Génesis 46

Jacob Egipto mai ano cani

1Ascatan Jacob ahuun anu futsan Israel nan ipaoni anoashu nantifi ahuun ahuara ipaonifoya Egipto ari fonifo. Beerseba pushu rasi ano nocoshon Upa Diosi cufini nan yoia cuscan aashquin. 2Ascan yamu futsan Upa Diosin Israel oshano ahuun namapan cuscaran ahuun anu futsan cunani isca huaquin, “¡Jacob!” huaiton.

—Unquian nuno, —ishon cumani.

3—Unfin Diosiquin. Un min upan ahuun Diosin. Min natian Egipcio ari catiro. Nanno un mia ashoshqui ai cuscan min funafo ichapa rasi cainnonfo. Min funafo mani futsafoti ichaparasi ishquicani. Ascacun ratuquima min Egipcio ari catiro. 4Min caino un mi fu cai. Chipo fari futsan min funafo un afanan nuno ato nasomashquin. Ascan min Egipcio ariashu min naashquin. Min naitian min facu José mi fu iishquinran, —ishon Diosin Jacob yoini.

5Ascano Jacob Beerseba anoashu cani. Ahuun facufo non aton shotafo non aton ahuinfo caballofo taramutiyafo nan Faraón ato inanni ato Egipcio ano iyonon. 6Nan Canaán mai anoa fipaoni cuscan aton inafo yafi nantifi aton ahuarafoya Jacob yafi ahuun facufo non ahuun funafo nannoashu Egipcio ano fonifo. 7Nantifi ahuun facu nocofunufo non ahuun shotafo non ahuun facu ainfofo non ahuun chata shomayafori nantifi ahuun funafo a fu Egipcio ano fonifo. 8Jacob nan ahuun anu futsa Israel. Ascan ahuun funafoan anunifo Israeliforan huanifo. Nan Israel ahuun facufo non ahuun funafori natia aton anufo mato tapimai. Iyoaton ahuun anu Rubén. 9Nan Rubén ahuun furunfo Hanoc non Falú non Hezrón non Carmi.

10Israel ahuun facu futsa Simeón. Nan Simeón ahuun furunfo Jemuel non Jamín non Ohad non Jaquín non Zohar non Saúl ahuun ahuan fusti Cananea ini.

11Israel ahuun facu futsa Leví. Nan Leví ahuun furunfo Gerson non Coat non Merari.

12Israel ahuun facu futsa Judá. Nan Judá ahuun furunfo Er non Onán non Sela non Fares non Zera. (Ahuun furun rafu Er yafi Onán Canaán mai anoashu nanifo.) Fares ahuun furun rafu Hezrón yafi Hamul.

13Israel ahuun facu futsa Isacar. Nan Isacar ahuun furunfo Tola non Fúa non Job non Simrón.

14Israel ahuun facu futsa Zabulón. Nan Zabulón ahuun furunfo Sered non Elón non Jahleel. 15Nanfo Lea futan Jacob aton facufo. Padán-aram anoashu cainnifo. Aton facu ainfacuri nannoashu cainni. Ahuun anu Dina ini. Nantifi aton facufo nocofunufo non ainfofori treinta tres ini.

16Jacob ahuun facu futsa Gad. Nan Gad ahuun furunfo Zifión non Hagui non Esbón non Suni non Eri non Arodi non Areli. 17Jacob ahuun facu futsa Aser. Nan Aser ahuun furunfo Imna non Isúa non Isúi non Bería. Aton chico ahuun anu Sera. Bería ahuun facu rafu Heber yafi Malquiel. 18Nanfo Zilpa futan Jacob aton facufo. Nan Zilpa Jacob raisi Labán ahuun yonomati ini. Labán ahuun yonomati Zilpa ahuun facu Lea inanni. Jacob futan Zilpa ahuun facufo nantifi dieciseis ini.

19Ascan Jacob ahuun ahuin Raquel ahuun facu rafu. Iyoaton ahuun anu José. Chipocuton ahuun anu Benjamín. 20Ascano José ahuun ahuin Asenat ahuun facufo cainni. Aton anu Manasés non Efraín. Nan rafu Egipcio anoashu cainnifo. José ahuin Asenat ahuun apa anu Potifera. Nanton ahuun yorafo pushu rasi On anoafo aton cufinshomisi ipaoni.

21Ascatan Jacob ahuun facu futsa Benjamín ini. Nan Benjamín ahuun furunfo Bela non Bequer non Asbel non Gera non Naamán non Ehi non Ros non Mupim non Hupim non Ard. 22Nanfofin Jacob futan Raquel ahuun funafo catorce ini.

23Jacob ahuun facu futsan Dan. Nan Dan ahuun furun Husim. 24Jacob ahuun facu futsa Neftalí. Nan Neftalí ahuun furunfo Jahzeel non Guni non Jezer non Silem. 25Jacob futan Bilha aton facufo. Nan Bilha Labán ahuun yonomati ipaoni. Ascan Labán ahuun yonomati ahuun facu Raquel inanni. Ascano Jacob futan Bilha aton facufo siete ini.

26Jacob yafi ahuinquin ahuun yorafo Egipto ano fonifo. Nantifi ahuun yorafoya sesenta y seis. Ahuun facufoan aton ahuinfocai tanan huanima. 27José ahuun facu rafu Egipto anoashu cainnifo. Ascano sesenta ahuun yorafo Jacob ahuun mai anoashu a fu Egipto ano fonifo.

28Egipto nocoti chaima Jacob ahuun facu Judá José ano nichini tapimatanon. Tapipaiqui ranimain Gosén maiquin. 29Ascano José yononi ahuun caballo taramutiya itishara huashononfo apaqui nocoi canon. Apaqui nocotan icoacufoantan uaiquicai funa ununima. 30Ascatan Jacob ahuun facu José yoini isca huaquin, —Man min naa shafain un imisi natian afanan un miqui nocoa. Natian nan un naitian un unimatiroran, —ishon yoini,

31Nicain José ahuun yorafo non apa non apa fu icafo yoini isca huaquin, —Ascacun natian un niaifo yoitiro, “Uhuun yorafo non uhuun upa non afu iqui fuafo. Canaán anoashu man fuafo. 32Nantifi ato inafoya man fuafo. Nanfoan ato yonofin chashoanfo cushufain moifo cushumisifoquin,” ishon un Faraón yoicai. 33Ascan Faraón mato yocain mato yono ahuu cuscaramainquin. 34Man yoitiro isca huaquin, “Nonfin nocon shunifoan apaoni cusca nocon chashoanfo non cushuaran,” ishon man yoitiro. Man nanscara yoiaiton mato Faraón yoitiro Gosén ano man inon mato inafocai Egipciofoan fuchipaima. Egipciofocai chashoan cushumisifo fu ipaimaran, —ishon José ato yoini.

Currently Selected:

Génesis 46: mcd

Highlight

Copy

Compare