Rut 3
3
Rut ihoye Booz
1Iche fwala tä Noemí tahuyej Rut tä yok:
–Yäse, is chik ot'ukwe am hach'efwa yämlek ais alhoho. 2Lhek tetshanya häp n'aelh Booz tä lhekchepej lakawos tsinhay tä lechumlhi. Honatsina ihohiyela honhat tä yachuyaj ihi, isaphihila cebada wet hiw'enhathenla huphas tä lhahi. 3Tä mälhyejtso, nay, a'enlhi, w'uyhi akay'uche tä isilataj wet hoye lechumetw'et. Mat yej alepäyne Booz yämlek ileyej tä t'ek lhäy'e tä iyä. 4Chik imä, tetshan lhip tä imähi wet hoye, tonphä wesaj lhip tä tumejlä lepach'olh wet lemähi. Wet lham ifwenla amho m'ak tä lewohiyela.
5Wet Rut ichulho lakatela, yok:
–Owohiyela ilhokej m'ak tä lefwen n'oho.
6Wet Rut nech'e ihoye honhat tä yachuyaj ihi wet iwoye ilhokej m'ak tä lakatela ne'tek iwoye. 7Häp tä Booz pajche t'ek lhäy'e tä iyä, wet n'älej tä käjlhi, wet imäwhäye yachuyaj lhoy tä õskonek. Wet Rut nech'e lhaitännhänhaj tä ihoye, itonphä wesaj lhip tä tumejlä lepach'olhe wet imähi. 8Wet häp tä honatsi chowej Booz lhaitilhkat tä imä, wet iseltej tä hiw'en atsinha tä imä lekäläye. 9Wet nech'e y'ätshene, yok:
–¿Atsi tä ahäpe?
Wet atsinha ichulho, yok:
–Ohäpe Rut tä akawon'o. Tä ahäpe oelh tä iwoye chik hich'ot n'oye, owatläk lechum n'oye, lhenn'o hach'efwaya.
10Tä Booz iläte, wet yok:
–Is chik Lhawuk ikäpfway ame, yäse. ¡Wuj tä is m'ak tä lewoyena, inu'pe m'ak tä is tä pajche lewoyeje akatela! Tsi tek lewatlä mamse, häp elh tä hiw'en m'ayek wok elh tä niw'ena m'ayek. 11Wet athana, yäse, yej noway. Olham owohiyeja ame ilhokej m'ak tä lene'tek owoye. Tsi ilhokej wichi tä ihi hupuyna tä ow'et, lhamel itäfwel amej, ihanej tä ahäpe atsinha tä is tä lehusek ihi. 12Mat tej tä ohäpe aelh tä iwoye chik hich'ot ame, iche aelh tä lhäy'e lhip tä tumej ahilä. 13Mälhe kana honatsina, wet chik fwala chik lham ichum ame wet hich'ot ame, is t'at. Mat chik niwoyaye tä ichum ahilä, ofwen amho olhämet tä oihi tä Lhawuk itayche, häp Elh tä n'ilataj, oyok, Olhamlak owoye. Athana lemä yämlek fwala.
14Mälhyejtso tä Rut imähi tä Booz lekäläye. Wet inephä tä kamaj honatsi i'pe honhat, yämlek newache elh tä hiw'enche tä Booz lhäy'e ihi. Tsi ifwenho, yok:
–Isit'ak wichi ihanej tä iche atsinha tä ihoye ochumetw'et.
15Häte Booz tahuyej, yok:
–Atsa haw'uy tä wesaj lhip tä i'atape wet akwey t'untej tä letsoklhi.
Wet lham iwoye, wet Booz itetshanej tä seis lewaylhahthis tä ithatho cebada lhoy, häp cuarenta kilos. Wet hich'ote tä ithat letape lelhuk, wet Rut nech'e yik, yäple hupuy.
16Tä ichäte lakatela, lham y'ätshene, yok:
–¿Chiwoye, yäse?
Wet Rut ifwenho ilhokej m'ak tä hin'o iwoye tä hich'ote häp lham, 17wet yok:
–Hiw'en n'oho cebada lhoyna tä wuj, tsi yok, “Tek is chik w'et lhäple akatela tä tek wo m'ak chik lechäj.”
18Wet Noemí nech'e ifwenho tä yok:
–Yäse, taye athana yämlek lehanej m'ak tä ihichela. Tsi hin'otso tek letamsek ihihla yämlek kalelhäj m'ak tä iwohiyela fwalana.
Currently Selected:
Rut 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.