Rom 10
10
1Ipuhfwas, häp m'ak tä lhamya tä oyen tichunhayaja tä ihi ohusek, lhäy'e tä ot'alhejepej Dios, häpe t'at chik opuhfwas Israel lhayis nichätho lefwayhyaj. 2Olham ow'en tä matche tä lhamel t'uhläk lhay'amkatej Dios, mat häpkhit'a letäfwnhayaj tä matche. 3Tsi Dios t'at tä hi'isyenhen wichi. Mat tä Israel lhayis nhanayej täjtso wet fwetaj m'ak tä isej häpe m'ak tä lhamel t'at tä iwoye, wet tek lhayachaje Dios yämthilek hi'isyenhen. 4Tsi Ley p'ante tälhe Moisés wak'alh t'at häp tä isej Cristo, wet elh chik häpe chik ichaye Cristo, Dios hi'isyen t'at.
Nilhokej wichi tä t'änch'oye Lhawuk tafwayhihena
5Häp elh tä iwoye Ley p'ante tälhe Moisés häpkhilek Dios hi'isyenej, Moisés yop'antekwe, “Elh chik iwoye n'olhämtes tä häpe Ley, iläyhla.”#Lev 18.5 6-7Mat tä äp yäme p'ante m'ak chik elh tä iwo lechayaja isej, wet yok, “Yej tihi ahusek chik lhok, ¿Atsihilak tiyäj puleye?, wok, ¿Atsihilak tiyäj honhatch'oye?” (Tsi täjtso mälhyej chik ot'uhläk Cristo inuhchä, wok ot'uhläk Cristo äp yachajo tä inuphä tä tälho n'op'itseyhay.) 8Wet Moisés y'isej p'ante tä yok, “Häp Dios lhämet tek atofwe ahilä, ihi t'at ahusek wet ihi t'at hak'aj.”#Deut 30.12-14 Wet Dios lhämetna, häp tä olhamel oyenpej osilätyaja tä yäme häp n'ochayaj. 9Wet chik lhen ämeta tä Jesús häpe Lhawuk, wet ihi ahusek tä lechaye tä Dios inuhatphä tä tälho n'op'itseyhay, letafwayhla. 10Tsi otihi ohusek ochayaj yämthilek Dios hi'isyenn'o, wet oyen lhämeta ochayaj yämthilek otfway.
11Dios lhämet tä ihi Lehi yok, “Elh chik häpe chik ichaye, ihichet'ala m'ak chik lhaifwech'enejlhi.”#Isa 28.16 12Täja y'aje nilhokej wichi, häp Judío lhayis lhäy'e iyhäj tä kahäpeya, hätet iwoye. Tsi weihalha Lhawuk tä nilhokej lewuk, wet elhpej chik häpe chik t'änch'oye, wuj lakäpfwayajay tä isen tä lham itiyej. 13Tsi lhämet lhip elh yok, “Nilhokej häp lhamel tä t'änch'oye Lhawuk, tafwayhihena.”#Joel 2.32
14Mat oyok, ¿chip iwoyek t'änch'oye Lhawuk, tä nichayaye? ¿Wet chip iwoyek ichaye, tä nilätayek õyäme? ¿Wet chip iwoyek iläte, tä neya katsik yen silätyaja? 15¿Wet chip iwoyek lewos yen silätyaja, tä neya katsik ichen? Mälhyej Dios lhämet tä ihi Lehi tä yok, “¡Wuj tä is tä nämhen iyhäj tä nekchufwi n'osilätyaj tä is!”#Isa 52.7
16Mat oyok, nilhokhiyejt'a tä tach'ahuye n'osilätyajna. Mälhyej tä Isaías p'ante yok, “Iwuk, ¿atsi tä ichaye m'ak tä olhamel owo silätayej?”#Isa 53.1; Juan 12.37-38 17Wet matche, n'ochayaj tälho m'ak tä õ'läte, wet m'ak tä õ'läte häpe t'at Dios silätyaj tä yäme Cristo.
18Mat oyok, ¿etp'i Israel lhayis nilätaye p'iya häp Dios silätyajna? Mathichet'a, iläte t'at. Tsi Dios lhämet lhip elh yok:
“Nilhokpe honhat tä Dios lhämetwos lepak tumho,
yäk lhämtes nichäte häp lhip tä lepese.”#Sal 19.4
19Mat äp oyok, ¿etp'i Israel lhayis nhanayej lhämtestso p'iya? Mathichet'a, ihanej t'at. Tsi chunkat Moisés yop'antekwe:
“Häp wichi tä kahäpeya oka wichi
tamenla amejen chik a'aschentses, yokwe Lhawuk.
Häp wichi tä naj lehuseya
tamenla amejen chik awäk ihi.”#Deut 32.21
20Wet tä äp paj, Isaías ifwunhiyejphät'a lhämet tä yok:
“Häp wichi tä nit'uya n'okwe,
lhamel tä hiw'enn'o, yokwe Lhawuk.
Häp iyhäj tä nity'ätshanalhi n'oyej,
lhamel tä olhain'ältej.”#Isa 65.1
21Mat tä yäme häp Israel lhayis, Isaías yop'antekwe Dios lhämet:
“Ifwala imälhewek tä opiyne otkweyey
tä ot'äne lhamel tä kachuhantses
lhäy'e tä äkleyhtses.”#Isa 65.2
Currently Selected:
Rom 10: WCHB
Highlight
Copy
Compare
Share
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.
