2 Samuel 5

David jiyatesaanu camarnura puetunu Israel pueyarajanaa

1Sauul mosaanu nuhuaji, puetunu supuetana Israelcuajinio caneno maapue pueyajanaari Hebroon tiacajinia nijioquiaari tii nojori pocoojonura Davidta. Nojoriiri jiyacari naa David sequetuquiaari:

—Canaari seetanujuanaa quia tapueyocuacani. 2Canaatucua casaara tamacare canaa camarnunij. Taaquiriirinij, Sauulcuaaquiniateja canaa camarnu quijiajaj. Quiajaniya saniya cutaraari maninia puetunu canaajanaa puerojojua pa paraa miaquejonuucua. ¿Quaateeri tari niyajetarucuaa Pueyaso sequesano quiajaniyatej? Pueyasocuajaari seetanujuanaa quia sequeno, quiaari puetunu quiarta Israel pueyajanaa jiitiariquiano. Quiaari nojori camarnu quiriquianojuhuaj.

3Naacuatej, puetunu supuetana Israel pueyajinijinio jiyaniijianucuajanaari Hebroon tiacajinia nijioquiaari tii nojori pocoojonura camarnu Davidta. Davidri jiyacari narta pueyata Pueyaso niquiara seetanujuanaa sequetooquiaari taa seetanujuanaa nojori miitioonutaniyanij. Naa na miitiuniu nuhuajitij, narta pueyari David jiyateturee puetunu supuetana Israelcuajinio caneno pueya camarnu na quiniuria. 4Jiyacaritij, Davidri tariucua treinta marijia shocotejonu quiriquiaa, nojuaja jaara puetunu supuetana Israelcuajinio caneno narta pueya jiitianu coteequiaari. Naacuatej, Davidri cuarenta marijia shocotejoquiaari camarnu na quishacari. 5Davidri coteenu saaja supuetana Judaacuajinio caneno raquitiinio narta pueya camarnu quijia Hebroon tiacajinia. Naa cuno Hebroon tiacajinia camarnu na quishacaritij, tii shocotejoquiaari saaja siete marijiaari socua seis racanio. Israel, Judaa, nio querajaa maanu coquetoonuhua camarnu na quishacari, Davidri Jerusaleen tiacajinia pacuno quiriquiaa tari. Naacuatej, nojuajaari Jerusaleen tiacajinia shocotejoquiaari treinta y tres marijia, Israel maanu, Judaa maanu camarnu na quishacari.

David tiuquitiasacari Jerusaleen tiaca na miaquejonura

6Tarijia, coteenu Jerusaleen tiaca camaruhua quijiaari taucuaca, Jebuseocuaca jiyanishano. Naacuatej, camarnu Davidri na pueya jaatiaquiaari cuno Jebuseocuaca miaquejonuucua. Cuno Jebuseocuacaari jiyaniquiaari Davidri maja na naata nojoriicua tiuquiniu quiniutianiya nojori na miaquejonura. Nojoriiri naacua na rerequetenuta naa David sequetuquiaaritij:

—Majaari quia naata canaacua tiuquiniu quiniutianiya canaa quia miaquejonura. Niya canaa cariyojuarujuri, shipiiniuquiuniuujiacajuhuaj, saaja nojoricuajaari canaa tiaca tohuateyaji cojuariquiano maja canaacua nia tiuquitianura.

7Davidri saaja cuno Jebuseocuaca tiuquitiaquiaari, cuno quiarijia Jerusaleen tiacani. Jerusaleen tiacaari naacua David tiacata niishishiyaquij. 10David cumaacaari socua jiyacatequiaari tojishano camarnu na quiniuucua. Cumaacaraca quijia Pueyasojuanaari na cojiriquiaacuaja.

Currently Selected:

2 Samuel 5: arl

Highlight

Copy

Compare