Mar 15
15
Jesús ihi tä Pilato tatache
(Mat 27.1-2,11-14; Luc 23.1-5; Juan 18.28-38)
1Tä nech'e ifwala wet nilhokej häp sacerdotes tä len'ohyajay ihiche lhaihutwekhen, lhäy'e hin'ol tä thänhäy, lhäy'e lhamel tä lhayen lewosayej Ley p'ante tälhe Moisés, lhäy'e nilhokej Concilio. Wet yäyitlhi häp Jesús wet yikchufwi tä ihäne Pilato, häp gobernador tä Romano. 2Wet Pilato tay'ätshane Jesús tä yok:
–¿Hä ahäpe Judío lhayis Kaniyat?
Jesús nichulho wet yok:
–Am t'at tä lewoyetso.
3Mat tä wujpe m'ayhay tä sacerdotes tä len'ohyajay ihiche y'ithatejlhi tä yen tesayej, 4Pilato äp yok:
–¿Hä niwohit m'ak che lechulho? Lhek yahinya, wujpe m'ayhay tä hin'oltsi y'ithatlhi amej.
5Mat Jesús yok tam. Wet Pilato t'iseltej.
Pilato ne'tek õ'län Jesús
(Mat 27.15-26; Luc 23.13-25; Juan 18.38—19.1,4-16)
6-11Tä n'okäjyajpej tä Pascua, Pilato inuhatphäpej tefwaji n'op'ok, häp elh chik häpe chik wichi tatshupiye. Tä mälhyejtso, häp nekchämtso wichi ihoye wet t'alhe chik iwoye m'ak tä lakeytso. Wet lham tay'ätshane lhamel tä yok:
–¿Hä let'uyayhläk onuhatphä häp elh tä amel tä Judío lhayis aka Niyat?
Tsi ihanej tä m'ak tä tamenej tä sacerdotes tä len'ohyajay ihiche yachaje Jesús, häpe t'at t'äytenyaj tä itiyej.
Mat lhamel inityenej wichi chik t'alhe Pilato chik inuhatphä häp hin'o elh tä lhey Barrabás. Häp lham lhäy'e let'unfwas ihi t'at n'op'onthi, häp tä äkleyhtses t'at lhamel, tsi iwo laka'tshayajayej niyatey wet ilän hin'o.
12Tä Pilato iläte tä häpe Barrabás tä wichi iwatläk ilanhi, wet tay'ätshane lhamel tä yok:
–Chik mälhyejtso, ¿atsi m'ak chik owoyeje häp elh tä lewoyay lheya “Judío lhayis Kaniyat”?
13Lhamel t'änhen tä nichulho tä yok:
–¡P'ajtej cruz!
14Pilato yok:
–¿Mat atsin'aj m'ak tä ni'isa tä iwoye?
Mat lhamel lhäy'e lhip tä ifwitsenej tä t'änhen tä yok:
–¡P'ajtej cruz!
15Tä mälhyejtso, tä Pilato t'uhläk ikänitwethä wichi, häp tä inuhatphä Barrabás wet ne'tek sip'äl itasinlhi Jesús. Tä ileyej, yachaje lhamel yämthilek hip'ajtej cruz.
Sip'äl iläkwlhi Jesús
(Mat 27.27-31; Juan 19.2-3)
16Sip'äl yikchufwi Jesús wet ihäne gobernador lew'et, wet ne'tek nilhokej sip'äl iyhäj lhaihutwek. 17Wet hiw'uyyenhi wesaj tä ifwak'an, wet ifwinche ch'uthanil tä yen coronaya wet iti'pe Jesús lhetek. 18Wet itiyej leläkwyhanyaj tä n'okwiyej wet yopej:
–¡Amtena, Judío lhayis Kaniyat!
19Wet y'ajejlhi lhetek hal'ä wet ifwats'unlhi, wet itsinen lakamchetey tä ihi tä tatache tä iläkwiyejlhi len'okhayajay. 20Tä ileyej, wet ilanhi n'ow'uy tä ifwak'an wet yachajpe lham lew'uyis, wet yikchufwi yämthilek hip'ajtej cruz.
Õhp'ajtej cruz häp Jesús
(Mat 27.32-44; Luc 23.26-43; Juan 19.17-27)
21Tä lhamel ihi n'äyij, wet nichutej hin'o tä Cirene lhele tä lhey Simón, tä häpe Alejandro lhäy'e Rufo lajcha, häp lham nek tä tälho tayhi. Wet sip'äl ikasthayen, ne'tek tilhäj Jesús laka cruz.
22Wet lhamel ihäne Jesús häp honhat lhip tä lhey Gólgota, wok õyok, N'olhetek Lhilew'et. 23Tä nichäte, fwetaj hiw'enho vino tä õ'kasoyej m'ak tä lhey mirra, mat Jesús tek tachumlä.
24Wet nech'e hip'ajtej cruz. Wet sip'äl ikoyej suerte yämthilek hiw'en lhamhomche lham lew'uyis#Sal 22.18 chik kalelhäj lhip tä lewuk elhpej.
