Deuteronomio 32

1“Pocuareeteni. Jiya cajiniocuanaa, cua tojiri. Maninia quia tojiri cua sequesanojuhuaj, jiyanaa.

2“Cua niishitiojosanoori juhua maru niriquiano. Cua sequesanoori juhua shushiquia jiariquiano. Naatej, taa jurneca niya jiyasocuaacuacuaanij, naa quiniutianiyari.

3“Janiyari Camarnujuanaajiniji poojotariquianoni. Casaa maniniu pa Pueyaso miiniuucua pueracuaanij, nia timitiarecuaano. 4Nojuajaari pa cojuana, pocuaji tacunajuhuaj. Puetunu na miijiosanojanaari tojetaarucuajanaa maninia. Nojuajaari maja rimiajata pa jiitiana. Puetunu na sequesanojuanaari seetanujuanaa. Nojuajaari Pueyasojuanaa cutara, cuaracashiyo. Naajuhuaj, nojuajaari sesa casaa paracaajia, maninia miitio na quiniuucua.

5“Sesa miijiaca pueyanaa, niaari tojetaarucuajanaa Pueyaso rejetejaca. Niaari naacua Pueyaso najiquitiquiaaquij. Naacuatej, niaari juucua necohuacuaja. Niaari saa sesa miijiacaja. 6Naa sesa miijiaca nia quiniuucuatej, ¿niaateeri jiyaniya naa sacuaraatia nia miijiosanoori Pueyaso shuquiritiniutianiya? Niaari saa Pueyaso rerequeteyajaaruhua. Tojetaarucuajanaa niishiyashijiaca pueyanaa, ¿nojuajatee maja nia quenij, nia cortanijionatuhuaj? Nojuajaari nia cortaninia. Cuaqueyaraca quijiara nia jiyatenoori mijiria nio jiyajinia nia quiniuria.

7“Juhua quia nuhuajiria quia tacaterecuaraja rupaquijia quenaaja, tariucuacaanu quia supuetanaajiniji quia niishiriojonura. Quenaaja quia niishiriojorecuara taa quijiaca quia supuetanaa quiquiaari tariucuacaanunij. Quia que quia sequere cuaara tariucuacaanu nojori quiniujiniji quia pohuataara. Saaquiapue quia sequerejuhuaj, nojori cuaara quia pohuataaranoj. 8Tariucuacaanu mijiria quijiaca quishacari, jiyocuacaanu quijia Pueyasojuanaari puetunu taucuacajanaa raquiriataquiaari tamasaca taucuacajiniji. Pueyasoori naa nojori camaruutiquiaari puetunu jiyacajanaa. Nojoriria nuunojotaquiaari nojori quijia jiyacaari, tama na camaruhua nojori quiniuriajaaja. Saniniuujia, Pueyasoori Israel pueya saquiriojoquiaari tama nerajaaja nojori quiniuria. 9Naacuatej puetunu supuetana Israelcuajinio caneno pueyajanaari juhua Pueyaso noquiyaraja. 10Nojoricuajaari Pueyaso riuriatasano cariiquia jiyajinia. Joojeeca jiyaco quiojojuaari, jiyareta paratu piyarojosanojuhuaj. Pueyasoori juhua naatujoori shocua jataquiaari na numatucua nojoriicua na taraajenuucua. Naacuatej nojori niishitiojoree nojori niishishoo casaari. Naajuhuaj, nojori cojuaquiaariiri jiyanohua na panishano pueya nojori quiniuucua. 11Pueyasoori maninia nojori cojuaja, naatej, taa surohua miooru coneneecojiya na jesu cacocuaani neyanujua na shiniujiushacari, na jesujiniji na jaanura. Neyanujua jiyajenesacari, socua na cariquimiaji tiuquijiaari. Na jesujiniohua na niojohuari.

12“Pueyasoori tamajaaja nojori jaatiaquiaari, tamajaaja tojetaarucuajanaa. Majaari quenaaja tamonu cumaacaraca quijia quiquiaari Pueyaso na naacunura. 13Pueyaso puetasacari nojori, nojoriiri na paraa shocotaquiaari puetunu cuno jiya tuhuananuhuacacojuanaa. Pueyasoori nojori miateja nojori quiasaco nojori riuriatasano naana jaa. Naajuhuaj, Pueyasoori nojori raruuteja saitajiniaqueya nojori riuriataquesano samiyatu. Nojori miatequiaari sainiacajinia nujuatujua olivo jaa shiyocuajaariuhuaj. 14Na seetusano juyaca quitiaaca ratutujuaari. Na miaquetusocoriquiano quitiaaca cumanijiasano jiitiatujuajaariuhuaj. Queraatia borreeco macujuashiya maniniu miaquenuuquiaariiri. Naajuhuaj, cabra canuu maniniu Basaan jiyajiniji miaquenuujuajaariuhuaj. Trigo maniniu miatuquiaariiri, naatunacu uva caaca ratutujuajaariuhuaj.

