Deuteronomio 31
31
Pueyaso jiyatesacari camarnura Josuee narta Israel pueya puerojoriquiano Moisees niti
1Na nuhuaji Moiseesri puetunu narta Israel pueyajanaa rerejotequiaariuhua. Jiyacari naa nojori sequequiaariiri:
2“Janiyari tariucua ciento veinte marijia shocotejononi. Tari juusucuanijia. Maja tari cua naata rucuanejonu. Naajuhuaj, Pueyasojuanaari cua sequerucuaani, majana tari niaata cua niuuniu quiniutianiya Jordaan mooni. 3Naajaa, pa Camarnu Pueyasojuanaacuajaari nia puetanutaniya. Naa nojuajanaa puetanuucua niajaniyatej, nojuajaari nia paraata nia miaquetoojosacari nia shocojotaniriquiano. Naa nia paraa nia shocojotanuucuatej, niaari nia paraa jiyaca camaruhua quiriquiano. Josueeri nia puerojoriquiano nia camarnu na quiniuucua. Pueyasocuajaari naa Josuee miiniuria tari na saquiriojoquiaaritij. 4Pueyasocuajaari nia shocojotaniniutianiya miaquejonu cuno tiacacajinijinio nia paraa, naatej, taa Amorreo camarucua Sehoon, Og na miaquejotequiaari tojetaarucuajanaa niajaniyacuajani. Niaari naacua cuno taucuaca jiyaca camaruhua quiriquianotej. 5Camarnujuanaa jaara jiyacari nia shocojotaniri nia paraatej, niocua naa nojori miiritij, taa tari cua rootaree niajaniyacuajani. 6Niocua tama nia cuaqueyajaaja cumaquiri. Niocua nioojia cajitirijuhuaj. Majaari na puerenunoj. Majaari nocuaji shiriiquitiuniujuhuaj nojoritia nia miaquetoojosacari. Pa Camarnu Pueyasojuanaacuajaari nia cojiriquiano. Nojuajaari maja quenaaja na cartenu quiniutianiya niajaniya. Nia tarinitiaaquiriquianojaariuhuaj.”
7Na nuhuaji, Moiseesri Josuee piirii. Naa na sequeree puetunu narta pueya niquiarajanaari:
“Cumamaca quia quiriquia, quioojia niquijioteyaquijiajuhuaj. Quiaacuajaari puetunu nio pueyajanaa puetariquiano noo jiyajiniara teyonu jiya pa Camarnu sequequiaari seetanujuanaa niquitionu pa supuetanaacuajani. Quiaari nio pojori camaruutiriquiano cuno jiya. 8Camarnujuanaacuajaari quia puetariquiano, quia cojiriquianojaariuhuaj. Majaari quenaaja na tarinitianu quiniutianiya quiajaniya, quia panajoriquianoori. Naacuatej, majaari puerenu, majaari cohuanashijionujuhuaj.”
24Moiseesri pueya tojishocoriquiano Pueyaso sequesano tucuataquiaari naajiotanu neequesoreetujinia. 25Nojuajaari jiyacari pueyacuara secojonaa supuetana Leviicuajinio caneno pueya sequeree. Cuno pojoricuajaari Pueyaso quiquio cojee patanaa quijiaca. Naa nojori sequereeri:
26“Nio naajionee nia niatare Camarnu Pueyaso quijia cojee shuriuquiumia. Cunoori maja nia cuaracashitiniuria Pueyaso sequesano niaarano. Cunora cuno naajio cuaara pueyaracaanu tii racateera.”
Moisees pohuatasano na jaaquejosanojiniji
30Jiyacaritij, Moiseesri puetunu nio jaaquejosanojuanaa caminiujiuquiaari na coteejajiniji puetunu Israel pueya rerejono tojishocoriquianojanaa. Cuno jaaquejosanoori naa sequeyaquij:
Currently Selected:
Deuteronomio 31: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
