Nuumero 20
20
Mohuaca pacaretasacari saajiajiniji
1Marijia coteeja racajiniani, puetunu supuetana Israelcuajinio caneno pueyajanaari cuno racajinia tiuquiijioquiaari Cades jiyanishano jiyajinia Zin jiyanishano cariiquia jiyajinia. Israel pueyari tii jiyojetaquiaari rupaquijia. Moisees, Aaroon rimiatu Mariari tii shaajeseequiaari. Tiijia jamosaaquiaariiri.
2Nojori quishaqui nojori jiitiaaquiniuucua mohuaca na ratusocoriquiano, puetunu nojorijianaari coquetooquiaari Moisees, Aaroon nojori riushujiutianura. 3Nojoriiri jiyacari naa sequeturee Moiseestej:
—Casaamaara canaa cusojuanuucanu parta Israel pueyatajuhuaj Pueyaso jaara nojori cusojuanuucanucuaatej. 4¿Casaacua nio cariiquia jiyajiniara nia puetaarucuaa Pueyaso saquiriojosano pueyacuaani? ¿Niaatee canaa cusojuanuunu paniyajuhuanaja puetunu canaa juyacatajanaa soj? 5¿Casaara Egipto jiyajiniji nia mashiquiquianu canaajaarani nio sacuaraatiuucua jiyasequejinia nia jiitianura canaani? Naacuatej, majaari canaa naata casaa natanu quenaaja canaa miasocoriquiano. Majaari niya higuera quiniu. Shaaquiiri uva cuhuariquiaca. Majaari mininia quiniu. Majaari quenaaja ratusocoriquiano mohuaca quiniujuhuaj.
6Jiyacaritij, Moiseesri Aaroonta pueya shuriucuaji quiaquee Pueyaso secojojua suhuortujinia. Nojoriiri tii jacamatuquiaari jiyocuara. Na jiniji rupueteturee jiyocuaari. Pueyaso shacantuuca cumaacaari nojoriicua muetaree jiyacari. 7Pueyasoori jiyacari naa Moisees sequeree:
8—Quia nataca quia riri quiarijia. Quia tarajanu Aaroon cuaara quia naacuura puetunu nio pueyajanaa nia rerejotenura. Naa nia miiniu nuhuajitij, quiocua puetunu pueya niquiarajanaa cuno saajia sequere cuaara mohuaca shooteera. Quiocua cuaara niquishuriiriaj, mohuacaari saajiajiniji jaatenutaniya pueya ratusocoriquiano, juyaca ratusocoriquianojaajanio.
9Moiseesri Pueyaso cojee tacoji maano nataca ririi. Naa miiriiri taa Pueyaso sequequiaari nojuacuajanij. 10Moiseesri tarajanu Aaroonta puetunu pueyajanaa rerejotequiaari cuno saajia tacoji. Moiseesri jiyacari naa pueya sequereequij:
—Nia tojitiare tojitiaashijiacanaa. ¿Canaateeri nio saajiajiniji pojuarataniya mohuaca nia ratusocoriquianoni?
11Moiseesri naa na sequenuta na natacata pacutejoree cuno saajia piquiniu. Queraatia mohuacaari jiyacari pacaretaquee. Puetunu pueyajanaari jiyacari mohuaca raruuree, nojori juyacajaajanio. 12Saniniuujia, Pueyasoori jiyacari naa Moisees Aaroon sequeree:
—Janiyacuajaari nia sequereeni, cuno saajia nia sequere mohuaca cuaara pojuartaara pueya niquiara nojori maniniuhuaqueetanura janiya. Niaari jaarajaaja saaja cucua tiuyaquiriijuhuaj. Niaari naacua cuno pueyataja tiuquitiaaquiriquiano niaarano cua niquitiosano jiyajiniajuhuaj.
13Meriba cuaritia jiyaniquishaaquiaariiri cuno cuari saajiajiniji pojuaratano mohuacani. Tiicuajaari Israel pueya riushujiutiaja Pueyaso, na jiyamuetusacari. Pueyasoori saaja na cumaacata na miishano cuno pueya niishitiquiaari nojuajaari tojetaarucuajanaa miiniu maniniu.
Aaroon shaajesacari
22Na nuhuaji, puetunu Israel pueyajanaari Cades cariiquia jiyajiniji quiojoquiaari Hor jiyanishano tuhuananuucua. 23Tari nojori quishacari jiyareta taucuaca Edom jiya namiquiiquiumia, Pueyasoori jiyacari naa Moisees Aaroon sequeree:
24—Aaroonri tari shaajenutaniya. Nojuajaari Israel pueyara cua niquitiosano jiyajinia tiuquiyaquiniutianiya. Janiyari naa miyani, cuno Meriba cuarijinia nia ruuretanuucua cua sequesano niajaniya. 25Quiajaniya saniniuujia Moiseesnaa, Aaroon quia jiyataare neyanu Eleazartaja Hor tuhuananujiniji. 26Quiocua cuno tuhuananujiniji nia quishacari, pueyacuara secojona na quiniuucua, na cushishano toque jocojore. Quiocua saniniuujia neyanu Eleazar cushitirinioj. Aarooncuajaari na nuhuaji saniniuujia tiijia shaajenutaniyacujua.
27Moiseesri jiyacari naa miiriiquij taa Pueyaso sequequiaari nojuacuajani. Jiyacaritij, nojoriiri puetunu Israel pueya niquiarajanaa tacataquiaari cuno Hor tuhuananuucua. 28Tiijia nojori quishacari, Moiseesri jiyacari Aaroon toque jocojoree. Saniniuujia Eleazar na cushitiriiri. Tiijiani, cuno tuhuananujinijini, tee nojori quiriquiaacuajanij, Aaroonri tiijia shaajequiaari. Naacuatej, saa Moiseesjaari Eleazarta rosetaquiaariuhua cuno tuhuananujiniji. 29Puetunu Israel pueyajanaa jaara niishiquiaari Aaroon tari nimishiquii, nojoriiri niquiriyatu raca na nujuquequiaari.
Currently Selected:
Nuumero 20: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
