1~Sam 2
2
Ana käjejlhi Dios
1Ana iwo t'alhyaja wet yok:
“Ohusek käjejlhi häp Lhawuk,#Luc 1.46-55
wet olhaikhajyenej oka Dios.
Oläkwlhi otayhfwas,
okäjejlhi Dios tä hich'ot n'oye.
2Tek iche elh tä t'amajchet
tä mälhyej häp Lhawuk.
Tek iche elh tä let'uhyaj ihi
tä mälhyej häp lhaka Dios.
¡Matche, ihichet'a Dios elh!
3Yej lewujyen ämtes tä alechäjejlhi
tä lefwitajay lenuyaype iyhäj.
Tsi Lhawuk häpe Dios tä ihanej ilhokej,
wet lham itetshan wet ikalelhät
m'ak tä hin'o iwoye.
4Iwasthiche hin'ol tä khajayhen lelutses hal'äy,
mat ikhajyenhen lhamel tä naj lakhajyhayaja.
5Iyhäjnaj yipsen
nech'e lhaiwomejpe m'ak tä tufw,
mat iyhäjnaj ichuyuhen
nech'e lhäk ihi.
Atsinha tä naj lhäsa naji,
nech'e hiw'en siete leles,
mat elhnaj hiw'en wujpe leles,
nech'e lelhakli ihi.
6Lhawuk y'inhat hin'o wet häp iläyit.
Lham ichätyene õp'itseyhayw'et
wet häp inuhatphä.
7Lhawuk yäm p'elitsaj
wet yäm hiw'en m'ayek.
Lham y'ayhatchä wet y'ayhatphä.
8Lham itonphä elh tä p'elitsaj,
itälhtho honhat,
wet ineyhatphä elh tä iwatlä m'ayek
tä tälho honhat mok,
yämlek iwujyen wet itayyenphä iwhäye
iyhäj tä len'ohyaj ihi.
Tsi Lhawuk häp tä lewuk honhat tä tumchä,
wet häp tä iti'pe ilhokej honhat.
9Lham t'uye laka wichi tä afwtintses,
t'uye honhat tä tiyäjche.
Mat iyhäj tä ni'isahen
ichäthiyela honataj,
tsi newache elh tä ikalhi
tä isej lham lakhajyhayaj.
10Lhawuk itäyhthila letayhfwas,
häp fwitsek lhayis tä tälh puleye
ichätla'pe lhamel.
Lhawuk ikalelhthila ilhokej honhat.
Hiw'enhihola lakhajyhayaj
häp niyat tä lham itshupiye,
wet itihiyeja lewujyaj.”
11Tä paj Elcana lhäy'e Ana yäple lew'et tä Ramá. Mat han'äfwaj Samuel imälhehchä wet hich'ote Lhawuk, wet sacerdote Elí itetshan m'ak tä iwoye.
Elí leles iwo lakeya
12Häp Elí leles, tej tä sacerdotes mat häpehen hin'ol tä naj lehuseya, tsi tek itetshan Lhawuk. 13Häp täja m'ak tä lhamel iwoyeje wichi: Chik iche elh tä iwo w'ayhata Dios, wet tä kamaj õ'pen t'isan tä õw'ayhat, näm sacerdote lakawo, lepenekcha tenedor hiw'en tres letsotey ihi lakwey, 14wet y'uytho õpenekhi, wet ilhokej m'ak tä itonphä häp tä lewuk sacerdote, lham tä ichuma. Häp täjtso m'ak tä iwoyeje ilhokej Israel lhayis tä ihoye p'ante Silo.
15Häte tä kamaj õknip'oya häp t'alhä, wet näm sacerdote lakawo wet ifwenho elh tä iwo w'ayhata, yok:
–W'enho t'isan sacerdote yämlek hip'o, tsi lham tek ichumlä t'isan tä y'o, iwatlä tä akas.
16Chik hin'ona ichulho, yok, “Ch'anlha n'oye chik ochunkat tä owunej häp t'alhä, nech'e is chik lechuma ilhokej m'ak tä lewatlä”, lakawo yok:
–Kha, w'en n'oho athana. Chik nimälhyayejtso, osohla amej.
17Häp tä mälhyej p'antetso manses lesukyaj, lhäy'e lhip tä ni'isa m'ak tä iwoye wet Lhawuk y'ulhanej lakeyestso. Tsi lhamel t'amajiyejt'a, yen w'et m'ayeka häp õw'ayhtes tä õhw'enho Lhawuk.
Samuel hich'ote Lhawuk lechumet tä ihi Silo
18Häp han'äfwaj Samuel hich'ote Lhawuk lechumet, wet hiw'uyhi lew'uy tä lino. 19Wet nekchämpej lako yenlhi häp lakay'uche tä lhämsaj, wet ichäje tä yikchepej lech'efwa tä ihoye Lhawuk lew'et yämlek yen n'okhayajayej tshäwet tä ilän. 20Wet Elí itiyejpej lakäpfwayaj häp Elcana wet lhäy'e lech'efwa wet yopejkwe:
–Is chik Lhawuk hiw'en amho ales tä tälhe häp atsinhana, yämlek icheyäjo lew'et häp elh tä lham t'alheje Lhawuk wet yachaje.
