Salmos 73
73
Upa Diosin noco shara huamisi
1Uhuun caifo Israelifoan aton nomuranshon tsoan shinanchacayamaiton Upa Diosin ato shara huamisi.
2Asca un fasi amaquiri shinan un funo cuana. Nan mahua cuya ariashu pacui cafisca un aaquin.
3Asca mun oian nan curafiapaimisifoan fasi chaca huamisifofiashu pui ichapayafo. Ahuacai tsoa yopaima. Nanscara ato oin urifi un ato cuscara ipaipaoni.
4Ascashon un oian nanfoancai ahua chaca finonmisifoma. Tsoacai isinin iyomisima mutsisipacoinfo.
5Futsafo omitsiscai cuscacai nanfoan mumisima.
6Yoran tuhuuti sahuua nantifishon ointirofo. Nanscarifi ai yorafoan nantifiton ointirofo nanfo fasi cacapaimisifo. Tsoanshtahuuncai ramapaitirofoma. Futsafo omitsiscamafiaquicai atohuunoa tsoan shinanfoma.
7Asca aton nomuran mutoafo chaca huapaiyai cuscan tsoa unumisima. Nanfofin curafiapaimisifoquin. Chaca fustisi shinanfafaicani.
8Asca nanfoan futsafohuunoa chaca yoimisifo. —Mincai ahua tapiama. Tsainyamahuu. Un mia yoiai cuscan min ua nicayamaiton un mia asca huatiroran, —ishon nan cacapaimisifoan tsain curushcoin yoimisifo.
9Dioshuunoari tsain chaca yoimisifo. Manifoti foanfafaincani, —Nonfin nantifi finoncoianquin, —ishon yoimisifo.
10Ascaifoan futsafoan ato icoinra huashon ato nicapaicani. —Na yorafoan fasi tapicoianran, —ishon atohuunoa shinanfo nan cacapaimisifohuunoa nanscara yoiafo.
11—Non amisi cuscacai Diosin tapiama. Noco oinmaran, —ishon nan cacapaimisifoan yoiafo.
12Nan chaca huamisifofin nanscarafoquin. Nanfoancai ahua chaca finoncanima. Fasi ahuara ichapa fifiacashon ahuara chaca uqui nocomisi. Unfin funamaritifin omitsiscaicain.
13Ascan unracafin ipaitsicoin shinansharamisiquin. Unfin cayacafin Diosi tanasharamisiquin.
14Shafatishon ahuara chaca uqui nocomisi. Unfin funamaritifin omitsiscaicain.
15Upa Diosin, un amaquiri shinain cuscan un min yorafo shinanmanaino un atori amaquiri shinanma cuana.
16Ascan un fasi shinanquin isca hua, —¿Ahuuscaimun na yora chacafo omitsiscatama tsoa ahua yopaimaquin? —ishon un nannori un shinan. Ascashon un fasi tapipaicoin.
17Upa Diosin, nannori un shinain mi fu tsainti pushu muran un iquia mia cufishquin. Ascan nannoshon un mia cufiaiton min ua tapimana nan yora chacafomain ahuun unutani ahuu cuscara iishquicain.
18Asca min yonoa cuscan nanfo machi tunanmanri micha mayocoin tusirimu caini pacui cafiscai. Nanscarifaiyai nan yora chacafo naashu omitsispacunacafo muran pacuafo tsoancai afanan ato funitiroma.
19Ascacun fasi ratucoincani samamashta omitsiscapanacafo muran pacuashu afanancai anoashu tsoa raqui fopanacafoma.
20Natian man isharai cuscacai man chai ipanacama. Non namaino yamariscatatiro. Non moishon non oiancai non nama cuscara afanan non ointiroma. Nanscarifi ai nan chacafo isharamisifiashu yamariscatatiro. Ascan nan Upa Diosin omitsiscamisifo ano min ato potaino afanan tsoa nipanacama. Tsoashtacai afanan ato oinnacama.
21Urificai un tapiyopaonima un fasi amaquiri shinanchacapaoni. Nan yora chacafo niyoashu isharamisi cuscahuunoa un shinain uhuun nomuran ihuucoin mufain uhuun nomuran mocacoin mutsa un muuni.
22Ascan nan chaca huamisifohuunoa ahuun unutaqui un shinantaima urifi fasi amaquiri chaca shinanni. Ascano nocon Ifo Diosin min uhuunoa shinanraca un yoina ahuara tapiama cuscaran ishon min uhuunoa shinan.
23Un anori shinanfiaifin unfin min yoraquin. Mincai ua potamisima. Minfin ua mutsoaquin un pacunonma,
24Minfin uhuun nomuran mian tapimanaquin un ishquiai cuscan. Chipo min icano ua iyoshquin un mi fu ipanon.
25Min nai muran icano urifi un miqui nocopai mi fu ipashquin. Uncai tsoa futsa yopaima. Un mia fuchipaiyai cusca uncai ahua futsa nuno mai anoshon un fuchipaima.
26Asca un isininqui uhuun nomuran un mua uncai chai nitiroma. Ascafia Upa Diosin minfin uhuun ointi muran ua mutsismashotiroquin. Ascashu natian min u fu ipanaca.
27Ascashon mia tsoan potashufin omitsiscapashquin. Mia nicacasmaifoan min ato onaintimai omitsiscapanonfo.
28Asca uncai ato cuscarama. Unfin Diosi fu rafupacunacaquin. Nanscarafin fasi sharaquin. Upa Diosifin nantifi iquinanquin. Un aqui caiton ua cushusharai. Unfin nantifi yorafo yoiquin isca huaiquin, —Nocon Ifo Diosifin ahuara sharafo huafafainiquin, —ishon un ato yoishquin.
Currently Selected:
Salmos 73: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
