Deuteronomio 30

Pueyasoori jiyanoojia sesa miijiaca jaara nocua tacatorohua noojia

1“Naacuatej, puetunu pa Camarnu Pueyaso sequesanojanaa jaara tohuatere, maninia na miiniuria niajaniya na tojijiaca nia quiniuucua, saniniuujia naquiya na miiniuria niajaniya nia tojiyaquiniuucua nojuaja, niocua tama niatarejaaja niaari na tojiyashijiaca. Naarate nojuajaari nia taanuuquiaari nia paraa taucuaca jiyacajinia nia pishiniuria sesa nia miishanojiniji. 2Naa nia niatasacari niaa jaara pa Camarnuucua tacatorohua nioojia, seetanujuanaa puetunu nioojiatajanaa saa na panishanojua nia miiniuria puetunu nia niquiohuatajanaa, taa cua sequeyacuajanij, cunoori maniniacuaja. 3Cunora, niaa jaara naa miiritij, pa Camarnu Pueyasoori niaacua taraajenutaniya maninia na miiniuhuara niajaniya. Nojuajanaari tiquiyocua jiyacajiniji nia coqueetenutaniuhua, tee cuniquiria na taanuuquiaari niajaniyacuajani. 4Naajaa, niarta pueyajinijinio jaara cureecoreja tiquiyocua tucuacaanu tamonu jiyacajiniaja, nia Camarnu Pueyasojuanaari tiji nojori riujiuutiniutianiuhua. Nojuajanaari nojoriicua canujunutaniya nojori na pajejonura puetunujuanaa nojori na coqueetenuhuara. 5Pueyasoori naa nia riujiuutiriquianohua tariucuacaanu nia supuetanaa quijia jiyajiniohuatej. Niaari saniniuujia cuno jiya camaruhua quiriquianoojua. Pueyasojuanaari maninia miiriquiano niajaniya. Nojuajanaari nia supuetanaajiniji socua jiyanohua queraatiara nia muetuteriquiano. 6Naajuhuaj, juhuajaniya pueyaracaanu rishijiaca nia quiniuria, nojuajanaari sesoriquia nioojiaseque jataniriquiano. Nojuajaari naa miiriquiano niaacuajinio caneriquiano pueyajuhuaj. Nojuaja jaara naa miiri niajaniyatej, Pueyaso panijiaca nia quiriquia puetunu nioojiatajanaa, puetunu nia sohuanutajuhuaj. 7Naacuatej, pa Camarnu Pueyasoori nia saniitiotajarano na jiitiasano jiyatenutaniya nia paraa na saniitiotajara saniniuujia, teyonu pojoritiucuaja jiyanohua na paracaaniuucua na puecoosocoriquiano neteyojotaja niajaniyacuajani. 8Niajaniya saniniuujia, niocua Pueyasoocua tacatorohua nioojia na tojijiaca nia quiniuhuara, quiarijia niaarano cua sequesano tojijiacajuhuaj. 9Naacuatej, pa Camarnuuri maninia miiniutianiya niaara puetunujuanaa. Nojuajaari jiyanohua nia canijiariquiano, nia seesano juyacajuhuaj. Nia nataacuacaari naa tojetaarucuajanaa jiyanohua niaara maniniushiriquianojuhuaj. Pa Pueyasoori naa maninia nia miiriquiano na timitianuta taa na miijioquiaari maninia nia supuetanaacuaa na timitianutanij. 10Naa maninia na miiniu paniniu juucua niajaniyaniquitij, cunoori niaa jaara seetanujuanaa pa Camarnu Pueyaso tojitiajaca quiri. Naajuhuaj, nojuajaari nia timitianutaniya niaa jaara nio nequesoreetujinia niaarano na naajiotanishano tojitiajaca quiri puetunu nioojiatajanaa, puetunu nia sohuanu paniniutiajuhuaj.

