Fil 3
3
M'ak tä matche tä laha ihi
1Athana ipuhfwas, akäsyenejwethä Lhawuk.
Tek oy'elej tä oyachajo olhämetnaj ochen amehen, häpkhilek alhämay hin'ohlä m'ak tä oyämena tä oyok, 2Uyayhlä hin'ol tä hätet iwoye asinhäs, häp lhamel tä iwoye m'ak tä ni'isa wet inityenej iyhäj yämthilek iwo lhijtsekayej t'isanis. 3Mat wichi tä matche tä n'otetnek tä n'olhijtsek iyej,#Rom 2.28-29; Gál 6.14-15; Col 2.11-13 häpe t'at n'amel. Tsi n'otetnekna iyej lhahusey, häp tä n'amel y'an'okwiyej Dios tä n'aisej laka Espíritu, wet n'akäsejwethä Cristo Jesús, wet y'at'ekhahiyet'a m'ayhay tä tumphä tä wichi iti lhamejen.
4Tej tä olham, iche t'at m'ayhay tä t'uhawetej yämthilek ot'ekhaye. Chik iche elh chik häpe chik fwetaj iche m'ayhay tä t'ekhayej lhame, oyok, Olham onu'pe elhtso chik ot'ekhahiye m'ayhay tä in'oyej. 5Tsi tä ow'en p'ante ocho ifwalas tä nech'e oiche, õ'ti n'oyej n'otetnek tä õyiset ot'äj lhip. Ohäpe t'at Israel lhayis lhäs, otälhe Benjamín laka wichi.#Rom 11.1 Ohäpe Hebreo tä lhamya, tsi Hebreo lhayis tä lhäsn'o. Ohäpehte Fariseo,#Ap.Lh 23.6; 26.5 lhäy'e lhip tä ohanej Ley p'ante tälhe Moisés, wuj tä owunit. 6Wet tä oyäm tefwajni tä owoye, häp tä tamenej tä owo ka'tshayajayej lhamel tä iwo lheya Jesús.#Ap.Lh 8.3; 9.1-2; 22.4; 26.9-11 Wet tä ofwetaj olha'isyenej Ley p'ante tälhe Moisés, ihichet'a elh chik häpe tä yäme tä otes ihi.
7Matkat nilhokej m'ayhayna tä ofwetaj oisejte, oyen w'et m'ayeka athana, tsi olhay'amkatej Cristo. 8Wet äp oyok, Nilhokej m'ayhay oyen w'et m'ayeka, yämthilek otäfwelej Owuk Cristo Jesús, tsi häp tä lhäy'e lhip tä laha ihi. Cristo tä tamenej tä owom nilhokej, wet oyen at häpeya m'ak tä hätet iwoye hup mok, yämthilek oti lhamej häp lham 9wet olhaip'ajtej. Nemhit ofwetaj oisej tä owoye Ley p'ante tälhe Moisés wet o'isyaj in'oyej. Mat athana oisej ochayaj tä otiyej Cristo, tsi häp tä Dios hi'isyenej wichi lhamel lechayaj. 10Owatläk wuj tä otäfwelej Cristo, wet ot'uhläk olät lhame tä in'ohi lakhajyhayaj p'ante inuhatphä tä tälho n'op'itseyhay. Owatläk olhaiw'en tä otn'isej leteläythayajay p'ante, häpkhilek omälhyet iwoye lham tä y'il, 11wet oniwhayaj in'oyej tä onuhiphäla chik otälho n'op'itseyhay.
Pablo lhaikhajyen yämthilek ikatej t'awayhat tä laha
12Tek ofwetaj pajche okalhi m'ayhayna, wok wak'alh o'isyaj. Mat olhaikhajyen tä owatläk osakanej, tsi häp tä tamenej tä ichun tä Cristo isakan n'oyej. 13Ipuhfwas, tek oyäme tä ofwetaj pajche osakanej. Mat m'ak tefwajni tä owoye, op'ethatlä wet nemhit otetshan m'ayhay tä i'ow'echehi, mat olhainityene m'ak tä ihi tä ottache. 14Olhaikhajyen tä otiyäje lepes, yämthilek okalhi otw'ayhat tä laha tä ikaphä tä Dios t'änej n'amehen, häp tä n'aisej Cristo Jesús.
15Nilhokej n'amel tä wak'alh lhachayaj, is chik mälhyejtso lhatichunhayaj. Mat chik w'enha lhamej amel atichunhayaj, Dios ihanthila amejen m'ak tä oyäme. 16Mat n'atetshan lhan'äyij tä y'anekche yäk athana, wet n'atujlhache t'at.
17Ipuhfwas, tenayn'o, wet tetshan lhamel tä iwoye m'ak tä olhamel one'tek amel lewoyaye. 18Tsi pajche ofwelpej amhohen, wet oyachajo athana, wet otafwlhi tä oyok, Iche wujpe iyhäj tä itayhlä Cristo laka cruz. 19Mat nofwila t'at lhamel. Lhamel yen häpeya laka dios m'ak tä ikänch'oye, wet tek n'äfwelhpe lakeyes tä iwoye, mat lhaichäjejwethä, wet tajlhama m'ayhay tä lew'et honhat tä yenpej tichunhayaja.
20Mat häp n'amel n'ahäpehen wichi tä lew'et pule, wet y'anihihlä Lhafwayhthi chik nämla tä tälh puleye, häp Lhawuk Jesucristo. 21Lham iwohla elha lhat'isanis tä nit'una, häpkhilek hätehla iwoye lham t'isan tä lesilatyaj ihi,#1~Cor 15.48,53 häp tä isej lakhajyhayaj tä lhayen lewuka nilhokej m'ayhay.
Currently Selected:
Fil 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.