Fil 4
4
Yej leyej tä alekäsyenejwethä Lhawuk
1Tä mälhyejtso, ipuhfwas tä oalehumnhay, häp amel tä owo yiya lhäy'e tä lekäjyenlhin'o tä ahäpe okaha tä okalhi, ofwel amhohen, oyok, Ihumnhay, tujlhache t'at mälhyej tä lewoye, yej leyej Lhawuk.
2Olhaip'altsen amehen, Evodia lhäy'e Síntique, leyayej tä letataywek. Is che w'awulhchä atichunhayaj tä alepuhfwasej Lhawuk. 3Wet am tä ahäpe och'otfwa tä let'ifwti n'oyej tä y'ehi lhachumet, ot'alhej ame, Ch'otehen atsinhaytso, tsi lhamel wuj tä lhaip'ajtit n'oyej tä owo ka'tshayaja'pe Dios Silätyaj tä Is, lhäy'e Clemente, lhäy'e iyhäj och'otfwas. Nilhokej lhamel lheyes pajche ihi n'olesaynekhi tä wichi tä ikatej lew'atshancheyaj tä t'un lheyes ihi.
4Yej leyayej tä alekäsyenejwethä Lhawuk. Oyachajo: ¡Akäsyenwethä! 5Päyne nilhokej wichi tä ahäpehen iyhäj tä lechowhal ihi. Lhawuk tott'a alhoho.
6Yej lhenay alhakliya m'ak at che häpe, mat wopej alhyaja, fwenhopej Dios häp m'ak tä lewatlä, wet ísej aka gracias.#Col 4.2; 1~Tes 5.17-18 7Wet n'otamsek tä tälhe Dios, tä häpe m'ak tä inu'pe nilhokej n'ohanyaj, t'amajiyeja ahusey lhäy'e atichunhayajay, häp tä lep'akayej Cristo Jesús.
Enaypej atichunhayaja m'ayhay tä isen
8Ilepese, ipuhfwas, oyok, Häp m'ak at che häpe tä matche, lhäy'e m'ak at che häpe tä t'uhawetej che õ'wunit, lhäy'e m'ak at che häpe tä is alhoho, lhäy'e m'ak at che häpe tä ts'ilak, lhäy'e m'ak at che häpe tä õ'humin, lhäy'e m'ak at che häpe tä õ'toyne tä is, oyok, Enaypej atichunhayaja m'ayhayna. Wok oyok, häp m'ak at che häpe tä is lhäy'e tä t'uhawetej che õ'wujyen, woyaypej ahuseya'pe.
9Häp m'ak tä ochufwente amejen lhäy'e tä one'tek lewoyaye, enaypej achumyaja. Woyaye t'at m'ak tä ofwel amhohen lhäy'e tä lew'enaypej tä oyenlhi. Wet Dios tä n'otamsek tälhe, ihla amejen.
Pablo iwo graciasayej Dios leles häp t'awayhat
10Wuj tä okäjejlhi häp Lhawuk tä amel lhachajo tä letichunayej n'oye hat'uhyaj. Häpkhit'a che oyok, amel lep'ethatay n'ohlä, tsi ohanej tä fwalas tä tajyämetso, atha amhohen yämlek letach'otay n'oye. 11Mat yej lhenayek owoynejetso olhämet häp tä op'elitsaj t'at. Kha, tsi pajche olhaihoyantej tä oyok, Naya t'at m'ak tä in'oyej. 12Wet ow'enpe tä oihi tä n'am w'en m'ayek, wet äpte ow'enpe tä wuj okäywet tä in'oyej. Fwala che häpe wet honhat che häpe che oihi, olhaihoyantej tä otamsek ihi, che ow'en olhäk tä naya wok tej che onchuyu, che ow'en m'ak tä tafwaype m'ak tä owatlä wok tej che niwohit m'akfwaj che oisej. 13Okhajyhayaj ihi wet otumpejlä nilhokej m'ayhay, häp tä isej Cristo tä ikhajyenn'o. 14Mat is m'ak tä amel lewoyaye tä alep'ajtit n'oyej tä oteläythayaj in'oyej.
15Amel tä haw'et Filipos wuj tä lehanayej, täjte otälhe Macedonia häp fwalas tä owo tesa tä oyen lhämeta Dios Silätyaj tä Is, ihichet'a Dios leles iyhäj tä ichen n'oye m'ak tä ot'isan isej, tajlhamat amel, tä hätet iwoyek lew'enay n'oho'pe m'ak tä ahusey pajche isej.#2~Cor 11.9 16Häte tä oihihte Tesalónica,#Ap.Lh 17.1 nitäkwche tä lechenay n'oye m'ak tä oisej. 17Häpkhit'a tä ot'ukwepej otw'ayhtes, mat owatläk Dios hiw'enpej amhohenpe hach'otyaj tä letipej n'oyej, häp lham lakäpfwayaj tä is. 18Tsi pajche okatej nilhokej m'ak tä lechenay n'oye, wet imälhehi lhip. Häp m'ak tä Epafrodito ihännaj n'oye tä tälhe amel, wuj tä naya n'oyej. Hätet iwoye m'ak tä lenij akäjche tä õyen t'awayhata Dios, tä ikänitlhi häp lham. 19Wet Dios hiw'enla amhohen nilhokej m'ak tä tatäy amejen, itälhthihola lakäywet tä wuj häp tä isej Cristo Jesús. 20¡Is che lewujyaj iyej Lhajcha Dios yämlek tiyäj'attsiy! Amén.
Pablo len'okhayaj tä lepes
21Ochene on'okhayaj nilhokej Dios leles, häp lhamel tä hap'akej Cristo Jesús. Häp lhapuhfwas tä in'oyej ichen amehen len'okhayaj. 22Häte nilhokej Dios leles ithat amehen len'okhayaj, wet häp lhamel tä ichumhoplhi lhaka niyat Romano lhäy'e lhip tä ichen amehen len'okhayaj.
23Is che Lhawuk Jesucristo lep'altsenyaj iyej ahusey.
Currently Selected:
Fil 4: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.