11“Nio nia tojishocoriquiano niaarano Pueyaso Rupaa cua caminiujiushanoni, nia naatacuajaari na tojiniu. Niaacuajaari na jiitiaa. ¿Niaatucua casaara na juuretaariquiohua saajaniuhuaj? 12Cuno na rupaari maja jiya cajiniocua na quiniu niaacuaji, nia sequetarura: ‘¿Cantucua jiya cajiniocua cuno rupaa tojiniuucua tacaarecuaani, saniniuujia puera na caminiujiushocoriquianoojua?’ Naacua cutaratej, pa naataari puerano Pueyaso sequesano tojijiacara quiniu cutara. 13Naajuhuaj, Pueyaso Rupaateeri niaacuaji quiya shoniniacu caminia taquijiria nocua nia tanamitiniuriani, nia sequetarura: ‘¿Canteja shoniniacu caminia taquijiria cuno rupaa tojiniuucua niuniutianiyacuaani, saniniuujia puera na caminiujiushocoriquianoojua?’ Naacua cutaratej, pa naataari puerano Pueyaso sequesano tojijiacara quiniu cutara. 14Seetanujuanaa nia sequeyanijia. Majaari Pueyaso sequesano nia cuaracashitiniu. Niaacuajaari niaarano na naajiotanishano Rupaa jiitiaa. Nia tajinia quiyacuajaari. Niaacuajaari na tequejotaquiaa. Naajuhuaj, nia niishitiajajinia quiyacuajaari. Naacuatej, nia naatacuajaari na tojijiaca quiniu.

15“Pueyanaa, quiarijia nia saquiriojotereeraj ¿teyano nia paniyani, maninia Pueyaso miiniuria niajaniya, sesa soj? ¿Niaatee pueyaracaanu rishijiacara quiniu paniya Pueyaso tojijiaca nia quiniuucua? ¿Niaatee macunucua quiquiojinia quianu paniya soj, tee naquiya nia miitiasaanura pueyaracaanu tojiyashijiaca nia quiniuucua? 16Pueyaracaanu nia niishiriquia nio: Niaa jaara niaarano quiarijia cua sequesano tojijiaca quiri, niaa jaara pa Camarnu Pueyaso panijiaca quirijuhuaj, niaarano Rupaa tojijiacajaajanio, naacuatej, niaari pueyaracaanu rishijiacarano quiriquiano. Niaari jiyanohua caneriquianojuhuaj. Pa Camarnu Pueyasoni, nojuajanaari maninia nia miiriquiaano, niaarano na riuriotaca jiyajinia nia quishacari. 17Saniniuujia, niaa jaara puetunu niya na sequesanojuanaa tojiyashijiaca quiri, na miyashijiacajuhuaj, naajuhuaj niaa jaara saaja tama nia shipinishano casami tojiniuucua shiiniuquiri saaja juhua Pueyasoocuaraja nia jacamatunura, cunoori tojetaarucuajanaa sesa cutara. 18Janiyari quiarijia nia numooteyani: Niaa jaara naa mosaatia miijiaca quiri saajatej, majaari nia rishiniu quiniutianiya puera. Pasanaataja nia niuuniu nuhuaji Jordaan moo nia paraa nia miaquejonu nuhuaji, niaari rupaquijia quiriquiano niaarano Pueyaso riuriotaca jiyajinia. 19Quiarijia nio juucajani, maja nia cuaracashitiniuria na nuhuaji niaarano Pueyaro sequesano, janiyari quiarijia jiya cajiniocua, jiya niquiarajaajanio niaacuara tonujuriquiano nojori jiyateyani. Janiyacuajaari nojori niquiara tari nia saquiriojoteree nioni: ¿Teyonu nia paniyani: pueyaracaanu juhuajaniya quiniu, ritia shaajenu soj? Naajuhuaj: ¿Niaatee Pueyaso paniya maninia na miiniuria niajaniya? ¿Niaatee na sesacasano pueya quiniu paniya soj? 20Saaja pa Camarnu Pueyaso panijiaca nia quiriquia. Saa na tojijiacaja nia quiriquia. Majaari nioojia nia niquijiotenu. Nojuacuajaari mijiria nia quiniu niishiya. Naa na tojitiajaca nia quishacaritij, niaari pueyaracaanu rishiniutianiya niaarano na riuriotaca jiyajinia, noo jiyajinia, teyonu nio pojori pa supuetana Abraham, neyanu Isaac, na jinianu Jacob na niquitionu sequequiaaricuajani.”

Currently Selected:

Deuteronomio 30: arl

Highlight

Copy

Compare