Mar 16
16
Jesús inuphä tä tälho n'op'itseyhay
(Mat 28.1-10; Luc 24.1-12; Juan 20.1-10)
1Tä tajyäme ifwala tä n'ot'elakw'et, María Magdalena lhäy'e Salomé, lhäy'e María elh tä Santiago lako, lhamel ichäj m'ayhay tä lenij akäjche yämlek y'ilenche Jesús lep'itsek. 2Wet häp ifwala tä ichunpe semana lhamel yikhen tä nech'e fwamlafwaj tä ihoye n'op'itsekw'et. 3Tä ihi n'äyij, elh tahuyejpej elh wet yok:
–¿Atsihilak ihut kanhi tunte tä ihi n'op'itsekw'et lepe?
4Mat tä lhamel nichäte, iyahin wet hiw'en tä pajche õ'hutej kanhi. 5Wet lhamel ihochufwi wet hiw'en häp mamse tä lew'uy pitaj wet pelaj tä tatayhiphä lhip tä lefwomkat. Wet lhamel inuhat lhamhohen, 6mat mamse tahuyej wet yok:
–Yej nowayay. Ohanej tä let'uyaykwe Jesús tä Nazaret lhelenaj õhp'ajtej cruz. Ihit'a kana, inuphä tä tälho n'op'itseyhay. Lhek yahnho täjnaj õ'tihi. 7Mäyay fwenho Pedro lhäy'e lechufwenkay iyhäj, olak, “Lhawuk inuphä, wet lew'enayhla kanhi Galileaye tsi pajichela ihi, mälhyej tä ifwelnaj amhohen.”#Mar 14.28
8Wet atsinhay lhaiteläfwithen tä yikch'oye n'op'itsekw'et, tsi inuhat lhamhohen wet chettichehen. Wet niwohit m'ak chik ifwenho elh chik häpe, häp tä nowayhen.
N'OLESAYNEKWO ELH P'ANTE, HÄPKHIT'A MARCOS, Y'ISEJ LHÄMTESNA
Jesús lhahin'ältej María Magdalena
(Juan 20.11-18)
9Tä mälhyejtso, Jesús inuphä tä tälho n'op'itseyhay häp ifwala tä ichunpe semana tä kamaj ifwala tojchä. Wet ichun tä lhahin'ältej häp María Magdalena tä pajche p'ante lham inuhatchephä siete ahät lhayis tä ihi. 10Wet atsinhatso yik tä ifwenho Jesús let'unfwas. Lhamel wuj tä lefwitajayaj ihi wet tafwchehchä, 11wet tä iläte tä Jesús iläy wet tä atsinha hiw'enn'e, lhamel tek imatitche.
Jesús lhahin'ältej täkwfwas lechufwenkay
(Luc 24.13-35)
12Tä paj wet iche täkwfwas lechufwenkay tä yikhen tä ihoye lhip elh, wet Jesús lhahin'ältej lhamel, mat w'enha lhamej. 13Wet lhamel yäple häp lechufwenkay iyhäj wet ifwenhomche, mat lhamelna kamaj tek imatitche.
Häp m'ak tä Jesús ne'tek lechufwenkay iwoye
14Tä paj wet Jesús lhahin'ältej lechufwenkay tä ihi once tä lhamel t'ekhen. Wet ifwoneje lhamel häp lechayaj tä niwuja lhäy'e tä hit'unthen lehusey tä ikachu iyhäj lhämet tä hiw'en tä pajche inuphä tä tälho n'op'itseyhay. 15Wet ifwenho lhamel wet yok:
–Mäyay nuyaykwe nilhokpe honhat wet wo silätayej nilhokej wichi häp Dios Silätyaj tä Is.#Mat 28.19; Ap.Lh 1.8 16Elh chik ichaye wet ikatej laka bautismo, tafwayhla. Mat häp elh chik nichayaye, letes iyej t'at. 17Wet iyhäj tä ichaye yenhilhila n'otetnhay tä inuhthiyejchephäla ahät lhayis olhey, wet iwohla lhayhil iyhäja tä w'enhache lhamej, 18wet itsoklawethä amlhätas. Wet tejlak iyäyej m'ak tä n'ot'ilek, mat tek lewit'äy ihihila. Häte itihla'pe takweyey häp t'inhayaj länhay wet ichesihena.
Õ'chäj puleye Jesús
19Tä Lhawuk Jesús ileyej tä yämhoplhi lhamel, wet õ'neyhatphä tä iho puleye#Ap.Lh 1.9-11 wet tatayhiphä häp Dios lefwomkat. 20Wet lhamel yikhen tä ihoye nilhokej honhates wet yen silätyaja Dios lhämtes. Wet Lhawuk hich'otyeneje n'otetnhay tä iselkatejen wichi yämlek yäm kalelhäj häp lhämettso.
Currently Selected:
Mar 16: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.