Salmos 40
40
Uhuun Ifo, un unimai min ua amapaiyai cuscan huai
1Un funaquima nocon Ifo mana ua ashonon. Un cunaiton ua nicafain ua oian.
2Uhuun nomuran un fasi omitsiscaquin mua nan quininhuan micha muran iquia mutsa un mua. Ascaiton nocon Ifo Diosin ua nan quini murannoa tsucai cafisca huatan ua toquirininhuan camaqui niima un afanan pacunonma.
3Ascashon nocon Ifo Diosin ua fanainti funa shara tapimana uhuun Ifo Dioshuunoashu un fanainsharanon. Nocon Ifoan ua shara huashoa cuscan yora ichapafoan nicacani arifi nocon Ifo afanan chaca huapaitama nan icoinra huashcani.
4Tsoan nocon Ifo icoinra huashu fasi unimashquin. Ascashucai a cacapaimisifo fu ipaima. Nan dioscoinfoma nan rami huafo cufimisifo furicai ipaima. Nocon Ifo Diosi fustifin icoinra huaiquin.
5Uhuun Ifo Diosin, min ahuamamishti huatiro cuscan tsoan ascara oinyomisima min noco ismamisi cuscan huafain min noco ahuarafo ichapafo ashoshquiai cuscacai tsoanshta tanan huatiroma. Nanfohuunoa un mato yoipaifiaquicai un mato fasi chaicoincun yoiquin nocotiroma.
6Upa Diosin, non inafo rutushon coatan hua rafanan noco chaca min soashoni. Ascafiacai ascara min fuchipaima. Non ahuara futsafori non mia inanpaifiaiton acai min fuchipaima. Natian mun tapia min noco nicamapai min noco yoiai cuscan non aiton.
7-8Ascan nocon Ifoan yoini isca huaquin, —Uhuun Upa Diosin, un mia ariashu nuno mai ano fotoa min ua amapaiyai cuscan huashquin. Uhuun nomuranshon min tsain shara un nanua. Nannori uhuunoa min tsain cununiran, —ishon nocon Ifoan yoini.
9Nan mia icoinra huafo ichanan huashon un min tsain shara ato yoia. Ifon, man min tapian uncai oi nomamisima un nantishotapiquin un ato yoimisi.
10Uhuun nomuranshocai urus fusti min tsain shara un nanuama. Mun ato yoimisi nan min yoiyomisi cuscan min huaiton. Minfin mirus fusti nocon chaca soashotiro non mi fu ipasharanon. Nan min yora ichapafoya ichanaintian un ato yoimisi min nocohuun noifain min tsain icocoincun.
11Ascan, uhuun Ifon, ua shinanhuun. Uhuun ramapaihuu. Min uhuun noiquin nan min icon yoimisi cuscan ua cushusharapun.
12Ascan ahuara ichapa chacacoinfo uqui nocoa. Nan chacafocai tsoan tanan huatiroma. Un mia chaca hua cuscaricai un tanan huatiroma. Afohuunoa un shinain uhuun nomuran un omitsiscai uhuun ointi man nishma cuana.
13Ascan uhuun Ifon ua shinanhuun. Ua fuchipaiquin ua ashorisca huahuu. Ifon, Ua numapun.
14Futsafoan ua rutupaimisifo cuscan nanfo rafipainonfo. Nan chaca huafo cuscan aton nomuran ato shinanmahuu. Ua chaca huapaifain ua rutupaicaniquin. Ascacun ato onaintimafain ua numahuu.
15Ua noicasmacaquin yoiafo, —¡Aichofain! Natiafin na nocofunun omitsiscaiquin, —ishon uhuunoa yoiafo. Ascafia ato shinanmahuu afoancaifin fasi chaca huamisishaquin rafipaitirofoquin.
16Ascan mi fu rafumisifo minhuunoashu unimacain aton nomuran roama roama sharanonfo. Minfin nocon chaca soashonaquin non mi fu nipanon. Nan tapicoincashonfin mia noicoincaniquin. Ascan oi ashcafinin isca huaquin yoipacupainonfo, —Nocon Ifo Diosin, min nantifi finoncoian. Tsoa futsacai mia cuscara sharamaran, —ishon yoipacupainonfo.
17Uhuun Ifon, uncai ahuama. Un mia fasi yopai. Ua shinanpun. Min ua ashosharafain min ua numamisi. Upa Diosin ua manamaquima. Oriscahuun ua numashquin.
Currently Selected:
Salmos 40: mcd
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
