Nuumero 17
17
Aaroon natacaari catuutiaquiaari
1Pueyasoori Moisees sequeree:
2—Quiria quiarijia quia numootejore puetunu doce Israelcuajinio caneno pueyajanaa. Puetunu nojorijinijinio doce jiyaniijianucuajanaa cuaara na nataca niquitiojoora quiajaniya. Naa doce canuucuajinio caneno nojori quiniuucuatej, nojori nataa cuaara quiiria docejuhuaj. Naacuatej Moiseesnaa, quiocua na camaruhua sesaca naajiore nojori nataacua. 3Naajuhuaj, quiocua supuetana Leviicuajinio caneno pueya niquitiosano natacaacua naajiore Aaroon sesa. Naacuatej, cuaara quiiria niquiriyatu nataca saa nojori supuetanaacuajinio jiyaniijianucua niquitiojosanojua. 4Quiocua cuno nataa niojoree cua secojojua suhuortujiniaaco cua cojee cajitiaja tacoji tee cuniqui niaacua cua muetaquiaacuajanij. 5Janiyajanaari cua saquiriojosano pueyano nataca catuutianiniutianiyani. Pueyari jiyacari niishiniutianiya canteja cua saquiriojosanoni saa quiriaja poonijiona quiriquiano. Cunoori Israel pueya niishiniuria maninia maja socua sacuaraatia nojori rimiaaquenura niaacuara cua niquiara.
6Moiseesri naa Pueyaso sequesano caminiujiuquiaari Israel pueyara. Naacuatej, puetunu Israel doce maanu jiyaniijianucuajanaari na nataca niquitiojoturee. Moiseesri naacua doce nataa reratereequij. Aaroon natacaari tii quiriquiaajuhuaj, narta nataa tajiniani. 7Moiseesri na reratesano nataa niojoquiaari Pueyaso quijia cojee cajitiaja tacoji na secojojua suhuortujinia. 8Moisees jaara tariqui quiaquiaari Pueyaso secojojua suhuortujinia, Aaroon nataca riuriatasee catuutianoori. Cuno natacari supuetana Leviicuajinio caneno pueya maanu jiyaniijia niquitiosano nataca quiriquiaacuaja. Shuucuacaracaari quiriquiaa; tariucua noshuriujia jaaracajaajanio. 9Moiseesri jiyacari puetunu cuno nataajanaa pooquiaariuhua Pueyaso quishaqui sohuacajiniji. Puetunu narta Israel pueyajanaa na niquitijioquiaariiri. Cuno nataa nojori shootianu nuhuaji, tama na camarujaarijia tama na natacajaa riquiaari.
10Pueyasoori jiyacari naa Moisees sequeree:
—Cua quijia cojee tacoji Aaroon nataca quia niarohua. Cuaara tii racateera, cua tojitiaashijia pueya niishiniuria janiyari naa miijiani. Naa quia miiritij, maja socua sacuaraatia nojori rimiaaquenura cua niquiara, janiya mariqui nojori puecoorejaariuhuaj.
11Moiseesri naa miiquiaari taa Pueyaso sequequiaari nojuacuajani. 12Israel pueyari saaja naa sequetuquiaari Moiseestej:
—¡Taa quiarijia canaa miyacuaani! ¡Puetunu canaajanaari cusonuuriquianoni! 13Naacuatej canapueteja Pueyaso quishaqui na suhuortujinia catecanoquiaani, nojoriiri cusonuuquiaa. ¿Maniniateeri canaa jaara naa puetunujuanaa cusonuunutaniyani?
Currently Selected:
Nuumero 17: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
