2 Croonicas 5
5
1Salomoon jaara tari tojetaarucuajanaa tucuataniquiaari tiatenu Pueyaso secojojua tia, secojojua tiacora pooteree puetunu orojiniji, platajiniji shipinijiosano casamijianaari. Tiajiniaaco nocuajinio riuriotaca sohuacamara na racataniriiri. Puetunu cuno casamijianaani, cunoori camarnu David quishacarijia Pueyasorano na jiyatesano quiriquiase.
Pueyaso quijia cojee tiuquinitiasacari na riuriotacajiniaaco
2Jiyacaritij, Salomoonri nio narta Israelcuajinio caneno pueya masuunujuquiaari: puetunu narta pueyajinijinio jiyaniijianucuajanaa, puetunu nojori supuetana Jacob doce niquiohuacuajinio caneno maapue jiyaniijianucuajuhuaj. Cuno pojoriiri socua tojishano pueya quijia puetunu nojorijinijiniojuanaa. Salomoonri naa cuno jiyaniijianucua masuunujuquiaaritij, Pueyaso quijia cojee na pacutunura suhuortu cariquioco na cajitiasaquiji. Pueyaso quijia cojeeri Sioon tiacajinia cajitiaja, camarnu David tiacajiniatuhuaj. 3Jiyacaritij puetunu supuetana Israelcuajinio caneno canuujuanaari camarnu Salomoon rerejotaquiaari na queranacutunura. Jiyacaritij, siete racaari tariucua shocojono quiriquia cuno marijiara. Cuno nojori queranacunu juucani, jiyanohua nojori pueresano juuca quijiaari. 4Naacuatej, puetunu Israel pueya jiyaniijianucuajanaa jaara tiuquiijioquiaari, supuetana Leviicuajinio caneno pueyacuara secojonaari Pueyaso quijia cojee pataquiaari na cajitiasaquiji. 5Na caco teecojua toqueyari tutojosaareejuhuaj, puetunu tii quijia Pueyasorano jiyatesano casamijiaajanio. Pueyacuara secojonaa pueyari puetunu cuno casamijianaa pootuquiaari. 6Camarnu Salomoonri puetunu pueyatajanaa tii rerejoquiaari. Pueyaso quijia cojee tacojini, puetunu cuno pueyajanaari queraatia na seya borreecohua, juyaca puecooriquiaari Pueyasora na nanaca na shootetusocoriquiano. Naa jiyanohua seya quiniuucua Pueyasorano puecoosocoriquianotej, majaari na naata serojosaanu quiquiaari taa seyateja puetunujuanaa quiriquiaani.
7Na nuhuaji, pueyacuara secojonaa pueyari Pueyaso quijia cojee tiuquinitiaquiaari secojojua tiajiniacuma, nocuajinio jeenucuasano sohuacamara. Cuno sohuacaari sesojosaaquiaari “Pueyaso Quishaquijianaa.” Pueyaso quijia cojeeri juhua Pueyaso seya niquishano nesuhuaraca cariquioco niatasaaree. 8Cuno nesuhuaraca jeecojosano casaari Pueyaso quijia cojee caco teecoriquiaa. Na nesuhuata maninia nucuriquiaa Pueyaso quijia cojeeri. Cuno cojee patataja na shuucuaji shuquitiasano macaca nucuriquiaa maniniajaariuhuaj. 9Cuno, Pueyaso quijia cojee na shuucuaji shuquitiasano quijia na patatajarani, cuno querajamaaca macacaari puera tucuamaaca quiriquiase. Naacuatej, na nacatucuaari tamonu sohuacajiniji maatia niquishano quijia, maja puetunu cojeejanaa. Naa quiyajaa tii quiarijiaari. 10Pueyaso quijia cojeejiniacumani, mii niojosano quiriquiaari Horeb tuhuananuucua Pueyaso niquitiojosano Moisees querajaa saajianeeca. Pueyaso naajiojanaari cuno saajianeecaacua quiriquiase. Israel pueya quiojosacari Egipto jiyajiniji, Pueyasoori cuno na naajiota nojori toquiaari nojuajanaari nojori cojiniutianiyacuaja nojori jaara na naajio tojijia quiri.
11Na nuhuajij, pueyacuara secojonaa pueyari Pueyaso secojojuajiniaacoji tohuareetaquiaari. Puetunu nojorijianaari tama na cuaqueyajaaja tariucua Pueyaso jiyanootinio quiriquiaa. Naacua juhuajaniya cojecoriquiaa secojojua tiajiniaacoori. Nojoriiri maja na maapueta na sanitijiotoonu quiriquiaa. Puetunu nojorijianaari jatiqui cojecoriquiaa. 12Jaaquenuunu niishijiaca supuetana Leviicuajinio caneno pueyari tii quiriquiaa. Nojoriiri nio pojori quiriquiaa: Asaf, Hemaan, Jedutuun jiyanishanonio. Puetunu nio pojori jaaquenunaari necohuata socua tama tapueyocuacatajaaja pananu muetasamajiria Pueyasora seya catijiaja nujuataja taquijiria nujuaturiquiaa. Puetunu nojorijianaari linojiniji shiyosano toqueya maniniuquiya cushiyonuuriquiaa. Naajuhuaj, puetunu nojorijianaari juhua coshi tiootiu niquishano piitiasano “ciimbalo” jiyanishano muetujuriquiaa, taquiniosano “salterio” jiyanishanojuhuaj, taquiniosano “arpa” jiyanishanonio. Tii nojori cojiriquiaajaariuhuaj ciento veinte “trompeta” jonenenuunaa. Nojoriiri pueyacuara secojonaa quiriquiase.
13Jiyacaritij puetunu cuno pueyajanaari Pueyaso na maniniuhuaqueetanura mariyataa jatiqui coteeturee na trompeta jonenenuunu, jaaquenuununio. Naajuhuaj cuno nojori jaaquejosanota Pueyaso sequeturiquiaari paacaraasho. Nojoriiri na piitiasano casaata cojuatuneriquiaa, na taquinionuusano casaajuhuaj, nojori jonenenuusano casaajaajanio. Nojoriiri nio jaaquejosano jaaquenuuriquiaa. Na sequeyari: “Pueyanaa, Pueyaso nia maniniuhuaqueetare. Nojuajaari tojetaarucuajanaa maninia. Na paniniuuri puequeyaquijia.” Jiyacaritij, cohuaja najacaari Pueyaso secojojua tiajiniaaco cajiquiaari. 14Naacuatej pueyacuara secojonaa pueyari maja na naata tucuatatunu quirii secojojua tiajinia nojori miiniu panishano juucua. Naa na miitiuniu panishano tarinitiatuquiaariiri Pueyaso shacantuuca cumaaca cajiniuucua tii nojori quishaqui Pueyaso secojojua tiajiniani.
Currently Selected:
2 Croonicas 5: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
