Hab 3
3
Habacuc let'alhyaj
1Häpe täjna profeta Habacuc let'alhyaj:
2Iwuk, otoynej ame awujyaj,
lhäy'e ilhokej m'ak tä lewoye p'ante,
wet wuj tä oyen tichunhayaja.
Iwuk, athana woye m'ak tä lewoye,
päyen n'oyehen yämlek olhamel ow'en
häp m'ak tä wuj tä lewoye p'ante fwalas tä pajche,
yämlek hätej olhamel otäfwelej akhajyhayaj.
Wet is chik mälhyej'attso
tä kamaj lepäyen n'oyehen hap'altsenyaj,
tanej chik awäkw ihi.#Isa 54.7-8
3Dios tä T'amajchet nek
tä tälhe honhat tä lhey Temán,
wet tälhe chenhas tä ihi Parán.
Wet lesilatyaj ihi, y'ajpe ilhokej pule,
wet yämlek imälhewek honhat tä iwujyen.
4Lhäy'e lhip tä leleplehyaj ihi,
wet lakweyey isi lehutunek tä tälhomche
wet lhain'älit lakhajyhayaj tä ihi.
5Ichenpe honhat õt'inhayajay
lhäy'e telätas tä äyteschehen.
6Wet chik ikasit, w'ahuye honhat,
wet chik iyahin wichi tä i'pe honhat,
lhamel chettichehen tä nowayhen.
Wet chenhas tä pajchehen waschehchä,
nemhit t'unhen, iwo lhipeya.
Mat Dios len'äyij tek nofwila tä naj lepesa.
7Olham ow'en naji häp wichi tä ihi Kusán
tä lelhakli ihi tä ihi lew'etes,
lhäy'e Madián lheley chettichehen tä nowayhen.
8Iwuk, ¿hät lewäkwäy tä letayhlä tewok lhayis?
¿Hät letiyej awäkw tä letayhlä awalak lhayis?
¿Häp tä tumenej tä lhe'pe pule lhayis tä lenek,
mälhyej chik letiyäjo aka'tshayaj tä lhe'pe yel'atas,
wok lhehi akaletas tä aka'tshayajchal,
yämlek lekalhi atayhfwas?
9Pajche lewaklhat alutsej lhäy'e hach'ähil
tä häpehen lep lhayis,
wet tä letsäype honhat
häp waj tä tälh puleye,
lhenlhi tewok n'äyij yämlek tiyäjche honhat.
10Häp chenhas w'ahuye
tä noway ame tä aiw'en,
wet waj tä tälh puleye itsäype honhat.
Wet awalak tä pitoj iwo lechosa
wet tojphä tä iwo lhetheya.
11Häp ifwala nem inuphä,
lhäy'e iwel'a häp lhaiskat,#Jos 10.12-14
häp isi leleplehyaj tä ihi hach'ähil tä tumenej,
lhäy'e isi lehutunek tä ihi ahun.
12Let'äsche ilhokej honhat,
wet lechätyenpe wichi awäkw tä äytaj.
13Lenuphä yämlek lefwayhthen aka wichi,
lhäy'e laka rey tä letshupiye.
Lelän wichi tä ni'isahen laka niyat,
wet letäyhthen iyhäj tä ihänlhi.
14Laka'tshayajwos hätet iwoye fwitsek tä nek,
lhamel lhaiteläfwitnaj n'oyehen
tä t'uhläk itsatkatpe honhat olhamel.
Lhamel lhaichäjthä,
t'uhläk itäyhthen wichi tä p'elitses,
wet iskathi m'ak tä fwitaj iwoye
yämlek newache elh chik ihanej.
Mat am lelän t'at lhamel laka niyat,
lelänej häp lham lech'ähil.
15Lenekpe awalak tä lhe'pe aka yel'atas
tä let'äsche waj tä tsajphä
tä lhäy'e lhip tä pitoj.
16Häp tä oläte ilhokej tähistso,
wet onowaye wet opästey chettichehen,
wet olhechey k'efwichehen, lhäy'e olhiley,
yäk iwohiyet'a tä okasit
wet ilhokej ot'isan tä naj lakhajyhayaja.
Wet tej chik mälhyejtso,
kamaj otamsek ihihla tä onihihlä ifwala
chik Dios itiyej lelhakli
häp lhamel tä n'aip'altsenthä.
17-18Tej chik hal'äy naj lhaya,
lhäy'e tä newache yachuyaj lhay tä tälho honhat,
thayej, kamaj okäjyaj ihiyejila Lhawuk.
Tej chik nofwej wichi leläy
wet kayla lhayis lhäy'e tson'atas y'inhen,
thayej, kamaj okäjyaj ihiyejila Dios tä Ofwayhthi.
19Häp Lhawuk häpe oka Dios
wet hiw'en n'oho okhajyhayaj.
Hiw'en n'oho okäläy tä iläfwenhen,
mälhyej iwoye w'ase käläy,
wet itsoklhin'o tä otiyäjche chenhas.
Currently Selected:
Hab 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.