhafwis. Hiw'en cuatro tate'pelis wet cuatro lhafwis tä hiw'en, wet lhafwis tijwek. Wet tä yikhen, tek itilhakche len'äyij, iyahinche t'at tä tatache.

Häp m'ayhay tä cuatrona, lhetekpej hiw'en cuatro tate'pelis. Wet tate'pe tä ihi tä tatache hätet iwoye häp hin'o tate'pe, wet tate'pe elh tä iyej t'asi tä lefwomkat hätet iwoye häp t'owalhaj tate'pe, wet tate'pe elh tä iyej t'asi tä lets'amkat hätet iwoye häp w'asetaj tate'pe, wet tate'pe elh tä tatache lewhoyey hätet iwoye häp afwenche tä iyhäjkottaj. Wet itichephä lhafwis tä hich'enhiche, wet täkwfwas lhafwis tä tijwek, wet täkwfwas lhafwis iyhäj tä hip'oyejpe häp t'isan.