Salmos 63

Ifo Diosin nocon ointi muran noco unimamatiro

1Upa Diosin minfin uhuun Diosiquin. Un mi fu rafupaicoin. Tsoa nomicoin unu yopatiro. Nanscarifi ai unfin nan nomiyai cuscaraquin uhuun nomuran un mia yopacoin. Un mua uhuun nomuran un mutocoin. Atsanacoin cafiscai mia funai.

2Un mia ichananti pushu murannoa oin cafisca huamisi. Min ahuamamishti huatiro mun oian. Nannoshori mun mia oinmisi min fasi sharacoin.

3Min ua noiyamainocai un nipaima. Un nisharapaifiai min ua noicoinquin nan sharafinacaia. Ascan mun tapian min nocohuun noi. Ascan un minhuunoa yoiquin shara huai.

4Un niyoshon nantishotapiquin un futsafo minhuunoa yoiquin shara huai. Uhuun poyan rafu un mushan huainifoanshquin mia cufinquin.

5Yoran tushu sharacapa pii mayacointan unimatiro. Nanscarifi ai un min tsain uhuun nomuran nanuashu un fasi unimatiro. Ascan un minhuunoa shinansharai fanainquin.

6Uhuun oshati camaquishon un mihuunoa shinanshifafainni.

7Min ua shara huamisi. Ascan min ua cushuaino un minhuunoashu fanainmisi.

8Un mi fu rafumisi. Min poyan mumihuurinoaton ua cushui un pacunonma.

9Futsafoan ua rutupaifiacani nanfofin chii uru muran focaniquin nanno ipashquin.

10Futsafoan ashin ato rutuano cotocotofoan aton nami picani.

11Ascafia unfin maton niaifoquin un Diosihuunoashu unimashquin. Tsoan Diosi icoinran huai yoitiro isca huaquin, —Nocon Ifo Diosin fasi sharacoinran, —ishon yoishquin. Ascan nan chanimisifo ato tsain shatumashquin afanan ahua yoinonfoma. Ascashu afanan pusinonfoma.

Currently Selected:

Salmos 63: mcd

Highlight

Copy

Compare