25Häp lewhäy tä hip'ajtej cruz häpe t'at tä ifwala tojche. 26Wet iti'pe cruz häp n'olesaynek tä yäme m'ak tä tamenej tä õ'län tä yok, “JUDÍO LHAYIS LAKA NIYAT.”
27Wet iche hin'ol täkwfwas tä etantses tä tan'isej Jesús tä õhp'ajtej cruz, elh tumej lhip tä lefwomkat wet elh ihi lets'amkat.#15.27 Häp lhip 28 ihihit'a n'otkwey lesaynhay p'ante lhamenya. Yok: Mälhyejtso tä lhayäm matche Dios lhämet tä ihi Lehi tä yok, “Õ'tan'istej keyes länhay.” #Isa 53.12
29Wet häp wichi tä nekche lhip iläkwlhi Jesús, wet ilanejwethä lhethey tä ischeyhilhi leläkwyhanyaj#Sal 22.7 wet yok:
–Eh, am let'un'ajläk lewasthi Dios Lew'et wet chik ifwalas tres lefwetaj leneyhthiphäla.#Mar 14.58; Juan 2.19 30¡Lhek afwayhat wet nuhchä tä lhe'pe cruz!
31Wet häp sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, lhamel leläkwyhanyajay mälhyet iwoye iyhäj wet yok:
–¡Lham ifwayhthen iyhäj mat tek ihanej iwoyneje chik lhaifwayhat! 32¡Is chik inuhchä tä i'pe cruz häp N'ofwayhthi l'eni tä fwetaj häpe lhaka niyat tä n'aIsrael lhayis, häpkhilek y'aw'en wet y'at'ekhaye!
Wet häp iyhäj tä tan'isej tä õhp'ajtej cruz häte itiyej leläkwyhanyaj.
Jesús y'il
(Mat 27.45-56; Luc 23.44-49; Juan 19.28-30)
33Tä ifwala ikanhi, wet honatsi nichätpe nilhokej honhat pajtha tres horas.#Amós 8.9-10 34Wet tä hora tres tä honaj Jesús ifwitsenej tä t'än tä yok:
–Eloi, Eloi, ¿lema sabaktani?
(Häp lhämet tä yok, Ika Dios, ika Dios, ¿chipte tä lewomn'o?)#Sal 22.1
35Wet häp wichi tä iyej, iche iyhäj tä iläte wet yok:
–Lhek ch'ahuyaye, t'änch'oye profeta Elías.
36Wet elh lhamel inu alhoho tä yike esponja, wet y'uytho vino tä tapay, wet yäytej kanohi wet ipiyne Jesús yämthilek hits'uhi, wet yok:
–N'attaye, elat näm Elías wet ilanhi tä ihi cruz.
37Jesús nech'e ifwitsenej tä t'än wet y'il. 38Häpet tä mälhyejtso, häp Dios Lewukwech'o lep'ot tä sak'al#Éx 26.31-33 nech'e hikw'esche, tälhe tä tumphä yäk nichäte tä honhate.#Heb 10.19-20
39Wet sip'äl kaniyat tä ihi tä Jesús tatache, tä hiw'en tä mälhyejtso tä y'il, wet yok:
–¡Matche tä hin'oni häpe Dios Lhäs!
40Häte iche atsinhay tä iyahne t'at tä atofweho. Iyej lhamel María Magdalena, lhäy'e Salomé, lhäy'e elh María tä leles Santiago tä nithaläkwa lhäy'e José. 41Häp atsinhayna ihänlhi t'at Jesús wet tach'otepej tä ihi Galilea.#Luc 8.2-3 Häte iche wujpe atsinhay iyhäj tä iyej lhamel tä nekche Jesús tä ihoye n'aji Jerusalén.
Õ'tihi n'op'itsekw'et Jesús
(Mat 27.57-61; Luc 23.50-56; Juan 19.38-42)
42-43Iche p'ante hin'o tä lhey José tä tälhe hupuy tä Arimatea, lham häpe t'at elh tä wuj tä kalelhäj tä iyej Judío lhayis laka Concilio tä Lhamya, wet häte inihipejch'oye Dios Niyatyaj. Tä kamaj kahonatsiya, häp ifwala tä wichi lhaiwaklhatlä ifwala tä n'ot'elakw'et, hin'otso ihoye Pilato wet t'otle t'un tä t'alheje Jesús lep'itsek. 44Wet Pilato iseltej tä iläte tä Jesús y'il. Tä mälhyejtso, t'äne sip'äl kaniyat wet yok:
–¿Hä matche tä y'iln'e?
45Sip'ä nichulho wet yok:
–Matche, y'il t'at.
Tä Pilato iläte, wet ifwenho José tä yok:
–Is, mäye t'at.
46Wet José yik, ichäj sak'al lhota tä ipelaj. Tä nichäte cruz, ilanhi Jesús lep'itsek wet ikäfwlejche. Wet yikchufwi wet itihi häp n'op'itsekw'et tä pajche õyenlhi tä ihi chenaj, wet ihutho lepe tunte tä wuj. 47Wet María Magdalena lhäy'e María elh tä Santiago lhäy'e José lako, lhamel iyahinche t'at häp lhip tä õ'tihi.
Currently Selected:
Mar 15: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.