Apoc 1
1
Häp m'ak tä tälhe Dios, tä Jesucristo ipäyne lakawo Juan
1Häp täja m'ak tä Dios hiw'enho Jesucristo yämlek ipäyne lakawos m'ayhay tä ihichelat thahya. Jesucristo hin'älit, häp tä ichen laka ángel, ne'tek ipäyne lakawo Juan, 2wet Juan yen lhämeta nilhokej m'ak tä hiw'en. Häp täja lelesaynek tä yäme Dios lhämettso lhäy'e m'ak tä matche tä Jesucristo yen silätyaja.
3Dios lakäpfwayaj tä is iyej elh chik yahyen n'olesaynekna tä häpe n'osilätyaj tä tälhe Dios. Häte lakäpfwayaj iyej iyhäj chik iläte wet iwoye m'ak tä õ'lesayenna, tsi tott'a alhoho lewhäy.
Juan ichene len'okhayaj siete iglesias
4Olham Juan ochene olhämetna häp siete iglesias tä ihi Asia. Is chik i'amejen Dios lep'altsenyaj lhäy'e atamsek tä tälhe lham tä häpe Elh tä n'ilataj,#Éx 3.14 wet pajche iche, wet äp nämla, lhäy'e tä tälhe siete espíritu lhayis tä ihi tä lham leniyatyaj tatache. 5Häte tälhe t'at Jesucristo tä häpe Lesilätyajwo tä afwtintsaj, häp lham tä ichun tä inuphä tä tälho n'op'itseyhay,#Ap.Lh 26.23; Col 1.18 wet nilhokej niyatey tä ihonhatena laka Niyat t'at. Häp lham ihumnhen n'amel, wet itsäyhchä p'ante lew'oyis wet y'il, yämlek ifwayhat n'amejen lhasukyajay, 6wet n'ayen niyateya, n'ayen häpeya Lajcha Dios laka n'ohusewos.#Éx 19.6; Apoc 5.10; 20.6 ¡Is chik lewujyaj tä isi lhäy'e lakhajyhayaj iyej yämlek tiyäj'attsiy! Amén.
7¡Lhek yahinya, nek t'at Cristo, i'pe pules!#Dan 7.13; Mat 24.30; 1~Tes 4.17
Nilhokej wichi hiw'enla, häte lhamelte ilän,
wet nilhokej wichi tä i'pe honhat lelhakli ihihila
wet tafwichelahchä chik hiw'en.#Zac 12.10; Mat 24.30
Häp tä mälhhiyejattso. Amén.
8“Ohäpe Elh tä ichun, wet äp ohäpe Elh tä ilepese”,#Isa 41.4; 44.6; Apoc 1.17; 22.13 yokwe Lhawuk Dios tä naj letumfwaya, häp Elh tä n'ilataj, wet pajche iche, wet äp nämla.
Juan hiw'enpe Cristo lesilatyaj
9Olham Juan ohäpe amel apuhfwayej Jesús, wet y'ap'akejwek Dios Niyatyaj lhäy'e lhateläythayaj, mat häte lhakhajyhayaj yämlek y'akalhi tä y'ateläytej t'at. Õ'tihte n'ohi lhiletaj tä lhey Patmos, häp tä oyen lhämeta Dios lhämet lhäy'e m'ak tä matche tä Jesús yen silätyaja tä tamente n'oyej. 10Wet häp ifwala tä häpe Lhawuk laka ifwala, oihi t'at Espíritu tä T'amajchet lakhajyhayaj. Wet oläte n'opak tä äytaji tä tum ow'echehi, hätet iwoye n'ofwol trompeta, 11tä tahuy n'oye tä yok:
–Lesayen m'ak tä lew'en wet tihi libro, wet chenela siete iglesias tä ihi Asia, häp iglesia tä ihi Éfeso, lhäy'e Esmirna, lhäy'e Pérgamo, lhäy'e Tiatira, lhäy'e Sardis, lhäy'e Filadelfia, lhäy'e Laodicea.
12Wet tä ontilhak ow'echehi tä ot'uhläk ow'en elh tä tahuy n'oye, ow'en siete n'ochäkwhis tä oro. 13Wet ihi lechowej ow'en elh tä hätet iwoye hin'o,#Dan 7.13 lew'uy tä pitaj hip'o'pe lepach'ol, wet inayhtejpe let'okwe lep'ot tä oro. 14Lew'ole ipelaj hätet iwoye tson'ataj w'ole,#Dan 7.9 lhäy'e lhip tä ipelaj, wet tatelhoy hätet iwoye itäj lhal tä y'uho. 15Wet lepach'ol isiche t'at, hätet iwoye chinaj tä bronce tä õ'lejlhi tä õ'tulelh tä tälho n'onhonthi.#Dan 10.5-6 Wet lhäy'e lhip tä äytaji lepak, hätet iwoye inät lepak tä nitsäyhchä tä tälhpe chenaj. 16Wet siete katetsel tä ihi takwey tä lefwomkat, wet lefwajnhat tä y'uy tä lhayhil täkwfwas tälhche lak'aj, wet tate'pe isi, hätet iwoye fwala tä wuj tä isi.
17Tä ow'en, onchätwhäye lepach'ol, ohätet iwoyek oy'il t'at. Mat lham iti n'o'pe takwey tä lefwomkat wet yok:
–Yej noway. Ohäpe Elh tä ichun lhäy'e tä lepes,#Isa 41.4; 44.6; 48.12; Apoc 1.8; 2.8; 22.13 18wet äp iläy. Oy'ilte, mat lhek yahinya, oläy t'at yämlek tiyäj'attsiy, wet olham tä in'oyej N'ot'ilek niyatyaj laka llaves. 19Lesayen m'ak tä lew'en, m'ak tä iche athana lhäy'e m'ak tä ihichela chik paj. 20Häp m'ak tä lew'en, häpet siete katetsel tä ihi otkwey tä ofwomkat, lhäy'e siete n'ochäkwhis tä oro, häp siete katetsel häpe siete ángeles tä ihiche siete iglesias, wet siete n'ochäkwhis häpe siete iglesias.
Currently Selected:
Apoc 1: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.