15“Israel pueyari naa maninia na mianuucua riuutiacoquiaari. Quera taatiacoyari. Saniniuujia, saaja nojori ruuretanuucua nojoririano Pueyaso sequesano, juhua caballohuari na camaru na juaatianuta na nijiniara rapijionuujua. Nojori cortanijiona Pueyaso tarinitiatuquiaari tojiniu saajaari. Naajuhuaj, saaja nojori cojuana cocuaatia miiquioyanojiniji nojori jayona Pueyaso samiritiatuquiaariiri. 16Naa nojori jacamatunuucua Pueyaso paracaashano jeecojosano sacuaraatia casaacuaratej, nojoriiri naa Pueyaso ruutaqueja juaatiniu tama nojoriicuarajaajatej. 17Nojoriiri na seya catijiajojuaca samaruhuacuara juhua Pueyasoocuaraja. Naa catijiajotujua na seyari nojori niishishoo pueyasohuacuara. Cuno cumaacaraca jiyanishano shipinishano casamiiri shusha tama nojori niishishanojaaja quiriquiaa. Nojori supuetanaari maja cuno pueyasohua nojori jiyanishano na niishitiuniu quijia cutara. Naacuatej, nojoriiri maja cuno casamiicuara na jacamatunu quiquiaari cutara, juhua Pueyasoocuaraja.

18“Naacuatej, cuarta Israel pueyanaa, niaari niaacuajinio nia paraa tacuna nia Que niyajetarucuaa. Niaari quijiacarano nia jiyateno Pueyaso niyajetaturucuaa. 19Naa Pueyaso niquiniuucua sacuaraatia necohuara na jiyatesano pueya miishanotej, jiyanohua juaaquiaariiri. Cunora puetunu nojorijianaa samiritiaquiaariiri. 20Pueyasoori naacua naa sequereequij: ‘Janiyari quiarijia nojori shocotenutaniyani. Cuaara quenaaja saniiquioyara. Pa niquirinia, taa na miiquionutaniyajanojoni. Seetanujuanaa sacuaraatia miijiacaari. Nojoriiri nocua tiuushoo quiquiohuaniquiohua. 21Janiyari nojori tatitiaani tama nojori pueyasoranojaaja nojori jiyatesano pueyasojiyoseque panijiaca nojori quiniuucua. Janiyari naacua juaya cuno juaashiquiata jeecojosano na pueyasohuara nojori jiyatesanoniqui. Naacuatej, janiyari nojori carteyani, saniniuujia nojori niishishoo taucuaca Pueyaso cua quiniuria. Jiyacaritij, Israel pueyari naacua cuno juhua nojorijia cua tojitiaashijiaca taucuaca juaaniutianiya cucua saniniuujia. 22Janiya jiyanohua juayani. Naa nocuara na juaatitiuniuucua janiyatej, cua juaaniuuri juhua mani rimianacuya. Naacuatej, nojori cua saniitiosacari, majaari quenaaja na cureeconu quiniutianiya teerta. Juhua mani cua juaaquiaca quiniuucua, puetunu miasano nataacuacajanaari jiyareta toteerara jacamariquiano. Jiyareta jiyaconaja tuhuananuhua pajaqueya mohuaquiriquianojaariuhuaj. 23Nojori saniiniuria quenaajacuara, janiyajanaari nojoriicua shanacunutaniya puetunu sesa casaajanaani. Naajuhuaj, janiyari puetunu cua cashijianaa jiacutanutaniya nojoriicuani. 24Naacuatej, nojoriiri na miaajaa totetanutaniya. Jiyanohua taruquenu shaajetacoriquianoori. Nojori niishishoo cusonuuri naa nojori puecariquianotej. Naajuhuaj, janiyari nojoriicua jiyaroriquiano soorujurini, nojori sojoriquiano noonacuraca sacocuajaajanio. 25Nojori niquiohuari mueruuta tiaca nuucuajinia miaquejosaariquiano. Naajuhuaj, tiajiniaaco na puerenu teteyataturiquianoori. Cuno pojoriiri naacua puequeriquianotej, mashiquiori, niyacoojori, saaquiapue, supuejacaja muerasujaajanio.

26“‘Janiyari nojori niyacanu paniquianu nio jiyajiniji tucuacaanu juucuani. Naacuatej, nojori maara niyajetasaare tojetaarucuajanaa, maja socua nojori niishishaanura. 27Janiyari naa nojori cua saniitionu paniniujiniji tariniriohuacuaani, cua paraa mariqui cua rerequetereeri, mariqui naa sequetureeri: Majaqui Pueyasojuanaa cuno, naa Israel pueya miiriucuaa taraatiani. Canaacuajaari tama canaa cumaacatajaaja naa miiriucuaa naquiya Israel pueyani.’