Wet lhamel yäple lew'et, 21wet Lhawuk ikäpfwaye Ana wet lham hich'otshanpej, wet iwo lelesa tres hin'ol wet täkwfwas leles tsinhay. Wet häp han'äfwaj Samuel lhaichihelit tä ihi Lhawuk lew'et.
Elí lhämet tä itiyej leles tä iwoye m'ak tä ni'isa
22Wet Elí nech'e wuj tä thaläkw p'ante, wet iläte ilhokej m'ak tä leles iwoyeje häp Israel lhayis, lhäy'e tä imäyejen häp atsinhay tä t'uye lepe tä Lhawuk lew'et. 23Wet y'ätshane leles, yok:
–¿Chihäte tä lewoyaye m'ayhayna? Olham oläte ilhokej wichi tä yäme akeyes tä ni'isachehen tä lewoyaye. 24Matche, isit'a m'ak tä oläte tä tälhe Lhawuk laka wichi tä yäm amehen. 25Chik hin'o iwoyeje m'ak tä ni'isa häp elh, Dios ihanej tä hich'ote lham. Mat chik iche elh tä iwoyeje m'ak tä ni'isa häp Lhawuk, ¿atsi chik hich'othiyela häp lham?
Mat Elí leles tek hich'ahuye lajcha lhämtes, tsi Lhawuk letichunhayaj tä ilänhen lhamel.
26Mat häp han'äfwaj Samuel lhaichihelit t'at, wet ikänitlhipej häp Dios lhäy'e wichi.#Luc 2.52
Dios lhämetwo yäme lewit'äyhyaj tä Dios ichätyenla'pe Elí leles yäk ichäte lepes lheley
27Iche p'ante hin'o tä Dios lakawo, ihoye Elí wet ifwenho, yok:
–Lhawuk yok, “Olham kalelhäjte tä olhain'ältejte achätilis häp ifwalas tä lhamel ihihte Egipto tä häpehen Egipto kaniyat kwenkay. 28Wet olham tä otshupiyehen yämlek oyen oka sacerdotesa, tälho ilhokej häp wichi tä wusche'pe tä ihi Israel, yämlek ihi häp oka altar, iwunej incienso, wet hiw'uyhi lew'uy tä lino tä ihi tä olham otayche. Wet olham oyachajehte achätilis ilhokej häp ow'ayhtes tä y'ohen tä tälhe Israel lhayis.#Éx 28.1-4; Lev 7.35-36 29Tä mälhyejtso, ¿chihäte tä amel lhenay w'et m'ayeka tähistso tä olham one'tek õyenlhi tä ihi ow'et? Wet am, ¿chihäte tä lewujyen ales wet inu'pe tä lewujyenn'o, wet amel ayätajejen t'isan tä lhäy'e lhip tä is tä oka wichi Israel lhayis hiw'en n'oho?”
30“Tä mälhyejtso, Lhawuk tä Israel laka Dios yok, Olham pajche oyämehte, oyok, Am lhäy'e haw'et lheley lech'othiyela ochumet yämlek tiyäj'attsiy. Mat athana oyok, Tajlhame, tek ihichela tä mälhyejtso. Olham owujyenla lhamel tä iwujyenn'o, mat häp lhamel tä yenn'o w'et m'ayeka, olham oyenla w'et m'ayhaya lhamel. 31Lhek yahinya, nämla ifwalas tä osohla amej akhajyhayaj, wet lhäy'e achätilis len'ohyaj, yämlek newache elh chik hich'ut tä ihi haw'et. 32Lew'enla m'ak tä wuj tä is tä owoyeje Israel lhayis, let'äytenhiyela lhamel wet alhakli ihihila, wet ihichet'ala elh haw'et lheley chik hich'ut. 33Och'anlhahiyela elhpej haw'et lheley chik hich'ote ochumet, mat lehusek äytajila wet letey nem hiw'ene, wet ilhokej ales iyhäj yäk ichäte lepes lheley lhamel y'inhila tä kamaj nich'utahen. 34Wet ales Ofni wet Finees ihihila ifwala weihalha tä y'inhen, wet häp täjtso otetnek tä hin'älit amej tä matche m'ak tä oyäme.
35“Wet otshupyenla lhame oka sacerdote tä afwtintsaj, häp elh tä iwohiyela häp m'ak tä ohuminche tä olham otichunhayaj. Ow'enhihola leles tä naj lepesa, wet ilhokej ifwalas tä lham iläy ichumhihoplhila häp niyat tä otshupiye. 36Wet aelh chik häpe chik imälhehchä tä kamaj iläy, ihohiyela wet itsinenla lakamchete honhate häpkhilek t'alhe kolhki tä niwuja lhäy'e pan lhip wet lhaip'altsene tä yok, Woye tä owoye, w'en n'oho ochumyaj chik häpe tä iyej sacerdotes yämlek iche m'ak tä oisej.”
Currently Selected:
1~Sam 2: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.