Salmos 37
37
Nocon Ifo Diosi icoinra huacahuun
1-2Samamashta farin fasi tsasi huayacufoantiro. Charofori sharamishti foaica nanfori samamashta tsasiacucahuantiro. Nanscarifi ai nan chaca huamisifo niyocanashu ahuara ichapayafiafo nanfori samamashta nai futsushcani. Ascacun nan yoran chaca huahuunoa shinanchacayamacahuun. A chaca huamisifo aya cuscan fuchipaiyamacahuun.
3Ascatamarocon nocon Ifo Diosi icoinra huafain futsafo shara huacahuun. Man ascaiton nocon Ifo Diosin mato cushusharai man isharanon.
4Nocon Ifo Diosihuunoa fusti shinain aqui fasi unimacahuun. Man ascaiton maton nomuranshon man fuchipaiyai cuscan nocon Ifo Diosin mato inanshquin.
5Nocon Ifo Diosi yoicahuun isca huaquin, —Uhuun Ifon, min ua amapaiyai cuscan ua tapimahuu, —ishon yoicahuun. Nocon Ifo Diosi icoinra huacahuun. Man ascaitofin mato shara huashoshquiquin.
6Funamarishta shafaino nantifi oinsharatiro. Nanscarifi ai man Diosi tanashara cuscan nocon Ifo puashquin. Fari masafinin racano fasi chashacoincun shafacaficoin ointirofo. Nanscarifi ai man shara hua cuscan Ifon Diosin nantifi puashquin nantififain oinquin shara huanonfo.
7Nocon Ifo Diosi ahuun ointaifin puusitama manacahuun. Funacaquinma. Ascan chaca huamisifoan ahuara chaca huaifo cuscan fuchipaiyamacahuun. Nanfo oinquin shinanchacayamacahuun. Nanfoanfin chaca fustisi shinancaniquin.
8-9Nan chaca huamisifo samamashta nai cuyoshquin. Ascan atohuunoa shinanchacayamacahuun. Atohuunoa shinain sinayamacahuun. Ointi rochitima iyamacahuu. Futsafo aya cuscan nanfohuunoa shinanchacayamacahuun. Ascan mato nomuran man shinanchacaquifin man samamashta ahuara chaca huatiroquin. Asca ratoran futsan nocon Ifo icoinra huaashu aqui nocoaiton ahuara shara inainno a fu isharapacunaca.
10Nan samamashta chaca huamisifofin afanan yamai. Ato funafiaquicai afanan tsoan ato fuchipacunacama.
11Ascan ratora futsan afiri ahuunoa shinanmutama futsafohuunoa shinanqui ato sharahushoain. Nanscarafofin nocon Ifon Diosin ato inanpaiyai cuscan ato inanshquiquin a fu nipanonfo. Nanfofin fasi unimaiquin. Nanscarafofin ahuara chacafoan aton nomuran ato fucash huatiromaquin.
12Ascan nan chaca huamisifoan Diosi tanamisifohuunoa shinanchacamisifo ahuuscashomain non ato chaca huamatiroquin. Tsoan ahua chaca huayamafiafo atoqui fasi sinacani.
13Ascafia Ifon Diosin tapian chipo nan chaca huamisifo samamashta ato onaintimashquin. Nanscarafoquin Diosin atoqui shuchi.
14Nan chaca huamisifoan yora ahuuomafo non ahuamafori ato nopu futan piafoyashon ato rutushcani. Ascano nan isharamisifori ato rutupaicani.
15Ascafia nanfocaifin afiri aton nopun rutushquicaniquin. Ascaifoan futsafoan aton piacatifo ato tucumishtipacushquin.
16Nan nocon Ifo Diosi tanamisifo fustitofin shara huamisiquin. Ahuara ichapayamafiashu unimamisi. Nan chaca huamisifofin ahuara ichapayaquin afocai ahuuomafo cuscarama. Afocai unimacointirofoma.
17Nan chaca huamisifofin aton curushu ato samamashta shatushquiquin. Ascan nocon Ifoan nan ahuun yora sharafo cushupacunaca.
18Nan ahua chaca huamisifoma Ifo Diosin shafatifi ato cushui. Ato ashoain cuscacai unupacunacama.
19Ahuara chaca finontirofofiacai Ifo Diosin ahuun yorafo cushusharainocai nayoshquima. Futsafo tushuomafiano nocon Ifo Diosin ahuun yorafo ato pimashquin.
