1 Reyes 6
6
Salomoon tiatesacari Pueyaso Secojojua tia
1Salomoon jaara Pueyaso secojojuara tiatenu coteequiaari, nojuajaari jiyacari tari cuatro marijia shocotejoriquiaa narta Israel pueya camarnu na quishacari. Jiyacaritij cunoori abril raca quiriquiase. Cunoori querajaa raca quiriquiaa Israel pueya marijia coteejajiniji. Cuno marijiara, supuetana Israelcuajinio caneno pueyari tari cuatrociento ochenta marijia shocotejoriquiaa Egipto jiyajiniji nojori quianujiniji. 2Pueyaso secojojuarano Salomoon tiatesanoni, veintisiete metro tucohuanaari quiriquiase. Na jiniji shanacujusanoori nueve metro quiriquiaacujua. Na jiyaconaja saniniuujia, cunoori trece metro socua na cajiniocua jiitiariquiaacujua. 3Secojojua tia canetaajinijini, nueve metro jiitiariquiaari. Naate juhua secojojua tia jiriquia shanacujusanoori quiriquiaajuhuaj. Na queraqueeri cuatro metro socua na cajiniocua quiriquiase. Cunoori tia jiriquia quiriquiase. 4Salomoonri secojojua tia shuucuaji canetetejotaquiaari. Na nuhuaji jaranacujuara tiji matacojotequiaariiri. 5Naajuhuaj, Salomoonri secojojua tia mataca nijiniji matacojoquiaari sohuacacara. Cuno sohuacacaari secojojua tia nijiniji canetacojua jatiqui, puetunu secojojua tia shocuajanaa. 6Jiyareta jiyacuma sohuacaari querajaa metro jiitiaja, socua veinticinco centimetronio. Jiyareta na cacojiria sohuacaari querajaa metro jiitiajajuhuaj socua setenta centiimetrojuhuaj. Naajuhuaj socua na cacojiria sohuacaari tres metro jiitiaja, socua quince centiimetronio. Maja rianaa tiuquinijiosaanura tia mataca shuucuaji, saaja jacaria naacutejosaaquiaariiri rianaa nacatucua. 7Puetunu cuno secojojua tiajanaanij, cunoori saaja puereetuuca sai tariucua quejasanota tiasano quiriquiase. Naacuatej, tianaa cojesacari na tianuucua, majaari quenaaja pijiosaanu tojishaanu quiquiaari. Tojetaarucuajanaa majaari pijiotaja casaa panishaanu quiquiaari socua na pijiotajara. 8Jiyareta jiyacuma sohuacani, cunoori secojojua tiajiniaacora tiuquitiaja miaquetajaacuara quijia. Socua querajaa sohuacajiniara tacanura jiyocuacaanuni, suhuanocotunu tacatuuri nocua quijia juhua jocua riuhuaja.
9Salomoon jaara secojojua tia tucuataniquiaari, shanohua quejasano suruhuatuneeca rupojotequiaari tiajiniaacoori. Rianaata na rupojotaniquiaariiri. 10Naajuhuaj, Salomoonri secojojua tia mataca shocua socua tia queraacotaniquiaari socua quiquio quiniuria puetunu secojojua tia shocuajanaa. Secojojua tia mataca shocua queraacotasano tiani, querajaa metro quijiaari na jiyaconaja, socua veinticinco centiimetronio. Salomoonri suruhuatuneecata rianaarii secojojua tia shocua na queraacotanishano. Secojojua tia matacaacuara na coqueetejoree cumaatiaari. 11Pueyasoori jiyacari naa sequequiaari Salomoontej:
12—Cuno tia quiaa na poonijioteyani, cunoori maniniacuaja. Saniniuujia, nio cua sequesano quia tojiri cutara. Quiaa jaara nia tojishocoriquiano cua naajiotanishano tojijia quiri, nia tojishocoriquiano cua sequesano tojijiajuhuaj, janiyari naacua quia shipininio David cua sequesano tohuatenutaniya quiarani. 13Naacuatej janiyari cua pueyata quiriquianoni. Janiyari nia carteyaquiriquianojaniuhuaj.
14Jiyacaritij Salomoonri secojojua tia tucuataniquiaari tianu.
Currently Selected:
1 Reyes 6: arl
Highlight
Copy
Compare
Share
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
