1 Croonicas 29
29
1Na nuhuaji, Camarnu Davidri na tojiniuucua rerejono pueya sequeree naatej: “Nio quiyanu Salomoonni, Pueyasoori saa nojuaja saquiriojoree camarnu quiriquiano cua niti. Nojuajaari naatujuaja, na miishocoriquianoori jiyanohua queraatia saniniuujia. Cuno na tiasocoriquiano tiani, cunoori maja parta pueyano tiarano camarnu na quiniuucua. Sequeshiyacuajaari Pueyaso secojojua tia, pa Camarnu Pueyaso quijiarano riuriotaca naatej. 2Janiyari naacua cua Pueyasoocuaji tiatetajara puetunu cua cumaacatajanaa tariucua paatijiosano jiitiaa oroni, plata, bronce, cumueeca casaa hierro jiyanishanonio, juhuanacajuhuaj puetunu casaajanaa jeecojotajara; naajuhuaj, jiyanohua panishano cornalina jiyanishano saijaajanio, sereretuuca sairi, naajuhuaj, jiyanohua panishano sai, muerujuaaca saijuhuaj, juhua sojotasano sereretujuaaca sainio, naajuhuaj, socua queraatia tamaatiujiaaca saijuhuaj, jiyanohua queraatia alabastro jiyanishano sainio. 3Naacuatej Pueyaso secojojuarano tiatajaracuajaari tariucua paatijiosano quiya. Naajaa jiyanohua cua paniniuucua cua Pueyaso secojojua tia, janiyari tama cua jiitiasano oro platajaaja niquitioyani. Cunoori tama cua casaajaaja cutara. 4Cua niquitiosano oroori cien mil kilo jiitiaa. Cunoori oro maniniu. Cua niquitiosano plata niiquiaari dosciento treinta mil kilo. Cuno plataari secojojua tia jiniacuma sohuaca nucutajarano. 5Naacuatej cua niquitiosano oro plataari tariucuaja puetunu casaa jeecojotajara. Naacuatej juaashiquiaraca pueyari tari jiitiaacuaja puetunu nojori panishano oro platajanaa puetunu casaajanaa nojori jeecojonura. Quiarijia saniniuujia ¿Teyonu niajaniyajinijinioteja na jiitiasano casamijiniji nareja Pueyasora niquitionu paniyanijia?”
6Jiyacaritij puetunu Israel pueya jiyasohuajanaari tama na jiitiasano cumueeca casaajaaja niquitiojoquiaari nareja. Naajuhuaj, supuetana Israel doce niquiohuacuajinio caneno maapue jiyaniijianucuaari niquitiojoquiaarijuhuaj. Naa niquitiojoquiaarijaariuhuaj miaquetoojonuucua mil pueya puerojonaa jiyaniijianucua, miaquetoojonuucua cien pueya puerojonaa jiyaniijianucuajuhuaj, puetunu camarnu Davidra poonijionaa pueyajaajanio. 7Naacuatej, puetunu cuno pueyajanaari queraatia cumueeca casaa niquitiojoquiaari Pueyaso secojojua tiatajara. Quiriquiaari ciento sesenta y cinco mil kilo oro, socua tariucua shipinijiosano diez mil cumaneeca oronio. Quiriquiaajaariuhuaj tresciento treinta mil kilo saa plataja. Naajuhuaj, quiriquiaari quera seisciento mil kilo bronce. Quiriquiaajaariuhuaj tres milloon tresciento mil kilo saa hierroja.
8Naajuhuaj canapueteja jiyanohua panishano sai jiitiajaca quiquiaarini, nojoriiri Pueyaso secojojua tiatajara reratena na niquitiotuquiaari. Pueya niquitiojosano cojuanani, nojuajaari Jehiel jiyanishano quijia, supuetana Guersoon niquiohuacuajinio pueyano. 9Naa juhua capora pueya niquitiojonuucua na jiitiasanojiniji seetanujuanaa nojori paniniutiatej, tama nojorijiaarijia jiyanohua timiquioquiaari. Camarnu David na timitiaquiaarijuhuaj.
20Camarnu Davidri jiyacari na tojiniuucua rerejono narta pueya sequequiaari naatej: “Quiarijia Pueyaso nia timitiare, nia Camarnujuanaa nojuaja quiniuucua.” Jiyacaritij, puetunu tii rerejono pueyajanaari nojori supuetanaa Pueyaso maniniuhuaqueetaree. Puetunu pueyajanaari Pueyaso na timitianura na tacoji mojoquetacoree, camarnu David tacoji mojoquetacoreejaariuhuaj.
Camarnu David shaajesacari
27Camarnu Davidri cuarenta marijia shocotejoquiaari narta Israel pueya camarnu na quishacari. Coteenu siete marijia shocotejoquiaari Hebroon tiacajiniaari, na nuhuaji socua treinta y tres marijia Jerusaleen tiacajinia. 28Camarnu Davidri tojetaarucuajanaa piquia shaajequiaari. Tariucua queraatia marijia shocotejonoori nimishiquiaari. Nojuajaari jiyanohua casamiriaca quijia, timitiasano quijiajaariuhuaj. Neyanu Salomoonri na niti tacaquiaari na cajitiujinia saniniuujia camarnu na quiniuria.
Currently Selected:
1 Croonicas 29: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
