2 Samuel 7

Maninia rupaajinia Pueyaso sequesacari David

1Tari camarnu David quishacari, nojuajaari panaatia quiriquiaa nocuaji na tiatesanojinaaco. Naa tari panaatia quiriquiaari Pueyaso shocojotaniniuucua nojuaja puetunu na jiya shocua quijiaca na paraajanaa. 2Davidri jiyacari naa sequequiaari pueyarano Pueyaso sequesano caminiujiunia Nataantej:

—Quiaacuajaari puetunu niishiyajanaa, janiyari taquiya suruhuatujiniji cucuaji cua tiatesanojiniaaco quiyacuaani. Pueyaso quijia cojeeri saaniniuujia toqueyarano shiyosano tunujusano cariquioco cajitiaacujua.

3Naacuatej, Nataanri jiyacari naa camarnu David riucuareequij:

—Maninia quia miiri, taa quia niishiriojiya quia miishocoriquianocuajani. Pueyasocuajaari quia cojiya.

4Cuno niucuajanij, Pueyasoori naa sequequiaari Nataantej:

5—Cua seru Davidcua quia quiaare. Quiocua quiria naa na sequeseenoj. Janiyajanaa Pueyasoniquij. Janiyajanaacuajaari naa nio sequeya Davidni: “Majaari quiajaniya cuno, cua quijiara tiariquianoni. 6Egipto jiyajiniji cua jaatianujiniji puetunu nia supuetanaa Israelcuajinio caneno pueyajanaanij, jiyacarijiniji, quiarijiajuhuaj majaari tiasanojiniaaco cua quiniu. Janiyari saaja toqueyarano shiyosano teetejosano cariquioco quiquiaa pueyaracaanuni. 7Naa pueyaracaanu nojoritia cua rucuanejosacaritij, majaari cua sequenu quijia camarnurano cua jiyatesano cua saquiriojosano narta pueya jiitiariquiano, ‘quiria nia tiare suruhuatujiniji cua quijiara.’ 8Naacuatej Nataannaa, quiarijia saniniuujia quiria quia caminiujiuri cua seru Davidra nio nera cua sequesanoni. Janiyari, cumaacaraca quijiajuhuanaja Pueyasoni. Janiyajanaari naa David sequeyani: ‘Janiyari quia saquiriojono puetunu quiarta pueyajinijiniojuanaani. Naajuhuaj, janiyari naa quia jaanioni maja socua seya nuhuaji quia nujuanamitiniuria. Janiyari naa quia jaanio cua saquiriojosano quiarta Israel pueya camarnu quia quiniuriani. 9Majaari nio niyajetanu. Janiyajanaacuajaari puetunu tiquiyocuajanaa quia cojinioni. Quiaari naacua quia paraa miaquejonu puecanotej, teyonu pojoritiucuaja juucua quejatuquiaari quia miaquejonuni. Naa cua naacanuucua quiajaniyatej naa quia paraa quia miishanojinijiiri puetunu tiquiyocuajanaa niishishiya. Naacuatej, janiyari quiarijia quia jiyateree juhua nocuaji jiuujiatesano pueyanoni. Cunoori puetunu quia miishanojiniji niishishaanuucua puetunu jiyacajiniajanaa. 10Naajuhuaj janiyari tariucua jiya jeenucuano cua saquiriojosano Israel pueya quijiarani. Janiyari cuno jiya camaruutinio nojorini. Nojoriiri cuno jiyajiniji pootioshiyaquiriquianojuhuaj. Nojori paraa sesa miijiacaari maja tari nojori miitiariquiano juhua coteenujua. 11Tariucuacaanu saaja nojori puerojoriquiano cua pueya jiitiasacari jiyaniijianucua nojoriiri tojetaarucuajanaa na paraa taucuaca miitiasano pueya quijia. Quiajaniya saniniuujia Davidnaa, quiaari panaatia quiriquiano cutara, quia paraa taajetesoo tojetaarucuajanaa. Naajuhuaj, janiyari quia muetuteriquianoni. 12Quiaa jaara quia saaquianoshishacari shaajeyariquia, janiyari niquiriyatu quiocuajinio caneno pueyajinijinio camarnurano na jiyateriquianoni. Cua cumaquiniuucua nojuaja, majaari na naata jatasano camarnu quiniutianiya camarnu na quiniujiniji. 13Nojuajaari cua quiquiorano tiariquiano cutara. Janiyari naacua pueyaracaanu camarnura quiriquiano na jiyateriquianoni. 14Nerani, janiyari na que quiriquianoni, nojuajaari saniniuujia quiria quiyanu quiriquianoojua. Jaara sesa miiri, janiyari na roshiritiariquianoni na saniiniuria quenaajacuara. Janiyari naa na miiriquianoni, taa pueyano miiquiaa neyanucuaani jaara na tojiyaquiri. 15Saniniuujia, maja cutaraari maninia cua miiniu cua tarinitianu quiniutianiya nojuaja taa cua tarinitiacanu maninia cua miiniuria Sauulcuaani. Janiyacuajaari na niti quia jiyatecanu camarnu quia quiniuriani. 16Quiocuajinio caneno pueyari naa camarnu na quiniu sanitijiotooriquiano quia niti pueyaracaanura. Janiyajanaari nojori jiitiariquianoni.’”

17Jiyacaritij pueyara Pueyaso sequesano caminiujiunia Nataanri naa Pueyaso sequesano caminiujiuquiaari Davidra. Maninia David pohuatareeri taa na tojiquiaaricuajanoj, taa na niquitishaaquiaarijaniuhuaj.

Currently Selected:

2 Samuel 7: arl

Highlight

Copy

Compare