28“Israel pueyani, nojoriiri niishiyashijiacara jatarucuaa. Naacua tojetaarucuajanaa niishitiajaajunucuaari. 29Shiitianiyojua niishitiaja tiuquiniriquiohuacuara quenaaja nojori nacajinianij, nojori maara jiyacari niishiri nojoriiri cocuaatia miiquioya. 30Nio nia niishiriquia: ¿Casaara niquiriyatu nia paraajinijinio mil niajaniyajinijinio cocuatasaaquiaarini? Naajuhuaj, querajaa nia paraajinijinioori diez mil niajaniyajinijinio cocuataquiaari. Nia niishiri, nia Camarnujuanaari naa nia paraa shanacuquiaari naa nia miishaanuratej.

31“Janiyari noojiaqueya nia timitiaquiaani naa pa paraajiniji nia sequesacari: ‘Pa paraacuajaari niishiya, nojori cojuanaari maja juhua pa jiitianaja. Pa jiitiana cutaraari saa maninia miijiaja. 32¿Nojoriirijiataj? Tojetaarucuajanaa saa sesa miiniuucua jiaatiajacajaari. Naa saa sesa miiniuucua netejaca nojori quiniuucuatej, naacua maatia niishishiyari, nojoriquiiri Sodoma, Gomorra tiacajinijinio caneno taucuaca. Naa saa sesa miiniujia nojori niishiniuucuatej, puetunu nojori miijiosanojanaari juhua soconu noonacu nojori niishiyo pueyara. 33Naa sacuaraatia casaa nojori niishishanoori puereeta, juhua soconu noonacujua. Pueya jaara naa sacuaaraatia miijiorejuhuaj, nojoriiri saa shaajecoriquianojua.

34“Janiyari naa puetunu sacuaraatia nojori miijiosanojanaa racataani. Janiyari na rejeretaajaarani. 35Saniniuujia, sesa miijiaca cua saniitionu juuca jaara tari tohuatere, janiyari quenaaja jiyanohua nojori saniitionutaniyani. Tari quera tohuateyacuajaari nojori cua moquiniu juuca. Cuaara jiyanitiuuria curosaariquiano.

36“Jiyacaritij, Pueyasojuanaari na saquiriojosano pueyacuaji tacunutaniya na paraa na niquishacari na pueyari tojetaarucuajanaa tari puequeenaja, cumaacaaju. Pueyasojuanaari naa na pueyacua taraajenutaniyaquij. Naa nojori miiniutianiyari tojetaarucuajanaa nujuatajaaju cumaacaaju nojori na niquishacari. 37Pueyasoori jiyacari naa nojori nequesotariquiano: ‘¿Teete nia cojuariquiano tama nia pueyasohuarajaaja nia jiyatesano cua nitini, 38nocuara nia seya nia catijiajosanotej, noojuhuaj, na cari raatonuque nia cajitijiotasano juhua raturiquiano cari quenaajatej? Nojori cuaara niaacua taraajeera na naacunura niajaniya. Nojori cuaara nia miitianaa tenujuura niaacuaji jaara na naata quiri. 39Saniniuujia, janiya cutaraari Pueyasojuanaani. Majaari socua tamonu quijia quiniu juhua janiyaja. Janiyari pueyano samiitianijiani, na shaajajajuhuaj. Naajuhuaj, janiyari pueyano naatijiani, na cushiriitijiohuajuhuaj. Naacua nia niishiriquiatej, Pueyasojuanaa cua quiniuucua, majaari quenaaja tamonu naata cua quiasano jaariutianu cua juaashiquiajiniji. 40Jiya cajiniocua cua juaashiquia cua shiitiosacari, cunoori seetanujuanaa coretoo quijiajuhuanaja cua quiniuucua. Naacuatej seetanujuanaari cua sequesano. Cua tojiri. 41Janiya jaara cua shacantunee nijiniaquetucuaja mueruu racotareni, janiyari jiyacari sacuaraatia cuno pojori miijionuucua nojori nequesoreenutaniyani. Janiyari jiyacari cua paraa naminiutianiyacujua. Janiyari jiyacari cua niquiniu paniyaquijiaca saniitionutaniya jiyanohuani. 42Cua cashiiri naatumaaca maturiquiano tariucua cua paraa coonu. Cua nijiniaquetucuaja mueruuri nojori puetujuriquianojanaa. Cuno nanacani, cunoori nio pojori nanaca quiriquiano: puejotanaca nanaca, quioosano nanaca, cua paraa camarucua nanacajaajanio.’

43“Puetunu jiyacajinijinio pueyapuejanaanaa, Pueyaso pueya nia cojiri timiniu. Pueyasojuanaacuajaari na rupaa pohuatanaa puecoonaa namiriquiano. Na paracaajiaca naminiutianiyajaariuhuaj. Saniniuujia, Pueyasoori sesosano jiya jeequeriquiano. Na saquiriojosano pueya jiyanooriquianojaariuhuaj.”

Currently Selected:

Deuteronomio 32: arl

Highlight

Copy

Compare