20Ato asca huafiaino nan chaca huamisifo nai futsushquicani. Nan fasi fununun charo sharamishtifo foaifiashu farin tsacaino samamashta tsasi acucahuatiro. Fuuquin samamashta coin yamarisca huatatiro. Nanscarifi ai nan nocon Ifo noicasmamisifo naacani yamariscatashquicani.
21Yora chaca huamisifoan futsa ahuara fiiyanyofiashocai afanan futsa nasomisifoma. Ascan nocon Ifoan ahuun yora sharafocai ascarafoma. Nanfoanfin futsafo ichapa inansharamisifoquin.
22Tsoa nocon Ifo Diosin shara huai nanfofin nocon Ifoan inanpaiyai cuscan fiishquicaniquin. Ascashu a fu ipanacafo. Ascan nan ratorafo nocon Ifo Diosin ato tsain chaca huainofin nai futsushquicaniquin.
23Asca ratora isharamisifin nocon Ifo Diosin fasi aqui unimaiquin. Ascashon nan tapimasharashquin ahuuscashumain isharatiroquin.
24Nocon Ifoan noco mutsoanocai otisifiai non pacutiroma.
25Un pushco iyopaonifiashu natian un anifoshtacoin. Ascan uncai oinmisima nocon Ifoan ahuun yorafo ato potaiton. Uncai aton facufo oinmisima futsafo tushu yocaifoan.
26Diospan ahuun yora sharafoan ahuara ichapa ato inanfain futsafoanri ato ahuara yocaiton samamashta inanyotirofo. Ascaiton oinquin nocon Ifoan aton facufo shara huashoshquin.
27Ascan futsafoan mato chaca huamapaiyaino atomaquinoashu foriscatacahuun chaca huashquima. Chaca huatamarocon futsafo shara huashohuun. Ifo Diosihuunoashu man ascaitofin ahuun mai ari man a fu isharapacunacaquin.
28Nan futsafo shara huamisifofin nocon Ifo Diosin atohuun noicoinquin. Nan ato yoia cusca huamisifocun ato potashquima. Ascashon ato cushupacunaca. Ascan chaca huamisifocai nocon Ifo Diosin aton cushuima. Nanfofin aton facufoya cuyoshquicaniquin.
29Nan Diosin tanaquin shara huamisifofin ahuun mai ato inainquin a fu ipanonfo.
30Nan Diosi tanaquin shara huamisifoan futsafo yoiquin cayacafi shara yoimisi. Ascashon ahuara shara cayacafi fusti yoicoinmisifo.
31Tsoan ahuun nomuran nocon Ifo Diospan tsain shara shinansharamisishaquin ahuun fain caicai tsoashta funopacunacama.
32Nan yora chacafoan nocon Ifo Diosin tanamisifo cushucashon ato rutupaishquicani.
33Ascafia nocon Ifoan ahuun yorafo cushuainocai nan yora chacafoan ato chaca huapaiyaifo cuscacai atirofoma. Aton niaifofo ano ato iyofiaifoanno nocon Ifo Diosifin ahuun yorafo cushuiquin. Ascashocai atohuunoa yoitiroma isca huaquin, —Manfin chaca huamisiquin, —ishoncai yoitiroma.
34Ascacun funayamacahuun. Funacaquimarocon nocon Ifo Diosin asharaitian manasharacahuun. Nanton mato amapaiyai cuscan fusti huacahuun. Man ascaiton matohuunoa yoisharafain ahuunari mato inain a fu man ipanon. Ascan nan chaca huamisifo cuyoaitian man ato oinshquin.
35Mun oinmisi nocofunu chacacoin futsafohuun ramapaimisima. Ahua futsacai yopatama. Nan ihui uhuapa mutsispa cuscaran. Nanscarifi ai niyoashu curushcoin ipaoni.
36Ascafiashu samamashta man naani. Afanan natian yamai. Nan funafiaquicai tsoan fuchitiroma.
37Ascan yora cayacafi shara fusti imisifohuunoa shinancahuun. Nanfofin futsafo fu isharamisiquin. Tsoacai fucash huamisifoma. Ascashu fasi isharapacunacafo.
38Asca chaca huamisifocai ascarafoma. Nocon Ifon Diosin ato namaquin cuyoshquin. Nanfo isharatama chipo omitsiscashcani.
39Nocon Ifo Diosin ahuun yorafo numashquin a fu nipasharanonfo. Ahuara chaca finonfiacani nocon Ifo Dios ari fotirofo ato cushusharanon.
40Nocon Ifo Diosin ahuun yorafo asho sharafain ato numashquin chaca huamisifoan ato ahuusca huanonfoma. Nanfofin Diosin ato cushusharaino a fu isharapacunacafoquin.
Currently Selected:
Salmos 37: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
