Rut 4
4
Booz iyej Rut
1Booz ihoye hupuy lepe, wichi tä lhaihutwekhen lew'et, wet itayphä. Wet hiw'enlä elh tä nekche lhip tä ihi, häpe t'at elh tä Booz pajchem'at yäme. Wet tahuyej, yok:
–Eh yaelh, ho kana, tayphä.
Wet lham ihoye wet itayphä. 2Wet Booz nech'e t'äne diez hin'ol tä thänhäy tä ihi hupuy wet tahuyej lhamel, yok:
–Taychephä kana.
Wet lhamel itaychephä. 3Wet nech'e Booz tahuyej elh, yok:
–Noemí pil naji tälhe honhat tä Moab, iwatläk iwom laka honhat lhip tä lewuk naji n'aelh Elimelec. 4Olham otichunhayaj tä owo asiläta yämlek lehanej. Wet ofwen amho, chik lewatläk lechäj, lefwen yämlek lhamel tä ikana iläte ämet, lhäy'e hin'ol tä thänhäy. Chik lewatläk lechäj, lechäj. Chik kawatahläk lechäj, lefwen n'oho yämlek ohanej. Tsi newache elh chik ihanhiyeja chik ichäjla chik kahäpeya am, wet nech'e häpe olham.
Elh ichulho, yok:
–Ochäjla.
5Wet Booz nech'e yok:
–Chik lechäj Noemí laka honhat, iwatläk lethatlä tä lechuma Rut, häp atsinha tesa tä tälhe Moab, yämlek hin'o p'itsek lhey kamaj iyej t'at laka honhat.
6Tä elh iläte, wet yok:
–Kha, tek okalhi chik ochäj, tsi elat nem olewuk m'ak tä in'oyej athana. Is chik am tä lechuma, tsi olham oleyej tä ochäj.
7Häp fwalas tä pajche p'ante, iche Israel lhayis lakey tä elh ilanhi lenisäj wet hiw'enho elh. Häp täja hin'älit tä iwom m'ak tä lewuk, wet yäm kalelhäj m'ak tä iwoye. 8Tä mälhyejtso, elh ilanhi lenisäj wet hiw'enho Booz wet yok:
–Is chik am tä lechäj honhat.
9Wet Booz nech'e tahuyej hin'ol tä thänhäy lhäy'e ilhokej wichi wet yok:
–Amel ahäpehen iyhäj tä lelätay n'oye wet lew'enay fwalana tä ochäj tä tälhe Noemí ilhokej m'ayhay tä lewuk naji Elimelec lhäy'e m'ak tä lewuk leles Quilión lhäy'e Mahlón. 10Häte ochuma Rut, häp atsinha tesa tä Mahlón lech'efwa p'ante tä tälhe Moab, wet oyen och'efwaya. Tä mälhyejtso, hin'o p'itsek lhey kamaj ihiyeja t'at honhat tä oyämetso, wet nitäya tä iyej lepuhfwas lhäy'e wichi.#Deut 25.5-6 Amel ahäpehen iyhäj tä lelätay n'oye wet lew'enay m'ak tä owoye fwalana.
11Wet hin'ol tä thänhäy lhäy'e ilhokej wichi iyhäj yok:
–Matche, olhamel oläte wet ow'en t'at. Wet häp atsinhatso tä tiyäjihola haw'et, is chik Lhawuk itiyej lakäpfwayaj tä is, yämlek häte iwoye Raquel lhäy'e Lea p'ante, häpe tä y'atälhe tä n'ahäpehen Israel lhayis.#Gén 35.22-26 Is chik han'ohyaj ihi tä lhehi Efrata wet yämlek letoyaj ihi ey tä lhehi Belén. 12Is chik Lhawuk hiw'en amho ales tä tälhe atsinha lhutshatso. Is chik haw'et häte iwoye Fares lew'et, häp hin'o p'ante lhokwey häpe Judá lhäy'e Tamar.#Gén 38.27-29
Rut iwo lhäsa
13Tä mälhyejtso, Booz ichuma Rut wet iyej. Wet Lhawuk itichunche Rut, nech'e hich'otshan, wet iwo lhäsa. 14Wet nech'e atsinhay lhamel yämeje Noemí, yok:
–¡Lewujyaj ihi Lhawuk tä hiw'en amho acheyäs fwalana häpkhilek t'u ame! ¡Is chik letoyaj ihi tä ihi ilhokej Israel! 15Lham aikhajyenla wet hich'otla ame chik athaläkw. Tsi häpe atiche Rut tä lhäs, häp atsinha lhutsha tä wuj tä aihumin, laha inu'pe siete ales tä hin'ol.
16Wet Noemí ichuma häp han'äfwaj, ipalak, wet lham tä t'uye lhäy'e tä ichihelit. 17Wet atsinhay tä lew'etfwas iwo lheya han'äfwaj, lhamel yok:
–Nech'e lhäs ihi Noemí.
Wet lhamel yen lheya Obed, lham häpe p'ante Isaí lajcha wet David lechäti.
Häp David lechätilis p'ante
18Häp täja lheyes häp wichi tä tälhe Fares p'ante:
Fares lhäs Hesrón,
19Hesrón lhäs Ram,
Ram lhäs Aminadab,
20Aminadab lhäs Nahasón,
Nahasón lhäs Salmón,
21Salmón lhäs Booz,
Booz lhäs Obed,
22Obed lhäs Isaí,
wet Isaí lhäs David.
Currently Selected:
Rut 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.