Génesis 35

Jacob Betel ano nasoaitian Diosin a shara huani

1Asca huatan Diosin Jacob yoini, —Funinacahuu. Pushu rasi Betel ari catahuun nanno iyoshquin. Nanno toquiri putsainiqui huashon ua cufinhuun. Min ochi Esaú anoashu ichoaitian min ano icun un mia oinmariscatani. Nannoshon mian cufintiro, —ishon Diosin yoini. 2Nicatan Jacob ahuun yorafo yoini isca huaquin,

—Nan rami huafo maton dioscoinma man aya cuscan potafain nashitacahuun maton sahuutifo rama patsamuafo sahuucahuun. 3Man ascahuano non Betel ari cai. Un omitsiscanitian un Upa Diosi cufinni. Un cufiain cuscan ua nicaquin ua numani. Un anoashu caacun ua cushusharani. Ascan nanno un toquiri putsashquin anoshon afanan Upa Dios cufinshquinran, —ishon ato yoini.

4Nicacatan aton ahuarafo rami huafo aton dios imapaicani ascashon aton parotamutifo Jacob inannifo. Ascan Jacob nanfo ihui ahuun anu emcina ananmanrinoa nan Siquem chaimashta maihuani. 5Ascan Siquem anoashu focanashu Diosin yononi caifo futsafo chaimashta icafo atoqui ratunifo. Ascacun tsoan ato mufainnima.

6Jacob fu focani Luz ano noconifo. Nan Luz ahuun anu futsa Betelran, huanifo. Betel pushu rasi Canaán muran ini. 7Betel ano nocoshon Jacob toquiri putsainini anoshon Diosi cufinshquin. Nan mai ano anuni El-Betel. Nannoashu ahuun ochiqui ichoaino aqui Diosin noconi. 8Nannoashu Rebeca ahuun oinmati Débora nani. Betel chaima nii ahuun anu encina namanri mai huanifo.

9Jacob Padán-aram anoashu nasoano Diosin afanan aqui niinacahuani. —Un mia shara huairan, —ishon yoini. 10Yoini isca huaquin,

—Minfin Jacob. Natiancai min afanan Jacobma min anu Israeliran, —huani.

Ahuun anu futsan tuqui huatan Diosin yoini,

11—Unfin Diosiquin un ahuamamishti huatiro. Min facufo ichapa cai huahuu min funafori caiyaifoanno. Mihuunoashu shoco fustifiashu mani futsa futsatapafo caicani. Min funafo niaifo ichaparasi ishcani. 12Un min shota Abraham yafi min upa Isaac un ato mai inanni. Nantiatari un mia inain. Ascashori min funafori un inainran, —ishon Diosin yoini.

13Ascano ahuun tsain yoiquin anaititan Jacob anoashu Diosin nai muran cani. 14Nanno Jacob toquiri putsai inishon aqui fimi unu ocafain shuniri ocani Diosin aicho huashquin. 15Nannoashu Diosin a fu tsainni. Ascashon nannoa mai anuni Betel.

Raquel nani cuscan

16Asca huatan Betel anoashu Efrata chaimashta nocoashu Raquel facu cainpaiquin rananni. 17Raquel nataima ainfoan futsan facu cainmashon yoini, —Ratuyamahuun. Natian min furonanfacu futsayaquin, —ishon yoini. 18Naqui rashquiataima Raquel yoini, —Nan facu ahuun anu Benoni, —ishon yoini. Ascafia apa anuni Benjamín.

19Ascafin Raquel nai aniquin. Efrata fai cusumunri naacun mai huanifo. Nanno anuni Belén. 20Jacob ahuun ahuin maia manaon toquiri putsanini. Natianri oinquin tapitiro nanno Raquel mai huani.

21Mai huafainicai cani acamaquishon chai ointi ahuun anu Edar ano noconi. Nanno pano pushu tuchini. 22Nanno ishon Israel nicani ahuun facu Rubén ahua futsa Bilha chotaiton. Tapiashu sinacoinni.

Jacob ahuun facufo doce inifo

23Jacob ahuin Lea ahuun facufo Rubén nan Jacob ahuun facu iqui tauni. Acachorinoa ahuun puhuua Simeón, acachorinoa Leví acachorinoa Judá chipocun Isacar non ahuun facu chipocucoin Zabulón. 24Ascano Raquel facu rafu. Iyoa José. Chipocun Benjamín. 25Raquel ahuun oinmatinin ahuun anu Bilha ahuun facufori Dan yafi Neftalí. 26Leapan ahuun oinmati Zilpa arifi facu rafuya. Iyoaton ahuun anu Gad. Chipo facu ahuun anu Aser. Nantifi nanfo Jacob ahuun facufo. Mai ahuun anu Padán-aram mai anoashu cainnifo.

Isaac nanihuunoa

27Ascano Jacob apa Isaac pushu ano noconi. Apa pushu rasi Mamre ano noconi. Mamre anu rafu non fustiya ini. Ahuun anu futsa Arba futsari Hebrón. Nanno Abraham yafi Isaac ipaonifo. 28Isaac ciento ochenta fari aqui caano nani. 29Ahuun unutani nan naitian fasi shacainacahuan fustitan nani. Fasi anifocoianshu ahuun shunifo ari cani. Naacun ahuun facu rafutan Esaú futan Jacob mai huanifo.

Currently Selected:

Génesis 35: mcd

Highlight

Copy

Compare