Deuteronomio 34
34
Moisees shaajesacari Pueyaso niquitiniu nuhuaji nojori tiuquitiajarano jiya juucua
1Jiyareta na nuhuajiria, Moiseesri Moab cariiquia jiya jamatujiniji tacaquiaari, Nebo tuhuananuhuacua, Pisgaa quiajaacua. Cuno quiajaari Jericoo tiaca taquijiria, Jordaan moo taquijiria. Cuno tuhuananu quiajajiniji Pueyasoori puetunu cuno jiyajanaa na niquitiquiaari. Cuno jiyacuajaari supuetana Israelcuajinio caneno pueyara na niquitiosocoriquiano quiriquiaa. Cuno jiyari puereetuuca quijia. Galaad jiyajiniji cajiyari, Dan jiyacua shiishiiri. 4Pueyasoori jiyacari naa Moisees sequereequij:
“Nio jiyari tariucuacaanu seetanujuanaa Abraham, neyanu Isaac, na jinianu Jacob cua sequesano cua niquitiosocoriquiano nojoriicuajinio caneno pueyarano. Janiyajanaari quia panitiaani tama quia namijiatajaaja quia niquiniuria cuno jiya. Saniniuujia, maja cutaraari cuno jiyajinia quia tiuquiniu quiniutianiya.”
5Naa cuno jiya na niquitishaanu nuhuajitij, Pueyaso jiyaraajia Moiseesri naa shaajetasuquiaari cuno Moab jiyajiniatej. Pueyasocuajaari tari naa Moisees sequequiaaritij, nojuajaari cuno jiyajinia shaajeriquiano. 6Pueyasojuanaari Moab jiya jamatujinia Moisees jamoquiaari, jiyareta Bel-peor tiaca taquijiria. Jiyacari quijiaca supuetana Israelcuajinio caneno pueyani, nojoriiri maja na niishitiuniu quijia tee Moisees jamayani. Quiarijia quijiaca pueyari, maja na niishiniujuhuaj tee Moisees jama canetaani. 7Tariucua ciento veinte marijia shocotejonoori shaajequiaari. Maninia niquijiaja, jiyotuucajuhuaj.
8Naa cuno Israel pueya nujuquenuucua pueyaracaanu Moab cariiquia jiya jamatujinia Moisees shaajenuucuatej, racaari nojori supuetaquiaari. Nojoriiri naa pueyaracaanu nujuquejacatej jaara narta pueyano shaajatuquiaari. 9Josuee saniniuujia, nojuajaari Nun jiyanishano niyanu quijia. Moisees shaajeyaquishacarijia, nojuajaari Josueecuara masequiaari Pueyaso, nocua na nianuta na juaashiquiaca. Jiyacari nocua pacuquiaariiri Moisees jiitiasano niishijia sohuanu. Naacuatej, puetunu Israel pueyajanaari na sequesano tojijiaca quijia. Josueeri maninia miijiojua puetunujuanaa. Naatej taa Pueyaso sequequiaari tariucuacaanu Moisees miiniuriacuaani, pueyari naa maninia miijiojuajuhuaj.
10Moisees shaajenu nuhuaji, majaari socua tamonu supuetana Israelcuajinio caneno pueyano supuenu quiquiaari juhua Moiseesja. Nojuajaari Pueyaso sequesano caminiujiunia pueyano maniniu quijia. Nojuajaari Pueyasota na pocoojosacari catecaji jiriquiotoojuacuaja. 11Naajuhuaj, majaari socua Pueyaso cumaacata nocuaji jiuujiatesano miijiojua pueyano quiniu quiquiaari socua, taa Moisees miijioquiaari Pueyaso cumaacata nocuaji jiuujiatesano casaa Egipto jiya camarnu Faraoon niquiaracuaani, puetunu cuno jiyajinia jiyaniijianucuarano na jiyatesano narta taucuaca niquiarajaajanio. 12Naajuhuaj, Moisees shaajenu nuhuaji, majaari socua tamonu narta pueyajinijinio quenaaja cumaacaraca quijia quiniu quiquiaari juhua nojuaja. Moiseesri queraatia casaa miijioquiaari narta Israel pueya niquiara Pueyaso cumaacata nojori na puerojosacari.
Currently Selected:
Deuteronomio 34: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
