1~Sam 3
3
Dios t'äne Samuel
1Häp manse Samuel hich'ote Lhawuk lechumet wet sacerdote Elí itetshan m'ak tä iwoye. Häp fwalas p'antetso wujit'a tä Lhawuk ifwenho lhämet elh chik häpe, tek wuj tä lhain'ältej. 2Wet Elí nemhit wuj tä hiw'enche honhat, nem isiche letey. Wet iche honatsi p'ante tä imähi lew'etch'o, 3wet Samuel imächufwi Lhawuk lew'et lhip tä õt'amajej Arca tä Õt'amajchet tä Dios lhämtes ihi. Wet tä kamaj n'oma Dios lechäkw, 4Lhawuk t'äne wet yok:
–¡Samuel!
Wet lham ichulho, yok:
–Oikana.
5Wet inu alhoho, ihoye Elí, ifwenho yok:
–Oikana. ¿Chihäte tä let'än n'oye?
Elí ichulho, yok:
–Tek ot'än ame, äple amäwet.
Wet Samuel yäple lemäwet. 6Wet Lhawuk yachajo tä t'äne, yok:
–¡Samuel!
Wet Samuel inephä, ihoye Elí wet yok:
–Oikana. ¿Chihäte tä let'än n'oye?
Elí ichulho, yok:
–Tek ot'än ame, yäs. Äple amäwet.
7Samuel kamaj nitäfwelayej Lhawuk, tsi Lhawuk tek itäfwnhatej lhämet. 8Wet Lhawuk äp yachajo tä t'äne Samuel, wet lham inephä, ihoye Elí wet yok:
–Oikana. ¿Chihäte tä let'än n'oye?
Wet nech'e Elí ihanej tä häpe Lhawuk tä t'äne häp manse. 9Tä mälhyejtso, ifwenho Samuel wet yok:
–Mäh äple amäwet, wet chik yachajo chik t'än ame, nech'e lechulho tä lhok, “Ahuy, Iwuk, fwen n'oho ämet, tsi olham tä akawon'o och'ahu ame.”
Wet Samuel yik, yäple lemäwet.
Dios ifwenho lhämet Samuel
10Wet nech'e näm Lhawuk tä ikasit, wet t'äne mälhyej tä t'änepej wet yok:
–¡Samuel! ¡Samuel!
Samuel ichulho, yok:
–Ahuy, Iwuk, fwen n'oho ämet, tsi olham tä akawon'o och'ahu ame.
11Wet Lhawuk ifwenho, yok:
–Lhek tetshan olhämet, olham oyenlalhi häp m'ak tä ihi Israel. Chik iche elh tä iläte, ilätla m'ak tä lech'otey iläte. 12Ifwalatso oyämla matche ilhokej olhämtes tä otayhte Elí lhäy'e lew'et lheley. Tek wohla olhämet tä n'am matitche. 13Ofwenhohte tä otihiyeja letes häp lew'et lheley yämlek tiyäj'attsiy. Lham ihanej m'ak tä ni'isa tä leles iwoye, lhamel isitäyenn'o wet lham tek yähäye. 14Tä mälhyejtso, kalelhäj olhämet tä otayhlä Elí lew'et lheley, oyok, Tek otäyhthila letes, tej chik iwo ow'ayhtesa wok ichäj n'oye tshäwet tä ilän thayej.
Samuel ifwenho Dios lhämet häp Elí
15Tä Lhawuk ileyej lhämet tä iwoye, wet Samuel i'pe lemäwet yäk ifwala. Tä inephä, ifwoyenche Lhawuk lew'et lepelis, mat nowaye tä ifwenho häp Elí m'ak tä iläte. 16Mat Elí nech'e t'äne wet yok:
–¡Yäs!
Wet Samuel ichulho, yok:
–Oikana.
17Wet Elí y'ätshane, yok:
–¿Atsi lhämet tä ifwen amho? Yej leskat n'oho. Is chik Dios aitasin wet y'isej lhip, chik leskat n'oho lhämet. Is chik lefwen n'oho ilhokej lhämtes tä ifwen amho.
18Tä mälhyejtso Samuel ifwenho ilhokej, tek wo m'ak chik iskatho. Tä Elí iläte, wet yok:
–Lham häpe Lhawuk. Is chik iwoye m'ak chik fwitaj tä is alhoho.
Samuel häpe profeta
19Samuel lhaichihelit p'ante wet Lhawuk iyej. Wet Lhawuk yäm matche ilhokej häp Samuel lhämtes. 20Wet ilhokej Israel lhayis, tälhe lhamel tä ihi Dan tä ihi lhip tä tafwojnhiye, yäk ichäte lhamel tä lew'et Beerseba tä ihi lhip tä tapinhiye, lhamel ihanej tä Samuel kalelhäj tä häpe Lhawuk laka profeta tä matche. 21Wet Lhawuk yachajo tä lhain'älit tä ihi Silo, lhain'ältejpej häp Samuel wet ifwenhopej lhämet,
Currently Selected:
1~Sam 3: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.